RONDA PROBINSYA

Arestado ang tatlong babae matapos makuhanan ng mahigit isang milyong piso na halaga ng shabu sa Navotas City.

Kinilala ang mga suspek na sina Kyla Marie Legaspi, 19 anyos, kapatid nitong si Kristal Shaine Legaspi, 22 anyos at Marissa Adalla, 29 anyos.

Ayon sa Navotas City Police, nagkunwaring poseur buyer sina Pssg. Christian Oclares at Patrolman Henry Quinagon at bumili ng halagang p2,500 shabu sa magkapatid na Legazpi, kung saan kasama nila si Adalla.

Matapos ang transaksiyon, dinampot na ng ibang pulis na naroroon ang nasabing tatlong Maria.

Nasamsam sa kanila ang kabuuang 162 gramo ng shabu na may market price na 1,101,600 pesos.

Kasalukuyang nasa kustodiya ng mga otoridad ang mga suspek na mahaharap sa kasong paglabas sa Comprehensive Dangerous Drugs Act of 2002.—sa panulat ni Mara Valle

11 kaso ng COVID-19 ang naitala sa lalawigan ng Batanes kahapon, Enero a-18.

Sinabi ni Dr. Martin Heginio Querubin, Chief of Clinics ng Batanes General Hospital, pito sa mga kaso ay mga indibidwal na pumapasok sa lalawigan gaya ng mga Authorized Persons Outside of Residence (APOR), locally stranded individuals at returning residents.

Gayunman, sinabi ni Querubin na walo sa mga kaso ay may mild cases lamang habang asymptomatic naman ang tatlong mga kaso.

Tiniyak din ng opisyal na kumpleto sila sa mga gamot at mga kagamitan sakaling may mga pasyenteng lumala ang kondisyon at mangailangan ng mga ito.

Sinuspinde na ng mga Local Government Unit ang mga klase sa Central Visayas bunsod ng tumataas na COVID-19 cases, matapos magkasakit ang 3 guro, 5 non-teaching personnel at 1 estudyante.

Kinumpirma ng Department of Education-Region 7 na humirit ng ‘Health Break’ sa mga paaralan ang mga local government ng Cebu, Talisay, Carcar Cities sa Cebu maging ang Bais City sa Negros Oriental.

Ayon kay DepEd-Region 7 Director Salustiano Jimenez, nakipag-ugnayan ang mga Local Chief Executive sa mga Division Superintendent para sa suspensyon ng mga klase.

Suspendido ang klase sa Cebu City simula January 17 hanggang 30; Talisay City, January 19 hanggang 28; Carcar City, January 24 hanggang 31 at Bais City, January 16 hanggang 31.

Karamihan ng mga paaralan sa mga nasabing lugar ay nagsasagawa ng modular at blended type learning.

Naaresto na ng mga otoridad sa Maynila ang lalaking suspek sa pananaksak at pagpatay sa isang magsasaka sa Calamaniugan, Cagayan.

Base sa impormasyon, inireklamo ng kasong attempted homicide si Vincent Labbao, 35-anyos at naninirahan ngayon sa Sta. Cruz, Maynila.

Ayon sa mga pulis, sa bisa ng warrant of arrest ay matagumpay na nahuli ang top 1 most wanted person sa bayan ng Sto. Niño sa nabanggit na lugar na sinasabing matagal nang nagtatago sa batas.

Hawak na ngayon ng Pandacan Police ang suspek na may piyansang 36,000 piso para sa kanyang pansamantalang kalayaan. —sa panulat ni Angelica Doctolero

Inilarga na ng mga opisyal ng Barangay Sudapin sa Kidapawan City, Cotabato ang bersyon nito ng “Operation Tokhang” upang makumbinse ang kanilang mga ka-barangay na magpabakuna laban sa COVID-19.

Ayon kay Barangay Sapudin Chairman John Karl Sibug, simula noong Lunes hanggang Huwebes ay nagbabahay-bahay sila upang hikayatin ang kanilang mga ka-lugar na magpabakuna sa Biyernes.

Nasa 3-K pa anyang indibidwal sa kanilang barangay ang hindi bakunado o tumatangging magpaturok sa kabila ng nagpapatuloy na vaccination campaign ng pamahalaan.

Tiniyak naman ni Sibug na hindi nila pipilitin ang sinumang tatangging magpabakuna, bagkus ay boluntaryo lamang ito.

Ang “Tokhang,” na nilikha mula sa dalawang pinag-samang salitang Cebuano na “Toktok” o Katok at “Hangyo” na Hiling o pakiusap ay unang ginamit bilang bahagi  ng War on Drugs na ipinatupad ni Pangulong Rodrigo Duterte.

Patay ang isang Education official ng Bangsamoro Autonomous Region in Muslim Mindanao (BARMM) sa Tacurong City, Sultan Kudarat habang sugatan ang kanyang asawa nang tambangan ng mga hindi pa nakilalang salarin.

Kinilala ang biktimang si Javier Kumandi Senior, District Supervisor sa Pandag, Maguindanao.

Ayon sa Tacurong City Police, pauwi na si Kumandi at asawa nito lulan ng itim na Toyota Innova na may plakang AGA-5857 nang paulanan ng bala ng Riding-in-Tandem.

Patuloy ang imbestigasyon ng mga otoridad sa motibo sa pamamaslang habang tinutugis na ang mga nasa likod ng krimen.   —sa panulat ni Mara Valle

Dalawang menor de edad ang nasagip ng mga sundalo mula sa Communist Party of the Philippines-New People’s Army sa Negros Oriental.

Narescue ang dalawang bata matapos ang engkwentro ng mga sundalo at rebelde sa lungsod ng Guihulngan.

Ayon kay Philippine Army 303rd Infantry Brigade Commander, Brig. Gen. Inocencio Pasaporte, kasalukuyang ginagamot ang mga bata na napag-alamang naging utusan o ‘runner’ ng NPA.

Isa anya sa mga nasagip ay ni-recruit ng rebeldeng grupo noon pang 2018.

Bagaman pinatawag na rin ang mga magulang ng dalawang bata, mananatili sila sa kustodiya ng DSWD.   —sa panulat ni Mara Valle

Isang 80-anyos na Lolo ang patay sa COVID-19 ilang oras matapos lumapag ang eroplanong sinasakyan nito sa Batanes.

Ayon sa mga otoridad, pagdating ng Batanes ay dinala sa isang Quarantine Facility ang hindi pinangalanang senior citizen na may comorbidity.

Naisugod pa ang lalaki sa Batanes General Hospital dahil sa hirap sa paghinga at doon nakumpirmang positibo ito sa COVID-19 matapos sumailalim sa Antigen test.

Samantala, naka-quarantine na ang aabot sa 90 pasaherong kasama ng matanda sa flight.    —sa panulat ni Mara Valle