RONDA PROBINSYA

Nakapagtala 24 na kumpirmadong kaso ng Cholera habang dalawa ang namatay sa Negros Occidental.

Pinakamaraming kaso ang Talisay City na sinundan naman ng mga kalapit na Bayan ng Silay at E.B Magalona na may tig limang kaso ng naturang sakit.

Dahil dito, inatasan ang mga lokal na pamahalaan na maglagay ng food and drinking water quality monitoring committees subalit sa 31 LGU’s, 11 lang ang naluklok ng mga naturang komite.

Nabatid na naitala ang pamahalaang panlalawigan ang unang kaso nito noong Enero 2022.

Samantala, binabantayan din ng lalawigan ang mga kaso ng typhoid fever.  —sa panulat ni Jenn Patrolla

Apektado ang siyam na baybaying dagat matapos magpositibo sa paralytic shellfish poison o red tide ang ilang lugar sa bansa.

kabilang sa mga lugar na ito, ayon sa Bureau of Fisheries and Aquatic Resources (BFAR) ang Bayan ng Milgaros sa Masbate kabilang ang Capiz, Roxas City, Panay, President Roxas, Pilar, Dauis at Tagbilaran City.

Kasama rin sa nag-positibo ang Lalawigan ng Zamboanga del Sur sa Dumanquillas Bay at  Lianga Bay sa Surigao del Sur.

Dahil dito, ipinagbabawal na muna na manghuli ng lamang dagat upang matiyak ang kaligtasan ng publiko. —sa panulat ni Jenn Patrolla

Nasabat ng Bureau of Customs-Port of Zamboanga ang P8-M na halaga ng smuggled na sigarilyo sa Barangay Baliwasan, Zamboanga City.

Nasamsam ng BOC ang 207 master case ng sigarilyo na may brand na Arthur sa isang puting van matapos nagsagawa ng Anti-Smuggling Operations.

Kasalukuyang nasa kustodiya na ng BOC ang sasakyan at mga master case ng sigarilyo para sa tamang imbentaryo at disposisyon.

Bukod pa rito, patuloy ang imbestigasyon ng mga otoridad at nahaharap sa kasong sa Section 1113 at Section 117 ng Republic Act no. 10863 o ang Customs Modernization and Tariff Act of 2016. —sa panulat ni Jenn Patrolla

Kinumpirma ng Department of Health (DOH) ang pagtaas ng kaso ng dengue sa lahat ng probinsya sa Central Visayas.

Sa datos ng DOH, nasa 15,636 kaso ang naitala sa Central Visayas mula Enero hanggang Oktubre ngayong taon.

Mas mataas ito ng 2,000 kumpara noong Setyembre.

Nabatid na nangunguna ang Cebu sa bilang na may higit 8,000 kaso ng naturang sakit.

Pumalo na rin sa  95 ang naitalang bilang ng nasawi sa buong rehiyon.

Samantala, sa ngayon hindi pa nagdedeklara ang Local Government Unit sa rehiyon ng outbreak dahil kontrolado pa umano ang mga kaso.  —sa panulat ni Jenn Patrolla

Tinanggal na ng Cebu Province ang vaccination card requirement para sa mga inbound passenger.
Sa isang Executive Order na nilagdaan ni governor Gwendolyn Garcia, muli nitong sinabi na ang pagluluwag ng quarantine restrictions ay alinsunod sa direktiba ni Pangulong Ferdinand Marcos Jr.
Kaugnay nito, hindi na ire-require ang mga fully vaccinated traveler na magpakita ng anumang uri ng COVID-19 test result habang ang mga hindi pa nababakunahan ay hinihikayat na magpa-rapid antigen test na valid sa loob ng 24-oras.
Binigyang-diin naman ni Garcia na opsyonal na rin ang pagsusuot ng face mask para sa lahat ng pasahero na magtutungo sa naturang lalawigan.

Nakapagtala ng 23 insidente ang pagguho ng lupa sa Cebu bunsod ng pananalasa ng Bagyong Paeng.

Ayon kay Joy Hernandez, Rehab pinuno ng Recovery section ng Office of Civil Defense sa Central Visayas, apektado ang Barangay ng Bon-bon, Kalunasan, Guba, Pung-ol, Sibugay at Busa.

Asahan pa aniya ang mas marami pang pagguho ng lupa dahil sa patuloy na pag-ulan sa lungsod.

Naglabas naman ng kautusan si Cebu City Mayor Michael Rama na itigil lahat ang Quarry Operation upang maiwasan ang pagguho ng lupa.

Samantala, halagang P277-M ang pinsala sa imprastraktura sa rehiyon ng Central Visayas dahil sa bagyo. —sa panulat ni Jenn Patrolla