Dinagsa ng mga deboto ang prusisyon ng Pilgrim Image ng Santo Niño sa Cebu.
Subalit dahil sa pagtaas ng kaso ng COVID-19 sanhi ng Omicron variant, isinagawa na lamang ang isang mobile procession ng banal na imahen.
Mula sa Cebu City, dumaan ang pilgrim image sa mga lungsod ng Talisay, Mandaue, at Lapu-Lapu.
Ipinagpapasalamat naman ng ilang mga deboto ng Santo Niño ang kanilang kaligtasan kahit nasira ang kanilang mga bahay dahil sa nagdaang bagyo. —sa panulat ni Airiam Sancho
Naabo ang 23 bahay matapos sumiklab ang sunog sa bahagi ng Bolton bridge sa Davao City.
Ayon sa mga tauhan ng Bucana Fire Station, mabilis kumalat ang apoy dahil karamihan sa mga bahay na tinamaan ng sunog ay gawa umano sa light materials.
Isa sa mga tinitignan ng mga otoridad na posibleng sanhi ng sunog ang faulty wiring sa bahay ng isang residente sa barangay 76-A.
Wala namang naitalang nasawi o nasugatan sa naganap na sunog. –Sa panulat ni Angelica Doctolero
Patay sa pamamaril ang dating manager ng isang radio station matapos pagbabarilin ng dalawang hindi pa nakikilalang mga suspek sa Park Sampaguita sa brgy. New Carmen sa gitna ng pinaiiral na total gun ban ng Commission on Elections (Comelec).
Kinilala ang bikitima na si Jaynard Angeles, 36-anyos na dating manager ng isang radio station at isang political aspirant na kumakandidato sa ilalim ng partido ni presidential aspirant Ferdinand “Bongbong” Marcos Jr. na miyembro ng Partido Federal ng Pilipinas.
Sa inisyal na imbestigasyon, tinambangan si Angeles sa loob ng kanya kotse sa harap ng Falle Auto Repair Shop sa Purok Sampaguita, barangay New Carmen sa nabanggit na lugar.
Ayon sa SOCCSKSARGEN Police Regional Office, kanilang pang inaalam kung ang pagpatay sa biktima ay may kinalaman sa kaniyang pagtakbo o mayroong nakaalitan sa kaniyang katrabaho.
Samantala, tiniyak naman ni Presidential Task Force on Media Security Usec. Joel Egco na kanilang tututukan ang naganap na pagpatay sa isa na namang kasapi ng media. –Sa panulat ni Angelica Doctolero
Patay ang isang MMDA rescuer makaraang pagbabarilin ng isang tricycle driver sa barangay San Roque, Angat sa Bulacan.
Base sa imbestigasyon ng mga otoridad, nagkaroon ng mainitang pagtatalo matapos sitahin ng biktima ang suspek na si Marlon Binavice, 42-anyos sa isang parking area sa nabanggit na lugar.
Ayon sa mga pulis, napikon si Binavice kayat umalis ito pero agad ding bumalik dala ang isang baril saka pinagbabaril ang biktima na nagawa pang isugod sa ospital pero idineklarang dead-on-arrival.
Mabilis namang nakatakas ang suspek pero agad din itong nahuli ng mga otoridad matapos makorner sa ikinasang operasyon ng kung saan, narekober sa kanyang pag-iingat ang isang caliber 38 revolver na may limang bala at ang traysikel na ginamit sa pagtakas.
Nahaharap ngayon sa kasong murder at violation of omnibus election code ang suspek. –Sa panulat ni Angelica Doctolero
Kalaboso ang isang lalaki matapos makuhanan ng hindi lisensyadong baril sa Nueva Ecija.
Kinilala ang violator na si Percival Miranda, 57 anyos, na unang lumabag sa gun ban sa lalawigan sa ilalim ng election period.
Batay sa ulat, pinahinto si Miranda ng mga operatiba sa isang checkpoint sa Barangay Poblacion East nang sumailalim sa pagbubusisi nakuha sa kanya ang isang .45 caliber pistol.
