Patay ang isang lola matapos makulong sa nasusunog niyang bahay sa bayan ng Sigma, Capiz.
Kinilala ang biktimang si Remedios Abal, 91 anyos.
Ayon sa Sigma Municipal Police, nag-iisa lamang ang biktima sa kanyang bahay at bago matulog ay nagsisindi ng kandila para magdasal.
Posibleng nakalimutan ng matanda na patayin ang kandila at natumba ito kaya’t kumalat ang apoy.—sa panulat ni Mara Valle
Patay ang isang lalaki sa Dalaguete, Cebu matapos tambangan at pagbabarilin ng tatlong suspek na nakaalitan sa inuman.
Kinilala ang biktimang si Maximo De Luna, 42-anyos habang ang mga suspek naman ay sina Joseph Cahayagan, Virgilio Diama at Gerry Infante.
Ayon sa Dalaguete Police, makiki-piyesta sana si De Luna sa kanyang mga kaibigan nang biglang harangin at pagbabarilin ng mga suspek.
Napag-alaman naman ng mga otoridad na nagkaroon ng alitan ang biktima at mga suspek sa isang inuman noong isang taon. —sa panulat ni Mara Valle
Niyanig ng lindol ang ilang bahagi ng lalawigan ng Aurora.
Dakong 11:57 ng umaga kahapon nang tumama ang magnitude 3.9 na lindol.
Natunton ang sentro ng pagyanig 11 kilometro silangan ng Bayan ng Casiguran.
Naramdaman ang Intensity 3 sa Casiguran, Intensity 2 sa Dinalungan habang Intensity 1 sa bayan ng Dilasag.
Wala namang pinsalang idinulot ang nasabing pagyanig na tectonic ang origin at wala ring inaasahang aftershocks.
Kinumpirma ni Cagayan Governor Manuel Mamba na dinapuan din siya ng COVID-19 at kanyang asawang si Mabel.
Bagaman pawang mild symptoms, naka-confine na ang mag-asawang Mamba sa Cagayan Valley Medical Center sa Tuguegarao City dahil na rin sa kanilang comorbidities na hypertension at diabetes.
Ayon sa Cagayan Provincial Information Office, kapwa bakunado na at tumanggap na ng booster shots ang gobernador at maybahay nito.
Sumailalim sa RT-PCR test ang dalawa noong Biyernes at kinabukasan nila nalaman ang resulta.
Humingi naman ng dasal at pang-unawa si Governor Mamba sa publiko.
Mahigit 150 pamilya ang nagsilikas matapos malubog sa baha bunsod ng walang tigil na ulan ang ilang lugar sa mga Bayan ng Mawab at Nabunturan, Davao de Oro.
Isinagawa ang Pre-emptive evacuation sa Barangay Basak at Bukal sa Nabunturan.
Inilikas din ang mga residenteng nakatira sa mga flood at landslide-prone area at tatlong iba pang Barangay.
Ayon sa Municipal Disaster Risk Reduction and Management Office, dinalhan na ng relief goods at pagkain ang mga bakwit.
Samantala, nagkaroon din ng landslide sa bahagi ng Highway sa kilometer 70, barangay Tuboran, Mawab.
Dinagsa ng mga deboto ang prusisyon ng Pilgrim Image ng Santo Niño sa Cebu.
Subalit dahil sa pagtaas ng kaso ng COVID-19 sanhi ng Omicron variant, isinagawa na lamang ang isang mobile procession ng banal na imahen.
Mula sa Cebu City, dumaan ang pilgrim image sa mga lungsod ng Talisay, Mandaue, at Lapu-Lapu.
Ipinagpapasalamat naman ng ilang mga deboto ng Santo Niño ang kanilang kaligtasan kahit nasira ang kanilang mga bahay dahil sa nagdaang bagyo. —sa panulat ni Airiam Sancho
Naabo ang 23 bahay matapos sumiklab ang sunog sa bahagi ng Bolton bridge sa Davao City.
Ayon sa mga tauhan ng Bucana Fire Station, mabilis kumalat ang apoy dahil karamihan sa mga bahay na tinamaan ng sunog ay gawa umano sa light materials.
Isa sa mga tinitignan ng mga otoridad na posibleng sanhi ng sunog ang faulty wiring sa bahay ng isang residente sa barangay 76-A.
Wala namang naitalang nasawi o nasugatan sa naganap na sunog. –Sa panulat ni Angelica Doctolero
Patay sa pamamaril ang dating manager ng isang radio station matapos pagbabarilin ng dalawang hindi pa nakikilalang mga suspek sa Park Sampaguita sa brgy. New Carmen sa gitna ng pinaiiral na total gun ban ng Commission on Elections (Comelec).
Kinilala ang bikitima na si Jaynard Angeles, 36-anyos na dating manager ng isang radio station at isang political aspirant na kumakandidato sa ilalim ng partido ni presidential aspirant Ferdinand “Bongbong” Marcos Jr. na miyembro ng Partido Federal ng Pilipinas.
Sa inisyal na imbestigasyon, tinambangan si Angeles sa loob ng kanya kotse sa harap ng Falle Auto Repair Shop sa Purok Sampaguita, barangay New Carmen sa nabanggit na lugar.
Ayon sa SOCCSKSARGEN Police Regional Office, kanilang pang inaalam kung ang pagpatay sa biktima ay may kinalaman sa kaniyang pagtakbo o mayroong nakaalitan sa kaniyang katrabaho.
Samantala, tiniyak naman ni Presidential Task Force on Media Security Usec. Joel Egco na kanilang tututukan ang naganap na pagpatay sa isa na namang kasapi ng media. –Sa panulat ni Angelica Doctolero
Patay ang isang MMDA rescuer makaraang pagbabarilin ng isang tricycle driver sa barangay San Roque, Angat sa Bulacan.
Base sa imbestigasyon ng mga otoridad, nagkaroon ng mainitang pagtatalo matapos sitahin ng biktima ang suspek na si Marlon Binavice, 42-anyos sa isang parking area sa nabanggit na lugar.
Ayon sa mga pulis, napikon si Binavice kayat umalis ito pero agad ding bumalik dala ang isang baril saka pinagbabaril ang biktima na nagawa pang isugod sa ospital pero idineklarang dead-on-arrival.
Mabilis namang nakatakas ang suspek pero agad din itong nahuli ng mga otoridad matapos makorner sa ikinasang operasyon ng kung saan, narekober sa kanyang pag-iingat ang isang caliber 38 revolver na may limang bala at ang traysikel na ginamit sa pagtakas.
Nahaharap ngayon sa kasong murder at violation of omnibus election code ang suspek. –Sa panulat ni Angelica Doctolero
Kalaboso ang isang lalaki matapos makuhanan ng hindi lisensyadong baril sa Nueva Ecija.
Kinilala ang violator na si Percival Miranda, 57 anyos, na unang lumabag sa gun ban sa lalawigan sa ilalim ng election period.
Batay sa ulat, pinahinto si Miranda ng mga operatiba sa isang checkpoint sa Barangay Poblacion East nang sumailalim sa pagbubusisi nakuha sa kanya ang isang .45 caliber pistol.
Nabigo naman na magpakita ng Certificate of Authority to Carry a Firearm ang violator sanhi upang siya ay hulihin at kumpiskahin ang kanyang dalang baril.
Sinampahan na si Miranda ng kasong paglabag sa COMELEC gun ban at Comprehensive Law of Firearms and Ammunition Regulation Act. —sa panulat ni Kim Gomez