RONDA PROBINSYA

Nasabat ng mga otoridad ang nasa tatlong milyong pisong halaga ng shabu sa buy-bust operation sa Naga City, Camarines Sur.

Naaresto naman ang suspek na sina Nerissa Belga, 40 anyos at live-in partner nitong si Gian Carlo Banzagalez, 26 anyos, kapwa residente ng Barangay Concepcion Pequeña.

Ayon kay Senior Master Sergeant Tobias Bongon, Spokesperson ng Naga City Police, nakumpiskamula sa mga suspek ang 405 grams ng shabu na nakabalot sa packaging tape.

Nahaharap naman sila Belga at Banzagalez sa kasong paglabag sa Comprehensive Dangerous Drugs Act of 2002. —sa panulat ni Jenn Patrolla

Niyanig ng Magnitude 5.2 na lindol ang Tarlac City, bandang alas-10:30 kagabi.

Ayon sa PHIVOLCS, namataan ang sentro ng pagyanig sa layong 7 kilometers silangang ng Tarlac City, lalawigan ng Pangasinan.

May lalim ang pagyanig na 184 kilometers at tectonic ang origin o pinagmulan nito.

Naitala ang Intensity I sa Laoag City, Ilocos Norte habang Instrumental Intensity III naman sa Infanta, Pangasinan

at Intensity I sa Bani, Pangasinan at Iba, Zambales.

Wala namang naitalang nasawi o nasugatan pero asahan ang mga aftershock, matapos ang pagyanig.

Niyanig ng magnitude 4.2 na lindol ang lalawigan ng Nueva Era, Ilocos Norte dakong alas-7 kagabi.

Natukoy ang epicenter ng pagyanig sa layong 13 kilometro sa Hilagang Silangan ng Nueva Era.

Naramdaman ang lakas ng pagyanig sa intensity 4 sa Nueva Era, Ilocos Norte, intensity 3 naman sa Danglas at Lagayan sa Abra at bayan ng Banna sa Ilocos Norte.

Nasa intensity 2 naman ang Dingras, Ilocos Norte habang intensity 1 naman sa Batac City.

Naging sanhi ng paggalaw ang aktibong fault line na malapit sa lugar.—mula sa panulat ni Jenn Patrolla

Target ng Department of Education (DepEd) na maabot ang isandaang porsyentong implementasyon ng full face-to-face classes sa Zamboanga Peninsula sa November 15.

Ayon kay DepEd regional director Ruth Fuentes, nakaraang taon ng Nobyembre pa lamang nagsagawa na ng limited face-to-face classes ang 65% ng mga paaralan sa naturang lugar.

Nalinis na rin aniya ang mga paaralan na ginamit bilang evacuation centers kaya’t sisimulan na ang klase sa susunod na linggo.

Samantala, hindi na nahirapan ang DepEd sa transition lalo na sa pagpapatupad ng psychosocial at physical activities.—mula sa panulat ni Jenn Patrolla

Madaraanan na ang dalawang lane ng National Highway sa Pagudpud, Ilocos Norte matapos isara ng Department of Public Works and Highways dahil sa pagguho ng lupa.

Napinsala ang nasabing kalsada matapos ang pag-ulang dala ng mga nakaraang bagyo.

Tiniyak naman ng DPWH na may tauhan sila sa lugar para gumabay sa mga daraan.

Ang naturang kalsada ang nag-uugnay sa Ilocos Norte at Cagayan.—mula sa panulat ni Jenn Patrolla

Naka-full alert na ang Sultan Kudarat Provincial Police matapos ang pambobomba sa isang bus sa Tacurong City na ikinasawi ng isang pasahero at ikinasugat ng 11 iba pa.

Alinsunod ito sa kautusan ni PNP Chief, Gen. Rodolfo Azurin Jr. kasabay nang patuloy na pursuit operations sa mga nasa likod ng pagpapasabog.

Hinigpitan na rin ang checkpoint at pag-i-inspeksyon sa bagahe ng mga pasahero bilang bahagi ng pagtiyak sa seguridad at kaligtasan sa lalawigan.

Extortion ang tinitingnang motibo sa pambobomba habang mayroon ng person of interest ang PNP. —mula sa panulat ni Jenn Patrolla

Kinumpirma ni Provincial Veterinarian Dr. Darel Tabuada, na nagpositibo sa African Swine Fever (ASF) ang bayan ng Sta. Barbara sa probinsya ng Iloilo.

Ayon kay Tabuada, ang Sta. Barbara ang ika-5 bayan na nagpositibo sa ASF sa lalawigan kung saan, mas pinaigting na ang pagbabantay sa iba pang babuyan sa nabanggit na lugar at iba pang kalapit na bayan.

Dahil dito, nananawagan sa mga hog raiser si Tabuada, kabilang na ang mga backyard raisers na makipagtulungan sa kanila  upang agad na mapuksa ang lumalalang kaso ng ASF sa kanilang lugar.