RONDA PROBINSYA

Umabot na sa 26 ang kumpirmadong kaso ng cholera sa Negros Occidental.

Ayon kay Negros Occidental provincial health officer Dr. Ernell Tumimbang na ang pagdami ng kaso ay bunsod ng poor sanitation sa lugar.

Kaugnay nito, mino-monitor na ng awtoridad ang mga water sources sa Talisay City, Silay, EB Magalona, Victorias City at Calatrava dahil sa posibleng pagkakaroon ng kontaminasyon.

Dapat din aniyang paigtingin ang pagmo-monitor sa mga water refilling stations upang malaman kung sumailalim sa tamang treatment ang mga ibinebentang tubig sa lugar.

Una nang sinabi ng pamahalaang panlalawigan na walang naitalang kaso ng cholera sa lugar noong 2019.

Hinikayat ng Davao City LGUs ang mga residente na ipagpatuloy ang pagsusuot ng face mask sa mga Public Utility Vehicle (PUVs).

Ayon kay Dr. Michelle Schlosser, spokesperson ng COVID-19 Task Force ng lungsod, dapat mapanatili ang pagsusuot ng face mask partikular na sa mga buntis, may mga karamdaman, mga wala pang bakuna, at mga may sintomas ng nakakahawang sakit lalo na ang mga nasa high risk area.

Iginiit ng pamahalaang lokal ng lalawigan na mas maluwag na ngayon ang pagpapatupad ng health protocols kaya kailangan ng dobleng pag-iingat lalo na kung gagamit ng pampublikong transportasyon at papasok sa mga medical health facilities.

Mas mataas kasi umano ang tiyansa na mahawaan ng sakit ang isang indibidwal lalo na ang mga senior citizen kaya’t patuloy paring hinihikayat ang mga residente na magpabakuna bilang proteksiyon laban sa COVID-19.

Nanawagan sa gobyerno ang Alkalde ng Laua-an, Antique na ma-fast track o mabigyan ng pansamantalang tulay ang kanilang lalawigan makaraang masira ang dalawang tulay bunsod ng pananalasa ni Bagyong Paeng.

Ayon kay Mayor Aser Baladjay, isolated pa rin ang mga bayan sa bahagi ng Antique maging ang kalapit nilang lugar partikular na ang Iloilo City kung saan, kinukulang na ang suplay ng pagkain at langis.

Sinabi ni Baladjay na pahirapan sa pagpasok ng mga ayuda ang mga nais magbigay ng tulong bunsod ng nasirang tulay dahilan kaya hirap sa pagkuha ng mga pagkain partikular na ang bigas, langis, malinis na inuming tubig, gamot at iba pang necessities ang mga residente.

Sa ngayon, umaasa ang mga bayan sa Antique na mabibigyang pansin ang kanilang hiling na temporary bridge, bilang palit sa naputol na tulay sa kanilang lugar.

Siyam na pagyanig ang naramdaman sa paligid ng Mount Kanlaon sa Negros Island sa nakalipas na magdamag.

Ayon sa PHIVOLCS, nananatili sa ilalim ng Alert level 1 ang Bulkan.

Mahigpit pa ring ipinagbabawal ang pagpasok sa 4-kilometer radius Permanent Danger Zone.

Ipinagbabawal din ang pagpapalipad ng anumang uri ng eroplano malapit sa bulkan dahil sa banta ng pagsabog ng bulkan.

Ang Kanlaon ang pinaka-aktibong bulkan sa Visayas at patuloy na binabantayan dahil sa posibleng phreatic eruption.

Patay ang isang indibidwal habang sugatan ang sampu matapos sumabog ng isang improvised explosive device (IED) sa isang pampasaherong bus sa Tacurong City sa Sultan Kudarat.

Ayon sa ulat ng awtoridad, nangyari ang naturang pagsabog sa Park Yellow Bell bandang alas-11 ng umaga.

Nagmula naman sa Kidapawan City ang bus at patungo sana ito sa Tacurong public terminal nang maganap ang insidente.

Samantala, patuloy naman sa pag-iimbestiga ang awtoridad upang matukoy ang uri ng ginamit na eksplosibo at ang motibo sa likod ng insidente.—mula sa panulat ni Hannah Oledan

Nasawi ang isang sundalo matapos atakihin ng armadong grupo sa Datu Hoffer Ampatuan sa Maguindanao Del Sur habang dalawa naman ang sugatan.

Kinilala ang nasawing sundalo na si private first class Jomar Saladar at ang dalawang  sugatang sundalong sina Sgt. Allan Rey Estanda at private Carl Araña na isinugod na sa ospital.

Batay sa ulat ng 601st infantry brigade (IB), nagbabantay ang mga sundalo ng 40th Infantry Batallion at mga boluntaryong sibilyan sa pagsasaayos ng nasirang tulay sa barangay Labulabu II nang sumalakay ang grupo nitong Biyernes.

Kung saan umabot ng higit isang oras ang palitan ng putok bago umatras ang grupo, na sinasabing mga miyembro ng bangsamoro islamic freedom fighters, ani maj. Saber balogan ng 601st IB.

Dahil dito nagsagawa na ng pursuit operations ang militar sa kaugnay sa naganap na insidente.