RONDA PROBINSYA

Sugatan ang tatlong laborer matapos bumagsak ang ginagawang Convention Center sa Lopez National Comprehensive High School sa Brgy. Magsaysay, sa Quezon Province.

Kinilala ang mga biktima na sina Benedict Eliaga Aquitania; Rosen Oblena Fulgencio; at Romeo Padayag Talento na kapwa isinugod sa Magsaysay Hospital ng Municipal Disaster Risk Reduction Management Office (MDRRMO).

Sa imbestigasyon ng Municipal Police Station ng lalawigan, nag-collapsed ang steal beam na ginagawa ng mga biktima dahilan para magtamo ang mga ito ng mga sugat sa ibat-ibang bahagi ng katawan.

Sa ngayon, inaalam pa ng mga otoridad ang pinaka-dahilan ng insidente.

Muling binuhay ng Department of Trade and Industry (DTI) ang Bamboo Handycraft Industry sa Quirino, Isabela.

Nabatid na ilang high school students at out-of-school youth ang nakiisa sa pagsasanay sa paggawa ng bamboo handicraft kahapon sa pamamagitan ng Shared Service Facility (SSF) Program.

Layunin nitong buhayin ang mga aktibidad ng Qurinian Youth in Action (QYA) na bamboo handicrafts-making; mabigyan ng oportunidad sa kabuhayan ang mga residente; at malabanan ang problema sa Climate Change bunsod na rin ng Covid-19 pandemic.

Nagdulot ng takot sa mga residenteng nakatira malapit sa Bulkang Kanlaon, ang namuong cloud formation sa Negros Occidental.

Ayon sa mga residente, inakala nilang tornado o ipo-ipo ang cloud formation na sinasabing posibleng magdulot ng matinding pinsala sa kanilang lugar.

Pinawi naman ng Provincial Disaster Management Program Division ng Negros Occidental, ang takot ng mga residente kung saan, normal lamang umano ang ipinapakita ng mga ulap na may kakaibang hugis sa papawirin.

Boluntaryong isinuko sa militar ng ilang magsasaka ang kanilang mga baril at mga bala sa Barangay Salag, Siaton, Negros Oriental.

Ayon sa Negros Oriental Provincial Police Office, kabilang sa mga isinukong armas sa 11th Infantry Battalion ng Phil. Army ang isang KG9 submachine gun, isang .357-caliber revolver, isang .38-caliber revolver, isang shotgun at mga bala.

Ang apat na magsasaka na hindi binanggit ang pagkakakilanlan ay sinasabing mga miyembro ng isang organisasyon na gustong maging benepisyaryo ng land reform program ng gobyerno.

Ipinagmalaki ni Vice President Sara Duterte ang ‘zero massive deployment o walang  naitalang kaguluhang naganap sa Maguindanao.

Ayon kay Duterte, na wala nang naganap na digmaan sa naturang lugar matapos pirmahan ang peace agreement sa pagitan ng Moro Islamic Liberation Front at ng Gobyerno.

Wala ring  anyang insidente ng kidnapping ng Abu Sayyaf mula noong nakaupo ang kanyang ama na si dating Pangulong Rodrigo Duterte.

Iginiit ni Duterte na kailangang panatilihin ang kapayapaan dahil posibleng mauwi ang maliit na sigalot sa digmaan. —sa panulat ni Jenn Patrolla