RONDA PROBINSYA

Nag-deploy ng karagdagang health workers ang Philippine National Police (PNP) at Department of Health (DOH) sa Northern Samar kasunod ng nararanasang kakulangan sa tauhan ng mga ospital maging ng mga klinika at laboratoryo matapos tamaan ng COVID-19 ang maraming Health workers sa nasabing rehiyon.

Sa pahayag ni Northern Samar Provincial Health Office Dr. Ninfa Caparroso-Kam, naka-isolate na ang mga health workers na nakakaranas ng mild symptoms ng COVID-19.

Ayon kay Caparroso-Kam, marami sa mga nagkasakit ay kontraktuwal, walang leave credits at walang benepisyong nakukuha mula sa pamahalaan.

Bukod pa dito, hirap din o walang kakayahan ang mga Health workers sa pagbabakuna kontra COVID-19 dahil mahirap puntahan ang ilang lugar kaya nasa apat napung porsiyento pa lamang ang may kumpletong dose ng bakuna sa probinsya.  —sa panulat ni Angelica Doctolero

Kalaboso ang dalawang babae matapos mahulihan ng 5.1 million pesos na halaga ng hinihinalang ecstasy tablets sa ikinasang operasyon ng mga awtoridad sa Tandang Sora, Quezon City.

Ayon sa Philippine Drug Enforcement Agency (PDEA), tinimbrehan sila ng mga custom officials mula China hinggil sa package galing Netherlands na pinaniniwalaang naglalaman ng ipinagbabawal na droga.

Agad na isinagawa ang controlled delivery operation hanggang sa masakote ang dalawang babae na siyang tumanggap ng package kung saan nakalagay ang higit isang libong piraso ng ecstasy tablets.

Patuloy ang imbestigasyon sa insidente habang sasampahan naman ng kaukulang reklamo ang mga naturang suspek.

Anim na katao ang sugatan matapos tamaan ng tractor head ang sinasakyan nilang van sa Albay.

Kinilala ang mga biktima na sina Ricardo Cardinal; at ang mga pasahero niyang sina Mark Kenneth Bermundo, Angel Chica, Lunining Villanueva, Jungie Sapusao at Diane Rose Bermundo.

Habang arestado naman ang driver ng traktor na si Kenneth Antoquia.

Ayon sa mga otoridad, nakasakay ang anim na pasahero sa nakaparadang van nang matamaan ito ng ulo ng dumadaang traktor.

Agad namang dinala ang mga nasugatang biktima sa pinakamalapit na ospital upang malapatan ng lunas.

Samantala, nahaharap sa patong-patong na kaso ang driver ng traktor. —sa panulat ni Kim Gomez

Patay ang isang miyembro ng New People’s Army (NPA) matapos maka-engkwentro ng mga otoridad sa Sorsogon.

Ayon sa report, kinakasa ang isang operasyon ng mga pulis nang makasagupa ng mga ito ang 20 rebelde, kung saan isa ang napatay ng mga otoridad.

Narekober ng hanay ng mga pulis ang hindi pa nakikilalang bangkay gayundin din ang ilang baril.

Samantala, sinabi ni Brigadier General Aldwine Almase, 903rd Brigade Commander, napigilan ng operasyon ang pagtatangka ng mga rebelde na magsagawa ng extortion activities at pananakot na posibleng may kaugnayan sa darating na halalan.

Nasakote ang isang SK Kagawad matapos mahulihan ng shabu sa isinagawang buy bust operation sa Occidental Mindoro.

Kinilala ang suspek na si Dexter Dela Cruz, 23 anyos na itinuturing na high value target (HVT) sa pagtutulak ng ilegal na droga.

Nakumpiska sa suspek ang 63.12 gramo ng shabu na may street value na 5,000 piso.

Nakakulong at sasampahan ang suspek ng patong-patong na kaso. —sa panulat ni Kim Gomez

Dead on arrival ang isang babaeng motorcycle rider matapos pagbabarilin ng hindi pa kilalang lalaki sa lalawigan ng Quezon.

Kinilala ang biktima na si Analyn Sarmiento, 42 anyos.

Ayon imbestigasyon ng mga pulis, minamaneho ni Sarmiento ang kanyang motorsiklo patungo sa kanyang bahay nang parahin ito ng hindi pa nakikilalang lalaki at agad na pinaulanan ng bala na kinasawi nito.

Sa ngayon, inaalam pa ng mga otoridad ang pagkakakilanlan ng suspek at ang motibo sa krimen. —sa panulat ni Kim Gomez

Nasakote ang isang lalaki matapos mameke at magbenta ng vaccination card sa Cavite.

Kinilala ang suspek na si Roy Pelagio Marquez, 48 anyos,  isang magsasaka.

Ayon sa mga otoridad, ireklamo ng isang concern citizen ang suspek na nagbebenta umano ng mga vaccination card.

Nakuha sa suspek ang dalawang short bond paper na may print-out ng COVID-19 vaxx card, dalawang name stamp na may mga pangalan at pirma ng Rural Health Unit (RHU) officials at perang ginamit sa operation.

Nakatakdang namang kasuhan ang suspek sa patong-patong na kaso. —sa panulat ni Kim Gomez

Arestado ang apat na miyembro ng isang pamilya matapos magtago ng limang taon sa kasong pagpatay sa isinagawang operasyon ng mga pulis sa lalawigan ng Masbate.

Kinilala ang mag-aamang sina Elesor Gamgam; mga anak nitong sina Jomar Gamgam, Eleser Gamgam at Jovert Gamgam.

Ayon sa mga otoridad, ang mag-aama ay responsable sa pagpatay at sa bigo pang pamamaslang sa kanilang kapit-bahay.

Kung saan, matapos ang krimen ay nagtago sa batas hanggang sa mahuli ng mga pulis sa kasong murder at frustrated murder. —sa panulat ni Kim Gomez

Patay ang mag-asawang magka-angkas sa motorsiklo matapos pumasok sa Edsa busway at masalpok ng bus sa Quezon City.

Kinilala ang mga nasawi na sina Leonilo Roquino at Juanita Roquino.

Arestado naman ang driver ng bus na si Jonathan Villanueva.

Ayon sa mga otoridad, binabagtas ng bus ang Balintawak patungong Cubao nang pumasok sa linya ang motorsiklo ng mag-asawa.

Sinubukan pang iwasan ng driver ng bus ang motorsiklo ngunit nahagip pa rin at tumilapon ang mag-asawa at agad na nasawi sa pinangyarihan ng aksidente.

Samantala, nakatakdang sampahan ng kasong Reckless Imprudence Resulting in Multiple Homicide and Damage to Property ang driver ng bus. —sa panulat ni Kim Gomez

Kalaboso ang isang babae matapos mahulihan ng hinihinalang shabu sa isinagawang buy-bust operation sa Manila.

Kinilala ang suspek na si Madonna B. Romaguera.

Nakumpiska kay Romaguera ang 700 gramo ng shabu na nagkakahalaga ng limang milyong piso.

Nakakulong at nakatakdang nang sampahang ang suspek ng patong-patong na kaso. —sa panulat ni Kim Gomez