RONDA PROBINSYA

Sumampa na sa tatlo ang bilang ng nasawi sa Toril District sa Davao City dahil sa diarrhea.

Ito ay matapos makapagtala ang Davao City Health Office ng dalawang panibagong namatay nitong Miyerkules at Huwebes.

Ayon kay Ashley Lopez, City Health Officer, ang pangalawang nasawi ay isang guro na sumakit ang tiyan matapos bumili ng street food sa kahalintulad na tindahan ng unang binilhan noon ng kauna-unahang nasawi.

Nakatira ang guro sa Surigao del Sur na bumisita lang sa Toril upang magturo.

Ang pangatlong kaso naman ay isang 67-anyos na babae, residente ng Bayan ng sta. Cruz sa Davao del Sur.

Pare-pareho ang naramdaman ng dalawang kaso sa unang nasawi noon dahil sa diarrhea na isang 10-taong gulang na lalaki.

Sa ngayon, patuloy pa ring iniimbestigahan ng mga otoridad ang pinagmulan ng outbreak kung saan ilan sa tinitignang anggulo ay ang ginamit na tubig at pagkain.

Patay ang isang 61-anyos na lalaki matapos magpasagasa sa tren ng Philippine National Railways (PNR) sa Lucena City, Quezon.

Kinilala ang matanda sa pamamagitan ng senior citizen Identification Card nito na si Noel Ligaya Delos Santos, residente ng Barangay 9, Barangay Ibabang iyam.

Ayon sa mga saksi, nakatambay lang sa tindahan ang matanda sa tabi ng riles dakong alas-tres ng hapon.

Pero nang tiyempo nang padaan ang tren na biyaheng San Pablo, Laguna ay dito na humiga sa riles si Ligaya.

Dahil sa ginawa ng lalaki, nagkahiwa-hiwalay ang bahagi ng kaniyang katawan.

Agad namang inimbestigahan ng mga otoridad ang insidente.

Noong July 14, isa ring lalaki ang namatay matapos masagasaan ng tren sa naturang lungsod.

Binuksan na ng Department of heaLth sa Bangsamoro Region ang one-stop shop para sa covid-19 vaccination at routine immunization.

Ayon sa DOH, dahil sa pagbubukas ng one-stop-shop ay mas maraming tao na sa rehiyon ang magkakaroon ng mas madaling access sa vaccination at routine immunization upang maprotektahan ang mga komunidad.

Magugunitang naitala sa BARMM Ang mababang covid-19 inoculation rates dahilan upang magkasa ang gobyerno ng special vaccination days sa rehiyon noong Mayo.

Sa datos ng DOH, nasa 1,844,370 doses lamang ang binakunahan sa BARMM.

Bukod sa covid-19 vaccination at routine immunization, nag-aalok din ang one-stop shop site ng mga serbisyong gaya ng animal bite treatment centers.

Umabot na sa mahigit 2K kaso ng dengue ang naitala sa lalawigan ng Laguna mula nang magsimula ang taong ito.

Ayon kay Health Officer Dr. Rene bagamasbad ng nasabing probinsya, nasa  2, 255 dengue cases ang naiulat mula noong january hanggang July 14.

Aniya, mayroon silang 3-year cycle na tinatawag kung saan tumataas ang kaso ng dengue.

Nabatid na huling naitala ang pagtaas ng bilang ng naturang sakit sa kanilang lugar noong 2019 kung saan umabot ito ng halos 22K.

Nanawagan naman si Bagamasbad sa mga barangay officials na panatilihing malinis ang kapaligiran at wasakin ang mosquito breeding sites.

Sumampa na sa 969 ang dengue cases, kabilang ang 5 namatay, sa Davao City simula Enero hanggang sa unang bahagi ng Hulyo ngayong taon.

Ayon sa Davao City Health Office-Tropical Diseases Prevention and Control Unit, kontrolado naman nila ang sitwasyon ng dengue sa lungsod.

Gayunman, maaaring lumala ang sitwasyon kapag napabayaan at kulang sa kooperasyon ang publiko.

Muling ipinaalala ng City Health Office sa mga residente na manatiling alerto kontra dengue sa gitna ng maulang panahon.

Simula pa noong pagpasok ng taong 2022 ay pinaigting na ng City Health Office ang kanilang dengue surveillance sa mga barangay.

3 ang patay habang 4 ang sugatan sa salpukan ng tricycle at van sa Maharlika Highway sa San Miguel, Bulacan.

Kinilala ang mga nasawi na sina AJ Maniquiz, 5 taon; Miguel Maniquiz, 7 taon at kanilang nanay na si Monica Ramos, 29 na taon.

Ayon kay Bulacan Provincial Police Director Col. Charlie Cabradilla, dead on arrival na sa San Miguel District Hospital ang magkapatid habang sa PJG Hospital sa Cabanatuan City, Nueva Ecija binawian ng buhay si Monica.

