RONDA PROBINSYA

Pinaigting na ng ilang Local Government Unit sa Eastern Visayas ang kani-kanilang hakbang laban sa COVID-19 sa harap ng patuloy na pagkalat nito.

Kapwa nilimitahan na ng mga provincial government ng Northern at Eastern Samar, kabilang ang kabisera nitong Borongan City, ang bilang ng mga pumapasok na empleyado.

Ipinag-utos ni Northern Samar Governor Edwin Ong ang ‘work from home scheme’ sa mga empleyado ng kapitolyo habang ‘skeletal workforce arrangement’ ang ipinatupad ni Eastern Samar Governor Ben Evardone.

Hinimok din ng dalawang Gobernador ang kani-kanilang constituents na manatili sa bahay at sumunod sa lahat ng health protocols.

Nananatili namang operational ang ilang sangay tulad ng Sanitation, Health, Traffic at Disaster Reduction Management Offices.

Samantala, itinanggi nina Mayors Alfred Romualdez ng Tacloban City at Richard Gomez ng Ormoc City ang ulat na isasailalim nila sa lockdown ang kani-kanilang lungsod dahil sa pagsirit ng COVID-19 cases.

Kahapon ay umabot sa 346 ang panibagong COVID-19 cases sa Eastern Visayas kaya’t sumampa na sa 2,876 ang aktibong kaso.

Patay sa pamamaril ang isang Barangay Chairman sa Guagua, Pampanga.

Kinilala ang biktima na si Barangay Sto. Niño Chairman Ranier Asban, 45 anyos.

Sa imbestigasyon ng mga otoridad, bago ang insidente, nakatayo ang biktima sa Echo Gas Station sa nasabing at gumagamit pa umano ito ng cellphone nang pagbabarilin ng naglalakad na suspek at saka tumakas patungong Feeder Road, Barangay Sto. Cristo.

Samantala, nagsagawa ng operasyon ang pulisya at ipina-flash alarm para sa mabilis na pagresolba sa kaso.—sa panulat ni Mara Valle

Muling naghigpit ng restrisyon sa mga border control point ang Marinduque lgus bunsod narin ng tumataas na bilang ng mga tinatamaan ng nakakahawang sakit.

Ayon kay Marinduque Gov. Presbitero Velasco Jr., nasa ilalim ng alert level 3 ang kanilang lalawigan kayat kinailangang paigtingin ang pagpapatupad ng health and safety protocols.

Nabatid na umabot sa mahigit walumpung pasyente ang nagpositibo sa ikinasang RT-PCR test habang nasa 160 naman ang nagpositibo sa antigen test sa lalawigan.

Sinabi ni Velasco, kanilang ire-require sa mga hindi bakunado at non-authorized persons outside residence ang resulta ng RT-PCR o antigen test upang masigurong ligtas ang bawat residente.

Sa ngayon, pansamantala ding isinuspinde ang pagpasok ng mga dayuhan sa nasabing lalawigan.—sa panulat ni Angelica Doctolero

Patay ang isang lalaki matapos manlaban sa ikinasang operasyon ng mga otoridad sa bayan ng Sumisip, Basilan.

Kinilala ang suspek na si Ajie Gomez, na gumamit ng isang M-16 rifle para paputukan ang mga operatiba na kinabibilangan ng mga sundalo at pulis.

Narekober sa suspek ang anti-personell mine, ilang mga baril at bala, at ilang mga gamit para sa paggawa ng bomba.

Inaalam pa ng mga otoridad kung may mga kasabwat ang nasawing suspek na isang sympathizer o sumusuporta kay Abu Sayyaf Group Sub-Leader Pasil Bayali, na isa sa mga responsable umano sa mga bomb threat at extortion sa Basilan.—sa panulat ni Angelica Doctolero

Patay matapos makatakas sa mga otoridad at malunod sa ilog sa Tanza, Cavite ang isang lalaking sabungero.

Ayon sa mga otoridad, nagkasa sila ng operasyon matapos makatanggap ng report mula sa isang concerned citizen kaugnay sa tupada ng ilang residente sa lugar.

Dito na naaresto ang biktimang kinilalang si mark Madla y Ortiz alyas “Macmac” pero nakagawa ito ng paraan para makatakas saka tumalon sa ilog at nalunod.

Isinugod pa ang biktima sa ospital pero idineklara itong dead on arrival.

