RONDA PROBINSYA

Bumagsak sa kamay ng mga elemento ng PNP Criminal Investigation and Detection Group o CIDG ang isang pekeng dentista sa Laguna.

Ayon kay CIDG chief Brig. Gen. Ronald Lee, ang suspek na si Lee Francis Boneo ay nasakote sa isang entrapment operation sa Barangay Looc, Calamba City.

Nakatanggap ng impormasyon ang CIDG na nagpapatakbo ng klinika si Boneo sa Calamba River kahit na wala naman itong linsensya bilang dentista.

Mahaharap ang suspek sa reklamong paglabag sa Republic Act 9484 o Philippine Dental Act of 2007.

Nasakote ng PNP Criminal Investigation and Detection Group o CIDG ang tatlong wanted persons sa Region 4A o Calabarzon.

Ayon kay CIDG chief Brig. Gen. Ronald Lee, unang naaresto sa Barangay 7 Panungyanan, General Trias City ang construction worker na si Arnante Domingo na may dalawang counts ng kasong rape sa isang korte sa Trece Martires City.

Arestado rin si Jeffrey Moscosa sa Barangay Luzviminda 2, Dasmariñas City, Cavite na may mga kasong murder at frustrated murder sa ilang korte sa San Pedro City, Laguna at Quezon City.

Samantala, timbog naman sa Parañaque City si Rodel Ulan na wanted sa Mimaropa region dahil sa mga kasong  grave coercion, dalawang counts ng robbery, labing-isang counts ng acts of lasciviousness at labing-isang counts ng paglabag sa Anti-Child Pornography Act of 2009.

Ikinasa ang kaliwa’t kanang operasyon ng CIDG bilang bahagi ng direktiba ni PNP Chief General Rodolfo Azurin na tugisin ang mga kriminal sa iba’t ibang panig ng bansa.

Lehitimo nang landowners ang nasa siyam na pu’t siyam (99) na magsasaka sa Batangas.

Ito’y matapos igawad sa mga ito ng Department of Agrarian Reform o DAR ang kanilang electronic land titles o e-titles at certificates of land ownership award o CLOAs.

Ayon kay DAR Undersecretary for Field Operations Office Kazel Celeste, halos isang daang ektarya ng lupa (98.7) ang naipamahagi ng ahensya sa probinsya.

Ngayong hawak na nila ang titulo, nangako naman ang mga magsasaka na aalagaan at tutuparin nila ang kanilang responsibilidad at obligasyon bilang mga benepisyaryo.

Nagkasa ng operasyon ang mga tauhan ng Land Transportation Office (LTO)-Region 12 at mga kawani ng Department of Public Works and Highways  (DPWH)-Region 12, sa mga sasakyan partikular na sa mga truck na dumadaan sa Makar Highway, General Santos City.

Ayon sa ahensya, mula sa 141 na bilang ng mga sasakyang ininspeksyon at tinimbang, 82 dito ang nahuling lumabag sa batas-trapiko sa ilalim ng Republic Act No. 4136 o Land Transportation and Traffic Code.

Apat na truck naman ang lumabag sa itinakdang limitasyon ng kanilang kargang kagamitan o produkto, batay narin sa nakasaad sa Republic Act no. 8794 o ang Anti-Overloading Act.

Sinabi ng LTO, na patuloy nilang imomonitor ang mga pangunahing kalsada para maiwasan ang ibat-ibang uri ng insidente.

Naalarma ang Albay provincial government sa mga naitatalang kaso ng HFMD o Hand Foot and Mouth Disease.

Ayon kay Albay Provincial Health Officer Nathaniel Rempillo, ang munisipalidad ng Oas, Legazpi City at Guinobatan ang nakapagtala ng pinakamataas na kaso ng HFMD kung saan karamihan sa mga biktima ay mga batang may edad isa hanggang sampu.

Sinabi ni Rempillo na wala namang masamang kumplikasyon na naranasan ang mga pasyente na naaasikaso naman lahat.

Tinukoy ni Rempillo ang poor sanitation na dahilan ng outbreak kaya’t hinimok nito ang mga paaralan at komunidad na palagiang mag-disinfect sa kanilang paligid at kaagad i-isolate ang mga suspected patient.

Una nang nakapagtala ang Albay ng 541 HFMD cases simula noon pang nakalipas na buwan.