RONDA PROBINSYA

Mahigit isang milyong pisong halaga ng shabu ang nasabat mula sa isang suspek sa isinagawang buy bust operation sa Camarines Sur.

Kinilala ang naarestong si Gregorio Richelieu Ayen, 51-anyos, residente ng barangay La Purisima, sa bayan ng Pili.

Ayon sa Pili Municipal Police, nasa 150 gramo ng shabu ang nakumpiska mula kay Ayen bukod pa sa isang baril na may dalawang bala.

Nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang suspek. —mula sa panulat ni Jenn Patrolla

Sugatan ang dalawang mag-aaral ng Antique National School nang mauwi sa rambulan ang ginawang paninipa ng isang estudyante sa bag ng kanyang kamag-aral.

Sa isang video, makikita ang pambubugbog kay Patrick James Apostol, 19 taong gulang na isang Grade 12 student.

Nagtangkang umawat ang isang guro at isang 20 taong gulang na mag-aaral na si raf selda ngunit nagulpi rin at nagtamo ng sugat sa ulo at mata.

Nagkaharap na ang mga estudyanteng sangkot sa rambulan, kasama ang kani-kanilang mga magulang nang ipatawag ng principal ng nasabing paaralan. -  sa panunulat ni Maze Aliño-Dayundayon

Nahuli na ang number 2 Provincial Top Most Wanted Person sa pinagtataguan nito sa Barangay 13 Baay, Batac City, Ilocos Norte, matapos ang 33 taong pagtatago.

Kinilala ni Brig. Gen. John Chua, Regional Director ng Police Regional Office-1, ang nadakip na si Nestor Bagaoisan na pumatay sa isang construction worker noong 1984.

Ayon kay Chua, si Bagaoisan ay dating Patrolman noong panahon ng Philippine Constabulary-Integrated National Police, ngunit natanggal sa trabaho dahil sa Absent Without Official Leave.

Namasukan naman ito bilang Security Supervisor sa isang mall hanggang sa masangkot ito sa kasong pagpatay.

Agad namang nagtago ang suspek matapos ilabas ni Judge Reynaldo Maulit ng Branch 18, Regional Trial Court ng Batac City sa Ilocos Norte ang Warrant of Arrest noong 1989.

Iniulat naman ni Lt. Col. Adrian Gayuchan, Chief of Police ng Batac MPS. na agad na nagsagawa ng operasyon ang kanilang hanay kasama ang iba pang kaukulang ahensya matapos ibalita sa kanila ng isang concerned citizen na bumalik na ang suspek sa bahay nito.

Kaugnay nito, hindi na nakapalag nang dakipin sa bisa ng Warrant of Arrest si Bagaoisan na inakalang abswelto na ito sa kanyang kaso. —sa panulat ni Hannah Oledan

Natagpuang wala nang buhay sa loob ng kanyang bahay sa Lucena City ang isang 69 na taong gulang na Canadian national.

Kinilala ng City Police ang biktima na si Roland Krambeck, residente ng Welmanville Subdivision sa Barangay Bocohan.

Nakahiga umano sa sofa si Krambeck nang matagpuan ito ng kanyang kapitbahay dakong ala sais y medya nitong Huwebes.

Ayon sa mga otoridad, walang sugat o injury ang biktima at wala rin silang nakitang bagay na maaaring naging sanhi ng pagkasawi nito.

Posible umanong heart attack ang ikinamatay ni Krambeck na ayon sa kapitbahay nito ay nakararanas ng chest pain at nahihirapan din sa paghinga.

Nakatakda namang isailalim ang biktima sa post-mortem examination upang malaman kung ano ang sanhi ng pagkamatay nito.

Timbog ang isang miyembro ng crime syndicate na nasa listahan ng most wanted sa Quezon Province.

Kinilala ang suspek na si Michael Sinuto, miyembro ng Tadeo Criminal Gang na nasakote ng mga pulis sa Barangay Lumingo, Tiaong.

Inaresto si Sinuto sa bisa ng warrant ni Judge Ariel Palce, presiding Judge ng Cauayan City, Isabela Regional Trial Court branch 40 noong Disyembre 2018.

Nakakulong na si Sinuto sa Tiaong Custodial Facility at nakatakdang i-turn over sa Cauayan City Police Office. - sa panunulat ni Hannah Oledan