Nabigo naman na magpakita ng Certificate of Authority to Carry a Firearm ang violator sanhi upang siya ay hulihin at kumpiskahin ang kanyang dalang baril.
Sinampahan na si Miranda ng kasong paglabag sa COMELEC gun ban at Comprehensive Law of Firearms and Ammunition Regulation Act. —sa panulat ni Kim Gomez
Kalaboso ang tatlong tulak ng droga sa isinagawang buy-bust operation sa Pampanga.
Kinilala ang mga suspek na sina Orlando Cortez, Rosa Linda Dion at Alvin Cortez; pawang mga residente ng Xevera Subdivision, Mabalacat City.
Nakuha sa mga suspek ang tatlong medium size plastic na naglalaman ng 259 na gramo ng shabu na nagkakahalaga ng 1.7 milyong piso, isang cellphone, BDO passbook, kulay pulang Toyota vios at mga drug paraphernalia.
Nakatakdang sampahan ng kaso ang mga nadakip na suspek. —sa panulat ni Kim Gomez
Arestado ang dalawang lalaki, kabilang ang isang nagpakilalang aktor, matapos umanong mahuling nagbebenta ng COVID-19 antigen test kits sa Barangay Socorro, Quezon City.
Kinilala ang mga suspek na sina Harold Lo, 26 taong gulang, at Henry Lo, 56 taong gulang, na sinasabing nagpakilalang bit player o extra sa teleserye na “Ang Probinsyano.”
Nasabat mula kay Lo ang limampung kahon ng antigen test kits na nagkakahalaga ng 200,000 piso.
Sasampahan ang mga suspek ng reklamong paglabag sa Republic Act 9711 o Food and Drug Administration Act.
Patay ang apat na suspek sa pambobomba sa isang bus sa Aleosan, North Cotabato matapos umanong manlaban sa mga sundalo sa bayan ng Carmen.
Kinilala ang tatlo sa mga nasawi na sina Dawlah Islamiya terrorist group leader Norodin Hassan, Abdonilla Hassan at Abdunha Hassan.
Ayon kay Maj. Gen. Juvymax Uy, kumander ng 6th Infantry Division at Joint Task Force Central, kumpirmadong ang grupo ni Hassan ang sangkot sa pagpapasabog at panununog ng isang yunit ng Mindanao Star Bus.
Binabaybay ng bus ang Cotabato-Davao Highway sa Barangay San Mateo nang biglang sumabog ang bomba sa loob nito na ikinasawi ng isang bata at ikinasawi ng anim na iba pa.
Pangingikil ang sinasabing ugat sa naturang pambobomba.
Arestado ang apat na katao sa isinagawang buy-bust operation sa Navotas City.
Kinilala ang mga suspek na sina John Mervin Luchico alyas Nog-Nog, 30 anyos, Rommel Tablan, 24 anyos, Fe Ramirez, 63 anyos, at Ruben Cañeda, 54.
Nasamsam sa mga suspek ang 30.2 gramo ng shabu na katumbas sa mahigit dalawang milyong pisong halaga.
Nakatakdang sampahan ng kaso ang mga nadakip na suspek. —sa panulat ni Kim Gomez
Nasabat ng mga pulis ang 680,000 pisong halaga ng shabu mula sa dalawang suspek sa ikinasang buy-bust operation sa Caloocan City.
Arestado sina Marlon Mendoza, 25 anyos; at Paul Romeo Llacer, 26 anyos.
Nakumpiska sa mga suspek ang mahigit 100 gramo ng shabu; 7,500 buy-bust money, isang sachet na may hindi pa matukoy na halaga ng white crystalline substance, isang black belt bag, at isang motorsiklo.
Sina Mendoza at Llacer, ay sasampahan ng kasong paglabag sa Republic Act 9165 o Comprehensive Dangerous Drugs Act of 2002. —sa panulat ni Kim Gomez