RONDA PROBINSYA

Umabot na sa 335 ang karagdagang COVID-19 cases sa Davao Region sa nakalipas lamang na 24 oras.

Kumpara ito sa 152 cases na naitala noong Martes ng hapon.

Ayon sa Department of Health-Region 11, October 21 pa noong huling makapagtala ng mahigit tatlundaang kaso sa isang araw ang rehiyon.

Inihayag naman ni Interior and Local Government Regional Director Alex Roldan na pinaghahandaan na ng mga otoridad sa Davao ang posibleng pagsipa ng COVID-19 cases, partikular ang Omicron variant.

Magugunitang kabilang ang Davao City sa mga pinaka-bagong lugar na isasailalim ng Inter-Agency Task Force sa Alert level 3 simula bukas.

Aabot na sa 811 ang active COVID-19 cases sa nabanggit na Lungsod.

Arestado ang 4 na Drug personalities matapos mahulihan ng mahigit P200K  halaga ng shabu sa Malabon City.

Kinilala ang mga suspek na sina Christopher Villagracia, Ronald Piloneo, kapwa 34- anyos, Roldan Jakosalem alyas Jay-R, 21-anyos at Leo Sabordo, 47- anyos.

Ayon sa Malabon City Police, nasamsam sa 4 ang nasa 34 na gramo ng shabu na nagkakahalaga ng P231,200 at marked money.

Nahaharap ang mga suspek sa kasong paglabag sa Comprehensive Dangerous Drug Act of 2002.   —sa panulat ni Mara Valle

Dalawa umanong tulak ng droga ang kalaboso matapos mahulihan ng mahigit P100K halaga ng shabu sa Cabuyao city, Laguna.

Kinilala ng Laguna Provincial Police Office ang mga suspek na sina Mark Nathaniel Baldo at Josie Corales.

Narekober sa dalawa ang apat na plastic sachet ng shabu na tumitimbang ng 16 na gramo.

Nakumpiska rin sa kanila ang isang motorsiklo na pinaniniwalaang ginagamit sa iligal na transaksyon.

Nahaharap ang dalawa sa kasong pagpalabag sa Comprehensive Dangerous Drug Act of 2002.  —sa panulat ni Mara Valle

Arestado sa magkakahiwalay na operasyon sa Pampanga at Rizal ang 4 na Most Wanted Person sa Zambales.

Ayon kay Zambales Provincial Police Director, Col. Fitz Macariola, unang nadakip sa Lungsod ng San Fernando, Pampanga si Ronald sabado na 7 taon nang nagtatago dahil sa kasong carnapping.

Nasakote naman ng pulisya sa Barangay Sta. Cruz, Antipolo City, Rizal si Shiela Marie Martin na nahaharap sa 4 na counts ng Estafa.

Nalambat din sina Timothy Joseph Lubong para sa kasong Serious Physical Injuries at Maria Lowhela Ednalan para sa kasong pagnanakaw.   —sa panulat ni Mara Valle

Patay ang isang miyembro ng Communist Party of the Philippines – New People’s Army (CPP-NPA) matapos maka-engkwentro ng militar sa bayan ng Amai Manabilang, Lanao del Sur.

Ayon kay Maj. Alex Mindalano, Tagapagsalita ng AFP- Eastern Mindanao coMmand (AFP) Eastmincom, nasa gitna ng operasyon ang 1st Special Forces Battalion nang makasagupa ang nasa 50 rebelde.

Tumagal anya ng 3 oras ang bakbakan na nagresulta sa pagkasawi ng isang miyembro ng CPP-NPA.

Narekober sa encounter site ang isang M60 machine gun, M4, M16, M14 at M1 grand rifles at iba pang materials.

Samantala, nanawagan naman si AFP Eastmincom Commander, Lt. Gen. Greg Almerol sa mga nalalabing rebelde na magbalik-loob at tanggapin na ang alok na tulong ng gobyerno.  —sa panulat ni Mara Valle

Sa kabila ng umiiral na COMELEC Gun Ban, patay ang isang dating Radio Commentator at kandidato sa pagka-Konsehal sa Tacurong City, Sultan Kudarat matapos barilin ng mga hindi pa nakilalang riding-in-tandem.

Kinilala ang biktimang si Jaynard Angeles, 36-anyos at dating Station Manager ng Radyo ni Juan 88.3 FM.

Ayon kay Tacurong Information Officer Allan Freno, dakong alas-10 kahapon ng umaga nang barilin sa ulo ang biktima habang nasa auto repair shop sa Purok Sampaguita, Barangay New Carmen.

Bukod sa pulitika, iniimbestigahan na rin kung may kaugnayan ang krimen sa dating trabaho ni Angeles bilang isang hard-hitting radio commentator.   —sa panulat ni Mara Valle

Siyam ang patay sa pagbaligtad ng isang Elf truck sa bayan ng Balingasag, Misamis Oriental.

Patungo sanang Del Carmen Resort sa Bayan ng Lagonglong ang truck na may lulang 43 pasahero nang maganap ang aksidente sa Sitio Bagaay, barangay Baliwagan, kahapon.

Ayon kay barangay Baliwagan Kagawad Jojo Dalman, pawang mga barangay worker mula sa Aposkahoy, sa bayan ng Claveria ang mga biktima.

Inihayag naman ni Lt. Col. Michelle Olaivar, Spokesperson ng northern Mindanao Police na nawalan umano ng control sa manibela ang truck driver batay sa pahayag ng mga survivor.

Nagsasagawa na ng imbestigasyon ang mga otoridad sa aksidente.

Naka-lockdown na ang Munisipyo ng Bayan ng Camalig, Albay makaraang mag-positibo sa COVID-19 ang 28 nitong empleyado.

Kinumpirma ni Mayor Carlos Irwin Baldo na matapos ang isinagawang mas Antigen test sa 400 personnel, agad ipinasara ang gusali simula kahapon.

Ayon kay Baldo, nagkasakit kahapon ang isang empleyado sa one-stop-shop licensing activity at nagkaroon ng close contact sa iba pang personnel kaya’t ipinag-utos niya ang pagsasagawa ng test.

Ang mga nag-positibo ay sasailalim pa sa RT-PCR test upang maberipika kung dulot ng COVID-19 ang kanilang sakit.

Tiniyak naman ng Alkalde na magbabalik ang kanilang operasyon sa oras na matapos ang quarantine at RT-PCR test ng mga empleyadong nagkasakit.

Samantala, kanselado rin ang vaccination at tanging ang Municipal Disaster Risk Reduction Council ng Camalig ang nananatiling operational.

Asahan parin ang maulap na kalangitan na may kalat-kalat na pag ulan mula sa Batanes hanggang sa Quezon dulot parin ng northeast Moonsoon o hanging Amihan.

Asahan naman ang maaliwalas ang panahon sa National Capital Region (NCR) kung makaranas man ng pag ulan ay dulot pa rin ng Amihan.

Habang sa southern part ng Eastern Visayas magiging maulap na may mahinang pag-ulan at maulap na may kalat-kalat na pagkulog at pagkidlat CARAGA at Davao Region.

Sa natitirang bahagi ng Visayas at Mindanao maaliwalas ang panahon ngunit makakaranas ng pulo pulong pag-ulan , pagkidlat at pagkulog.

Sisikat naman ang haring araw mamayang 6:11 ng umaga.