RONDA PROBINSYA

Patay sa operasyon ng militar ang top 5 wanted person sa Lanao Del Sur.

Kinilala ni Lt. Gen. Corleto Vinluan, Jr., commander ng Western Mindanao Command, ang suspek na si Sampiano Deniega na dawit sa multiple murders, drug trafficking at extortion.

Sinabi ni Vinluan na napilitan ang mga otoridad na putukan si Deniega, alias “Nonoy” dahil sa pagtanggi nito sa pag-aresto sa kaniya.

Tinangka pa aniya ni Deniega na tumakas kasama ang dalawang kasamahan bago pinaputukan ang mga otoridad subalit hinabol sila hanggang masukol ng mga sundalo bagamat tagumpay na nakatakas ang dalawang iba pa.

Si Deniega ay isinugod sa Dr. Serapio Montanier Hospital sa malabang subalit idineklarang dead-on-arrival.

Narekober ng mga otoridad sa suspek ang isang 38 caliber na may mga bala, granada at dalawang sachets ng hinihinalang shabu.

Sapat ang karneng baboy sa Region 12 (SOCCSKSARGEN) kahit pa mag-angkat nito ang Luzon.

Tiniyak ito ni Department of Agriculture Region 12 Director Arlan Mangelen matapos nilang simulang magpadala ng baboy sa Luzon na kinukulang na ng suplay nito.

Ayon kay Mangelen, malaking bentahe ang pagiging African Swine Fever (ASF)-free ng kanilang rehiyon kaya’t sa kanila kumukuha ng suplay ng karneng baboy ang Luzon.

Kaugnay pa nito, ipinabatid ni Mangelen na 20,000 baboy pa ang ipapadala nila sa Luzon sa susunod na dalawang buwan para makatulong na mapababa ang presyo ng karneng baboy.

Patuloy ang pag-akyat ng kaso ng coronavirus disease 2019 (COVID-19) sa Central Visayas.

Ito, ayon kay Professor Guido David ng OCTA Research team, ang napansin nila simula pa lamang ng ikalawang linggo ng Enero.

Sinabi pa sa DWIZ ni David na Cebu City ang nakakapagtala ng pinakamataas na kaso ng COVID-19 na ngayo’y nasa mahigit 100 kaso na ng nasabing sakit.

Matagal na nating nakikita ‘yan noon una pa lang, noong January pa lang, narecord na natin ‘yan, patuloy pa rin ang pagtaas ng bilang ng kaso. Kasi galing ng holiday, December, sa Cebu City, mababa lang ‘yung bilang ng kaso, ito ‘yung mga new cases per day, so, parang less than 10 lang sila, 10 cases per day. Ngayon 130 cases ‘yung average nila, atyaka pataas nang pataas, kaya nakakapangamba ‘yon,” ani David. —sa panayam ng IZ sa Alas Sais

Nagpositibo sa coronavirus disease 2019 (COVID-19) si Kalinga Governor Ferdinand Tubban.

Naka-isolate na sa isang ospital si Tubban na, ayon sa mga otoridad ay walang travel history sa labas ng provincial hall.

Dahil dito, umaapela si Tubban sa lahat ng mga nakasalamuha niya na i-monitor ang kanilang mga sarili sa posibleng sintomas ng COVID-19.

Ang provincial hall ng Kalinga ay nasa bayan ng Tabuk na nasa isalalim ng enhanced community quarantine hanggang sa ika-15 ng Pebrero.

Isinailalim sa state of calamity ang higit sa 60 na mga barangay sa Bayambang sa Pangasinan matapos na umatake sa taniman ng sibuyas ang mga armyworms o mas kilala sa tawag na harabas.

Ayon sa mga magsasaka, hindi na mapakinabangan pa ang nasa 1,500 hectares ng taniman ng sibuyas dahil anila’y pamiminsala ng mga peste ng taniman.

Dahil dito, gagamitin ng lokal na pamahalaan kanilang calamity fund para matulungan ang higit sa 1,400 na mga magsasakang naapektuhan ang mga pananim na sibuyas.

Bago nito, taong 2016 napabalita na ring naminsala ang mga harabas sa ekta-ektaryang taniman ng sibuyas sa probinsya.