Sugatan naman ang trese anyos na driver ng tricycle at tatlong iba pa, kabilang ang isang taong gulang na lalaki.

Patungo sana ang mga biktima sa isang vaccination site nang salpukin ng van ang kanilang tricycle sa barangay Buliran, kahapon.

Batay sa imbestigasyon, tinangkang umiwas ng menor de edad na trike driver sa isa pang sasakyan na sinubukang mag-overtake bago naganap ang aksidente.

Agad namang naaresto ang van driver, na si Angelo Paras, sisenta’y uno anyos, ng San Leonardo, Nueva Ecija at nahaharap na sa mga kasong homicide at multiple serious injuries at reckless imprudence and damage to properties.

Inihayag naman ni San Miguel Police Chief Col. Jason San Pedro na ang nasabing aksidente ay dapat magsilbing paalala sa publiko na huwag payagang magmaneho ng mga sasakyan ang mga menor de edad.

Patay ang isang lalaki habang ginahasa naman ang nobya nito matapos silang harangin at holdapin ng tatlong salarin sa San Roque, Lapasan sa Cagayan de Oro City.

Batay sa impormasyong ipinaabot ni CDO City Director, Pol. Col. Aaron Mandia kay PRO-10 Regional Director, Pol. Brig. Gen. Benjamin Casuga Acorda Jr., nagdi-date ang magkasintahan nang tambangan sila ng tatlong lalaki sa madilim na bahagi ng Coastal Road.

Ipinagtanggol ng lalaking biktima ang kaniyang girlfriend kaya nagtamo siya ng 10 saksak at hindi na umabot ng buhay sa ospital.

Hindi pa nakuntento ang mga salarin at ginahasa pa ang babae sabay tumakas.

Naaresto naman ang dalawa sa tatlong suspek sa pamamagitan ng hot pursuit operation pero itinanggi nila ang krimen.

Patuloy ang isinasagawang imbestigasyon ng pulisya sa nangyari at pagtugis sa isa pang suspek.

Hindi pinatawad ng mga kawatan ang pera sa isang donation box sa loob ng simbahan sa Padre Garcia, Batangas.

Ito ay matapos sirain at nakawin ng mga kawatan ang laman ng box na nasa loob pa mismo ng Most Holy Rosary Parish.

Sa imbestigasyon ng mga otoridad, hindi bababa sa 3,000 pesos ang laman ng box.

Ninakaw ito noong Sabado ng madaling-araw at Linggo na natuklasan.

Posible namang dalawa ang sumalakay sa simbahan.

Sa ngayon, bagaman wala pang pahayag ang simbahan sa nangyari, iniimbestigahan na ng mga otoridad ang krimen upang mahuli ang mga kawatan.

Namahagi ng Livelihood Support Facilities ang Department of Agrarian Reform (DAR) sa mga magsasaka sa Sitio New Alimodian Peace Zone Multi-Purpose Cooperative (SNAPZ-MPC) sa Lalawigan ng Cotabato.

Kabilang sa ipinamahagi ng DAR ang isang Common Service Facility at mga Production Input na may layuning mapalakas ang kabuhayan sa pagsasaka at maabot ang produksyon ng mani at mais na aabot sa halagang P450,000.

Bukod pa dito, nakatanggap din ng isang unit ng corn sheller, apat na unit ng collapsible dryer, 10 bags ng organic compost, at iba pang makakatulong sa pagsasaka ang Cadiis Farmers’ Association sa Bayan ng Carmen ng nabanggit na lalawigan.

Ayon sa DAR, patuloy nilang imo-monitor ang naturang proyekto, at umaasang gagawin ng mga Agrarian Reform Beneficiaries (ARB) ang kanilang responsibilidad batay na rin sa kasunduang kanilang napag-usapan.

Samantala, nagpasalamat naman ang mga nasabing organisasyon sa tulong na kanilang natanggap mula sa kagawaran.

Isang ipo-ipo ang namataan sa karagatang sakop ng Lingayen, Pangasinan sa gitna ng nararanasang malalakas na pag-ulan sa Luzon area bunsod ng Southwest monsoon o Hanging Habagat.

Alas-5:40 ng hapon ng kahapon, nang manalasa ang ipo-ipo sa Lingayen Baywalk kung saan, namamasyal ang mga residente sa lugar.

Dahil dito, agad na nagsi-uwian ang mga residente matapos ding umulan nang malakas at makaramdam ng takot sa ipo-ipo na sinabayan umano ng kidlat.

Samantala, nagpaalala naman sa publiko ang PAGASA na kung hindi naman mahalaga ang lakad ay huwag na lamang umalis ng bahay upang maging ligtas at maiwasan ang anomang sakuna.