Samantala, inaresto din ang pito pang sabungero kung saan, narekober ang p2,200 na pusta, dalawang panabong na manok at apat na tari. —sa panulat ni Angelica Doctolero

Aabot sa P1.7M ng hinihinalang shabu ang nasabat ng mga otoridad mula sa tatlong suspek sa Mabalacat City, Pampanga.

Kinilala ang mga suspek na sina Orlando Cortez, Rosa Linda Dion at Alvin Cortez, na naaresto sa ikinasang buy bust operation sa Barangay Sta. Maria noong January 14.

Nakumpiska sa mga suspek ang tatlong medium size plastic na naglalaman ng humigit kumulang 250 na gramo ng shabu, isang cellphone, bank passbook, isang Toyota vios at mga drug paraphernalia.

Sasampahan ng kasong paglabag sa Comprehensive Dangerous Drugs Act ang tatlong suspek.

Nakapagtala na ang Ilocos Norte ng unang kaso ng Omicron variant ng COVID-19.

Ayon kay Governor Matthew Marcos Manotoc, kinumpirma ng Department of Health na mayroon nang nakapasok na Omicron variant sa lalawigan.

Gayunman, sinabi ni Manotoc na walang dahilan para mag-panic ang publiko dahil karamihan sa mga residente ay bakunado na laban sa COVID-19.

Iginiit rin nito na hindi sila magpapatupad ng malawakang hard lockdown.

Wala namang inilabas na detalye si Manotoc hinggil sa unang kaso ng Omicron variant ngunit,  kinumpirma ni Ilocos Center for Health Development COVID-19 Focal Person Dr. Rheuel Bobis, na ang unang kaso sa lalawigan ay isang 70-taong gulang na lalaki, na isang returning overseas filipino (ROF).

Nitong January 15 ay nakapagtala ang lalawigan ng 197 na bagong mga kaso ng COVID-19, kaya’t pumalo na sa 1,003 ang active cases sa Ilocos Norte.

Dalawang miyembro ng grupong Anakpawis pinagbabaril ng mga ‘di pa nakikilalang suspek sa Barcelona, Sorsogon.

Kinilala ang mga biktima na sina Silvestre Fortades Jr., 70 anyos at kinakasama nitong si Rose Maria Galias, 68 anyos.

Ayon sa mga otoridad, sakay ang dalawa sa isang tricycle kung saan si Fortades ang nagmamaneho, nang huminto umano ang kanilang sasakyan sa isang tindahan at bumaba ang dalawa, bigla na lamang sumulpot ang dalawang suspek at pinaulanan ng bala ang mga biktima.

Narekober sa pinangyarihan ng krimen ang 13 basyo ng bala ng  cal.45 pistol.

Samantala, kinondena naman ng kanilang grupo ang naturang krimen, habang iniimbestigahan pa ng mga otoridad ang motibo sa pamamaril. —sa panulat ni Mara Valle

Arestado ang dalawang kalalakihan makaraang puwersahang tangayin ang isang motorsiklo sa Amadeo, Cavite.

Kinilala ang mga suspek na sina Bernard Hababag at James Lampago Jr.

Sa reklamo ni John Arwin Ramos kay Corporal Rey Kevin Manuel, ng Amadeo Police Station, sakay siya ng kanyang motorsiklo nang puwersahang tangayin ito ng mga suspek.

Agad nakipag-ugnayan ang biktima sa awtoridad na agad namang nagsagawa ng operation na ikinadakip ng dalawa.

Samantala, sa kanilang pagkakaaresto, nakapkapan din sila ng 3 sachet ng hinihinalang shabu. —sa panulat ni Mara Valle

Isang retiradong sundalo ang patay matapos pagbabarilin ng riding-in-tandem sa bayan ng Allacapan, Cagayan.

Kinilala ang biktima na si Danilo Fombuena, 57 anyos.

Ayon sa Allacapan Municipal Police, naabutan nila na nakabulagta ang biktima, sinubukan pa umano nila itong dalhin sa Municipal Health Office pero hindi na umabot ng buhay.

Posibleng matindi ang galit ng mga salarin kay Fombuena dahil  naubos ang isang magazine ng caliber 45 pistol na ginamit sa krimen.

Samantala, patuloy na pinaghahanap ng pulisya ang mga salarin. —sa panulat ni Mara Valle