RONDA PROBINSYA

Isinailalim na sa modified enhanced community quarantine (MECQ) ang Bacolod City at buong Lanao Del Sur simula ngayong araw hanggang ika-30 ng Setyembre.

Ito ang inanunsyo ni Presidential Spokesperson Harry Roque, matapos aprubahan ni Pangulong Rodrigo duterte ang resolusyon ng Inter-Agency Task Force for the Management of Emerging Infectious Diseases hinggil dito.

Una rito, inirekomenda ni National Task Force Against COVID-19 Chief Implementer Secretary Carlito Garlvez sa kanilang pulong kay Pangulong Duterte ang pagpapatupad ng MECQ sa Bacolod at Lanao Del Sur dahil sa tumataas na kaso ng COVID-19.

Ayon kay Galvez, mismong sina lanao Del Sur Governor Mamintal Alonto Adiong Jr. at Bacolod City Mayor Evelio Leonardia ang humiling na maisalalim ang kanilang mga nasasakupan sa MECQ.

Sinabi naman ni Health Secretary Francisco Duque III na umabot sa 462 ang naitalang bagong kaso ng COVID-19 sa Bacolod City sa nakalipas lamang na apat na araw.

Sisiyasatin na rin ng National Bureau of Investigation (NBI)  ang pagkamatay ng dalawang miyembro ng pamilya Parojinog habang nakakulong.

Ayon kay Justice Secretary Menardo Guevarra, kanya nang inatasan ang NBI na magsagawa ng preliminary investigation sa ulat ng pagkamatay ni Melodia Parojinog Malingin.

Ito ay dalawang araw lamang matapos namang masawi ang kapatid nitong si dating Ozamiz City Councilor Ricardo Ardot Parojinog sa loob ng piitan.

Sinabi ni Guevarra, aalamin din ng mga operatiba ng NBI ang lagay ng kalusugan ng magkapatid bago sila namatay.

Partikular na aniya ang kondisyon ni Ardot at kung may sakit na ba ito bago inilipat ng Ozamiz.

Una nang sinabi ni Police Regional Office 10 Chief Brig. General Rolando Anduyan na nasawi si Ardot dahil sa atake sa puso at nagpositibo rin ito sa coronavirus disease 2019 (COVID-19).

Pinagkalooban ni Pangulong Rodrigo Duterte ng absolute pardon si US Marine Lance Corporal Joseph Scott Pemberton na nakapatay sa transgender woman na si Jennifer Laude noong 2014.

Ito ang kinumpirma mismo ni Presidential Spokesperson Harry Roque.

Ayon kay roque, nangangahulugan itong makalalaya na at maaari nang makauwi ng Estados Unidos si Pemberton.

Mabubura na rin aniya ng ibinigay na absolute pardon ni Pangulong Duterte kay Pemberton ang isyu sa maaga sanang pagpapalaya kay Pemberton sa pamamagitan ng Good Conduct Time Allowance (GCTA).

Sinabi naman ni Roque na wala nang dapat ipaliwanag si Pangulong Duterte sa pagbibigay ng pardon dahil prerogative na ito ng lahat ng presidente ng Pilipinas.

Kaugnay nito, iginiit naman ni Roque na tanging hindi nabura ng ibinigay na pardon kay Pemberton ang katotohanang nahatulan ito dahil sa pagpatay kay Laude.

Kinumpirma ni Pnp Chief P/Gen. Camilo Cascolan na pumanaw na rin ang babaeng kapatid ng yumaong dating Misamis Occ. Provincial Board Member Ricardo “Ardot: Parojinog.

Sa kauna-unahan niyang press conference bilang PNP chief, sinabi ni Cascolan na sumakabilang buhay ang kapatid ni Ardot na si Melodia “Apyat” Parojinog – malingin kahapon sa Mayor Hilarion Ramiro Sr. Medical Center sa Ozamis City.

Nabatid ng PNP na nasawi si Apyat sanhi ng cardiogenic shock o kumplkasyon sa puso dahil hindi na kinakaya ang dugo na tinatanggap nito.

Si melodia na kapwa akusado ni ardot sa kasong paglabag sa republic act 9165 o comprehensive dangerous drugs act of 2002 at Republic Act 10591 o illegal possession of firearms and ammunitions ay nakadetene din sa Ozamis City Police Station.

Kasama nitong nililitis at nakapiit ang asawang si Gaudencio malingin na nakuhanan ng 8 kilo ng shabu nuong Disyembre a-6 2017.

Samantala, inihayag din ni cascolan na hawak na ng pamilya ni Ardot ang labi nito na pinaniniwalaang isinailalim na rin sa cremation matapos masuri ng PNP forensic examiners. —ulat mula kay Jaymark Dagala (Patrol 9)

Pormal nang sinampahan ng kasong administratibo ng PNP Internal Affairs Service (IAS) ang siyam na pulis na nakapatay sa apat na sundalo sa Jolo, Sulu noong Hunyo.

Ayon kay PNP Chief Police General Camilo Cascolan, kabilang sa mga kinasuhan sina Police Senior Master Sgt. Aldelzhimar Padjiri, Master Sgt. Hannie Badiri, Staff Sergeant Iskandar Susulan, Corporal Suki, Andaki, Staff Sgt. Alumudzrin Hadjaruddin.

Gayundin sina Patrolman Moh. Nur Pasani, Alkajal Mandanag at Rajiv Patulan.

Sinabi ni Cascolan, maliban sa nabanggit na siyam na mga pulis, sabit din aniya sa kaso ang tatlong immediate superior ng mga ito na sina Sulu Provincial Dir. Police Lt. Col. Michael Bayawan, Jolo Municipal Station Chief Of Police Major Walter Annayo at Jolo Drug Enforcement Unit Chief Capt. Ariel Corcino.

Dagdag ni Cascolan, ipinatawag na sa Kampo Krame ang naturang tatlong police officers na posibleng sibakin din sa puwesto.

Una na ring sinampahan ng apat na bilang ng murder at pagtatanim ng ebidensiya ang siyam na pulis sa Jolo, Sulu. —ulat mula kay Jaymark Dagala (Patrol 9)

Tinamaan ng coronavirus disease 2019 (COVID-19) si Sorsogon Second District Rep. Ditas Ramos.

Ayon kay House Secretary General Jose Luis Montales, nakaranas ng mga sintomas ng virus si Ramos at nagpositibo sa isinagawang test sa kanya sa kanilang lalawigan.

Patuloy na nagpapagaling ngayon si Ramos habang walang tigil ang contact tracing na ginagawa sa mga nakasalamuha ng kongresista.

Sumakabilang-buhay na si Mayor Marlon Garcia ng bayan ng Barili sa Cebu.

Ito ang inanunsiyo ni dating Government Service Insurance System (GSIS) chief Winston Garcia sa isang post sa Facebook.

Sina Winston at Marlon ay kapatid ni incumbent Cebu Governor Gwendolyn Garcia.

Noong nakaraang linggo lamang ay pumanaw din ang kanilang kapatid na si dating Dumanjug Mayor Nelson Garcia.

Samantala, nagpaabot naman si PCOO Secretary Martin Andanar ng kanyang pakikiramay sa pamilya ng yumaong miyembro ng Garcia clan.