Patay matapos pagbabarilin ang isang Opisyal ng Barangay sa bayan ng Lagangilang, Abra.
Ayon sa mga otoridad, pauwi na sana ang 36-anyos na Barangay Treasurer sakay ng isang tricycle nang pagbabarilin ng hindi pa nakikilalang salarin na sakay ng isang motorsiklo.
Dead on arrival sa ospital ang biktima habang sugatan naman ang driver nito.
Patuloy pang iniimbestigahan ng mga otoridad ang pangalan o pagkakakilanlan sa mga suspek maging ang motibo sa krimen. —sa panulat ni Angelica Doctolero
Nagbigti ang isang matanda sa Tuguegarao matapos pagbawalan ng kaniyang anak na lumabas ng bahay.
Ito ay sa kabila ng pag-iingat ng kanyang mga anak sa 84-anyos na matanda na hindi matamaan ng COVID-19.
Ayon kay P/LT. Rosemari Taguiam ng PNP Tuguegarao, itinali ng biktima ang kanyang leeg at ang kabilang dulo sa kanilang kama at tumalon sa bintana.
Nabanggit naman ng misis ng biktima na bago ang insidente nagsabi umano ito na wala ng silbing mabuhay pa, dahil sa hindi siya pinapayagan ng kanyang anak na lumabas ng bahay. —sa panulat ni Mara Valle
Kalaboso ang isang Lola at kasama nitong lalaki matapos mahulihan ng nasa P220K na halaga ng shabu sa ikinasang buy-bust operation sa Bulacan.
Kinilala ang mga suspek na sina si Angelita Ramos alyas ’Lita’, 70-anyos at Emmanuel Encio alyas ‘Rocky’, 46-anyos.
Nasabat ng mga pulis kina Lola Lita ang tatlong pakete ng shabu na tumitimbang ng 32.7 grams.
Kinumpirma naman ng pulisya na dati nang nakulong si Ramos pero hindi pa rin tumigil sa iligal na aktibidad kung saan kasabwat pa nito si Encio. —sa panulat ni Mara Valle
Bistado ang limang pakete ng shabu na itinago sa mga saging na ipupuslit sana sa Davao City Jail.
Ayon sa mga Otoridad, pasado alas-3 ng hapon nang madiskubre ang mga iligal na droga sa pag-iinspeksyon ng mga Jail Guard.
Nagkakahalaga ng P45K ang narekober na shabu na tumitimbang ng 3 gramo.
Inaalam pa kung sino ang nag-iwan ng mga droga at saging sa kulungan at kung sino ang pagbibigyan sana nito. —sa panulat ni Mara Valle
Patay ang isang kawani ng Philippine Coast Guard (PCG) makaraang barilin sa Sual, Pangasinan.
Kinilala ang biktima na si PCG Apprentice Seaman Angelo Martinez, 23-anyos.
Ayon sa Coast Guard, nag-usap pa si Martinez at ang salarin, bago barilin si Martinez sa bibig at bumulagta sa kanyang motorsiklo.
Narekober sa Crime Scene ang dalawang basyo ng Cal.9 mm pistol.
Sinubukan pang dalhin sa pagamutan si Martinez pero agad din itong binawian ng buhay. —sa panulat ni Mara Valle
Sugatan ang tatlong residente ng Maragondon, Cavite matapos pagbabarilin ng mga pulis sa kalagitnaan ng demolisyon sa Patungan Cove, Barangay Sta. Mercedes.
Ayon kay Charm Maranan, Tagapagsalita ng Defend Southern Tagalog, tinamaan sa bandang tiyan ang mga hindi pinangalanang biktima dahil sa pagpigil sa demolisyon sa kanilang mga bahay sa tabing-dagat.
Iginiit naman ng Cavite Provincial Police na sumusunod lamang sila sa utos upang ma-kontrol ang sitwasyon.
Ang nasabing lugar ay planong pagtayuan ng hotel at resort ng Manila Southcoast Development Corporation, na pag-aari ni yumaong Business Tycoon Henry Sy. —sa panulat ni Mara Valle
Natiklo ang isang babae matapos mahuling nagbebenta ng mga pekeng Vaccination card sa Santiago City, Isabela.
Kinilala ang suspek na si Joan Dariano, 31- anyos.
Ayon sa pulisya, mayroon umanong pekeng pirma ng mga lokal na opisyal ang card na ibinibenta ng P100 kada isa sa loob ng palengke.
Bagaman itinanggi ni Dariano ang paratang, nahaharap pa rin siya sa kasong paglabag sa Article 170 ng Revised Penal Code o Falsification of Public Document. —sa panulat ni Mara Valle
Timbog ang numero unong Drug Personality sa Negros Occidental sa buy-bust operation kung saan nasabat mula sa kanya ang nasa P10.2M na halaga ng shabu sa barangay Guadalupe, San Carlos City.
Kinilala ang suspek na si Joel Rizardo, 24-anyos, residente ng Greenville Bato, Barangay Rizal at isang high-value individual.
Nakatakas naman ang kanyang live-in partner na si Jean Compacion, na residente ng Hacienda San Jose, Barangay Guadalupe.
Ayon kay San Carlos City Police Chief, Lt. Col. Jesus Mesajon, ilang buwang binantayan ng mga otoridad ang aktibidad ni Rizardo bago ito inaresto.
Walong plastic sachet na may iba’t ibang sukat at naglalaman ng shabu na tumitimbang ng isa’t kalahating kilo ang narekober mula sa suspek.
Samantala, napag-alaman din ng pulisya na pagmamay-ari umano ng tiyuhin ni Compacion ang bahay kung saan naganap ang buy-bust operation at illegal drug transactions.
Patay ang 31 anyos na rider matapos bumangga ang minamanehong motorsiklo sa isang sasakyan sa Cotabato.
Kinilala ang biktima na si Sambrod Guintawan.
Batay sa imbestigasyon, tumilapon ang biktima nang sumalpok ang sinasakyang motor sa kasalubong na kotse sa Barangay Poblacion, Pikit.
Nagtamo si Guintawan ng bali at sugat sa iba’t-ibang parte ng katawan dahilan ng kaniyang agarang pagkamatay.
Samantala, patuloy ang imbestigasyon ng otoridad sa naturang insidente. —sa panulat ni Airiam Sancho
Nakapagtala ng matinding pagtaas ng COVID-19 sa ilang probinsiya sa mga nakalipas na linggo.
Umabot sa 13,263 ang naitalang aktibong kaso ng COVID-19 sa lalawigan ng Cavite habang 10,859 naman ang aktibong kaso sa probinsiya ng Rizal.
Nakapagtala naman ng 9,766 active cases sa Bulacan kung saan mula sa 190 panibagong kaso umabot ito sa 2,065 cases nitong Enero 10.
Sa bataan naman, nakapagtala ito ng 276 na bagong kaso na umakyat sa 30,933 ang kabuuang kaso sa lalawigan.
Samantala, 28 lugar pa ang inilagay ng Inter Agency Task Force (IATF) sa ilalim ng alert level 3 dahil sa pagsirit ng kaso ng COVID-19 sa bansa.