RONDA PROBINSYA

Sugatan ang apat na katao at isa ang binawian ng buhay sa isang banggaan ng 2 sasakyan sa Gumaca, Quezon.

Sa isang ulat, binabaybay ng tricycle ang bahagi ng maharlika highway sa barangay Villa Padua, ngunit ilang sandali, sumalubong ang nag-overtake na van sa tricycle.

Sa tindi ng salpukan, tumilapon ang driver at ang mga sakay nito.

Hawak na ngayon ng pulisya ang driver ng shuttle van matapos sumuko.—mula sa panulat ni Maize Aliño-Dayundayon

Aabot sa 109 na residente sa probinsya ng Cagayan at Kalinga ang nakitaan ng sintomas ng sakit na amoebiasis.

Ayon kay Dr. Carlos Cortina III, health officer ng Cagayan Provincial Health Office, karamihan sa tinamaan ng sakit ay mga bata na nagmula sa Allacapan, Aparri, Buguey, Camalaniugan, Gattaran, Lal-Lo, Lasam.

Sila ay naka-admit sa district hospital sa probinsya simula pa noong nakaraang linggo.

Magsasagawa naman ng mas maraming laboratory test ang health office upang matiyak na hindi cholera ang tumama sa kanila.

Ang amoebiasis ay kahalintulad ng cholera na kumitil na ng buhay ng apat na residente sa probinsya ng Aurora.

Nasabat ang P4.7M halaga ng hinihinalang shabu matapos nagsagawa ng buy-bust operation ang mga otoridad sa Barangay Buhisan, Cebu.

Kinilala ang tatlong nadakip sina Joselito Tabalino, 38- anyos, Charles Bacalla, 28-anyos at Danny Montemor, 19-anyos.

Batay sa report ng Regional Drug Enforcement Unit, narekober ang higit 700 na gramo ng iligal na droga.

Nagpanggap na bibili ng shabu ang isa sa mga operatiba at agad namang nagpositibo ang mga suspek.

Nahaharap ngayon sa kasong Republic Act no. 9165 o Comprehensive Dangerous Drugs Act sina Tabalino,  Bacalla at Montemor. —sa panulat ni Jenn Patrolla

Nag-paalala ang Bulacan Provincial Office sa mga may-ari ng baril dahil sa ipinatupad na gun ban sa Baliwag, Bulacan.

Ito’y upang paghahanda para sa plebesito na isasagawa sa Disyembre 17.

Ayon kay Col. Relly Arnedo, Bulacan Provincial Director, batay sa Commission on Elections (COMELEC) resolution no 10863, epektibo ang Gun Ban hanggang December 24.

Ito ang magiging hakbang anya para seguridad at kaligtasan ng publiko.

Samantala, kabilang sa isasagawang plebisito ang Civic, Professional, Religious, Business, Youth, at iba pang organisasyon. —sa panulat ni Jenn Patrolla

Patay ang anim na hinihinalang rebelde sa serye ng engkuwentro sa Bagumbayan, Sultan Kudarat.

Ayon kay Joint Task Force Central Commander Major General Roy Galido, naganap ang engkuwentro ng 7th Infantry Battalion at 10 rebelde sa Sitio Sandigan at Sito Mudti sa Barangay Chua.

Ang tropa ng mga rebelde aniya ay pinamumunuan ng isang Dennis Dulonan o Kalbo, umano’y miyembro ng Executive Committee at Deputy Secretary ng mga naiwang miyembro ng East Daguma Front, Sub Regional Committee Daguma, Far South Mindanao Region.

Narekober sa pinangyarihan ng krimen ang isang AK47, tatlong M16 rifles, magazines, propaganda materials at mga personal na gamit.

Sugatan ang tatlo katao matapos sumiklab ang sunog sa isang residential area sa Mandaue City, Cebu.

Ayon sa Bureau of Fire Protection (BFP), nagsimula ang sunog alas-11:46 ng gabi sa C. Ouano Street, Sitio Paradise sa Barangay Looc.

Madaling kumalat ang apoy lalo’t gawa sa light materials ang mga kabahayan.

Tinupok nito ang nasa 250 bahay at nakaapekto sa higit 700 pamilya.

Umabot pa sa ika-4 na alarma ang sunog bago tuluyang maapula dakong alas-2:38 ng madaling-araw.

Sa ngayon, iniimbestigahan pa ng BFP ang dahilan ng sunog na nagdulot ng pinsalang nasa isang milyong piso.