RONDA PROBINSYA

Kinuwestyon ng Commission on Audit (COA) ang iba’t-ibang teknikalidad sa konstruksyon ng Kaliwa Dam Project kabilang ang umano’y kaduda-dudang pagsang-ayon ng mga katutubo at Indigenous People sa lalawigan ng Quezon.

Sa inisyung 2019 annual audit report para sa Metropolitan Waterworks and Sewerage System (MWSS), kinuwestyon ng COA ang pag-iisyu ng MWSS ng notice to proceed para sa detailed engineering, design at konstruksyon ng proyektong iginawad sa China Energy Engineering Company, Inc. (CEEC).

The expropriation of lots particularly for the right of way affected by Kaliwa Dam Project is still pending, hence considered a ground for the termination of the contract under Section 17.6 of the Revised Implementing Rules and Regulations of the Republic Act 9184 also known as the Government Procurement Reform Law,” pahayag ng COA.

Binigyang diin ng state auditors na kailangang manaig ang mga probisyon ng Republic Act 9184 o government procurement reform law dahil ang kontrata sa pagitan ng MWSS at CEEC ay hindi saklaw ng anumang tratado.

Nakasaad sa R.A. 9184 na ang NTP ay kailangang ipalabas, pitong araw mula sa petsa ng pag-apruba sa kontrata at matapos itong tanggapin ng contractor na itinuturing nang nakasunod sa lahat ng requirements na itinatakda ng loan agreement.

Ang naturang commercial contract ay itinuturing na walang bisa dahil hindi nasunod ang mga requirements.

Samantala, hindi pa rin nasusunod ang mga kondisyon para sa issuance ng Environmental Compliance Certificate kaya’t hindi maipapatupad ang proyekto.

Kabilang sa mga kondisyon ng ECC ang pag-isyu ng certificate of precondition matapos ang free and prior informed consent mula sa mga katutubo at indigenous people na mawawalan ng tirahan at labis na maaapektuhan ng proyekto sa mga lalawigan ng Rizal at Quezon.

Napuna rin ng COA examiners na hindi binanggit sa resolusyon ng pagpayag na inisyu ng Dumagat/Remontado tribe ng General Nakar, Quezon ang pangalan ng tribal leaders at elders na magpapatotoo sa pagkakakilanlan ng IP members na pumirma sa resolusyon.

Within these groups include residents who argued that they were neither consulted nor informed on the implementation  of the project,” sabi pa ng COA.

Isasara na rin sa darating na undas ang mga sementeryo sa Madaluyong City at Angeles City sa Pampanga.

Ito ay bilang bahagi ng mga ipinatutupad na preventive measures ng dalawang lokal na pamahalaan sa gitna ng coronavirus disease 2019 (COVID-19) pandemic.

Ayon sa Mandaluyong Public Information Office, asahan na ngayong linggo ang ipalalabas na Executive Order ni Mayor Menchie Abalos hinggil sa pansamantalang pagsasara ng mga sementeryo sa lungsod mula October 30 hanggang November 2.

Kabilang sa mga maaapektuhan nito ang San Felipe Neri Catholic Cemetery, Paradise Park at Garden of Life Cemeteries.

Samantala, nakasaad naman sa ipinalabas na Executive Order Number 19 ni Angeles City Mayor Carmelo Lazatin Jr., isasara rin mula October 30 hanggang November 2 ang mga sementeryo sa lungsod.

Sinabi ni Lazatin, bagama’t nirerespeto ng lokal na pamahalaan ang tradisyun ng mga Filipino na pag-alala sa mga yumaong mahal sa buhay, kinakailangan aniya maunawaan ng kanyang mga nasasakupan ang banta ng panganib dulot ng COVID-19.

Una nang ipinag-utos ni Manila City Mayor Isko Moreno ang pagsasara ng mga sementeryo sa lungsod simula October 31 hanggang November 31.

Muling niyanig ng magnitude 6.3 na lindol ang Sarangani sa Davao Occidental kaninang alas-3:18 ng hapon.

Ilang oras lamang ito matapos maramdaman ang naunang 5.7 na lindol pasado alas-11 kaninang umaga.

Ayon sa Phivolcs, natukoy ang epicenter ng pinakahuling pagyanig sa layong 159 na kilometro timog-silangan ng Sarangani.

May lalim itong 73 kilometro at tectonic ang pinagmulan.

Sinabi ng Phivolcs, inaasahang magdudulot ng pinsala sa mga ari-arian ang pagyanig gayundin ng mga aftershocks.

Niyanig ng magnitude 5.7 na lindol ang Sarangani Davao Occidental pasado ala-11:41 kaninang umaga.

Ayon sa Phivolcs, natunton ang epicenter ng pagyanig sa layong 208  kilometro timog-silangan ng Sarangani.

May lalim itong 45  kilometro at tectonic anng pinagmulan.

Sinabi ng Phivolcs, hindi naman inaasahang magdudulot ito ng pinsala bagama’t posibleng magkaroon ng mga aftershocks.

Tinatayang P148 million pesos na halaga ng smuggled products ang nasabat ng mga ortoridad sa Port of Cebu.

Ang mga nakumpiskang item ay pawang undeclared, misdeclared at undervalued na kargamento na kinabibilangan ng bigas, used engines, hotel sundries at sigarilyo.

Ayon kay Atty. Charlito Martin Mendoza, acting district collector ng Port of Cebu nadiskubre ang kargamento matapos ang mahigpit na inspeksyon ng Customs Intelligence and Investigation service, Enforcement and Security service, X-Ray Inspection Project Team at Assessment Division.

Patay ang limang hinihinalang miyembro ng isang lokal na grupo ng mga terorista sa engkwentro Sa Zamboanga Sibugay.

Batay sa ulat, nagsasagawa ng security operations ang tropa ng 44^th Infantry Battalion at Zamboanga Sibugay Provincial Police Office nang makasagupa ang tinatayang nasa 10 local terrorist sa Sitio Limuno, Barangay Roxas, bayan ng R.T Lim.

Ayon kay 102^nd Infantry Brigade Commander Brig. General Leonel Nicolas, dalawa sa tropa ng pamahalaan ang sugatan sa engkuwentro na agad naman aniyang isinugod sa pagamutan at nasa stable nang kondisyon.

Samantala, narekober sa lugar ng engkuwentro ang tatlong M-16 at isang M-14 rifle.