RONDA PROBINSYA

Aabot sa P5.36B ng droga ang sinunog kahapon ng Philippine Drug Enforcement Agency (PDEA) sa Trece Martires City sa Cavite.

Nasabat ito noong mga nagdaang taon na sinunog sa pasilidad ng Intergrated Waste Management Inc.

1M kilo ng ipinagbabawal na gamot ang naging abo tulad; shabu at mga kemikal sa paggawa nito, marijuana, cocaine, ecstasy, mga expired na gamot at iba pa.

Ayon kay PDEA Director General Wilkins Villanueva, pinakamalaki rito ay nakumpiska sa Subic, Zambales at Imus, Cavite.

Limang buwan bago matapos ang termino ni Pangulong Rodrigo Duterte, may 11K pang barangay sa buong bansa ang hindi cleared sa droga. —sa panulat ni Abby Malanday

Ilang buto ng hinihinalang tao ang narekober sa paghuhukay sa isang construction site sa General Trias City, Cavite.

Ayon kay Master Sgt. Cristopher Dumlao ng Gentri Police, habang naghuhukay ang operator ng backhoe para sa itatayong barracks ng mga manggagawa sa gilid ng Ylang-Ylang River ay ilang piraso ng hinihinalang buto ng tao ang tumambad sa kanila.

Dahil dito, nagpatulong na ang mga otoridad sa provincial forensic unit sa pagtukoy sa pagkakakilanlan ng mga nasabing buto na natagpuan sa Barangay Navarro.

Ang paghuhukay sa lugar ay bahagi ng konstruksiyon ng Cavite-Laguna Expressway (CaLax). —sa panulat ni Mara Valle

Isang hotel staff ang nagsauli ng napulot nitong bag na naglalaman ng 130,000 pesos na cash sa guest na nag-checkout sa Mexico, Pampanga.

Ayon kay Arjay Montemayor, nang makita niya ang bag ay agad niya itong isinurrender sa kanyang supervisor at doon na tumambad ang nasabing halaga.

Napag-alaman na ang napulot na pera ng ni Montemayor ay pampasweldo ng guest sa mga empleyado nito.

Samantala, bilang gantimpala, ginawang probationary employee ng hotel si Montemayor mula sa pagiging project employee. —sa panulat ni Mara Valle

Ilang residente sa bayan ng Santiago, Ilocos Sur ang namameligrong makasuhan dahil sa pagkatay ng isang hinihinalang endangered na pating.

Ayon kay Barangay Sabangan Chairman Oscar Agbulos, naabutan na lang umano ng mga tanod na nagkukumpulan ang mga tao sa bukid kung saan kinatay at ipinamigay ang karne ng pating.

Natagpuan anya ang nasabing hayop sa dalampasigan kung saan ito hinila at pinagpapalo bago kinatay.

Inihayag naman ng Bureau of Fisheries and Aquatic Resources (BFAR) na kailangang matukoy kung anong uri ng pating ang kinain ng mga residente dahil maaring isa itong endangered species na hindi dapat patayin. —sa panulat ni Mara Valle

Arestado ang isang lolo sa Asingan, Pangasinan dahil umano sa pagnanakaw ng 10 kilo ng mangga.

Kinilala ng Asingan Municipal Police ang supek na si Narding Floro, 80 anyos.

Ayon sa pulisya, iginiit ng matanda na siya ang nagtanim ng mga puno pero sakop ito ng lupang pag-aari umano ng nagrereklamo.

Bagaman gustong bayaran ni Mang Narding ang mangga, 6,000 piso umano ang sinisingil sa kanya ng complainant.

Samantala, itinakda naman ang piyansa ni Floro sa halagang 6,000 piso. —sa panulat ni Mara Valle

10 sabungero na ang nawawala matapos magtungo sa isang sabungan sa Sta. Cruz, Laguna.

Kinilala ng Santa Cruz Police ang apat sa mga nawawalang sina Ferdinand Dizon, 39 anyos Mark Paul Fernandine, Manny Magbanua at Melbert John Santos.

Ayon sa asawa ni Dizon, matapos manalo ang manok ng grupo ng kanyang mister ay may tatlo pa sanang panlaban ang mga ito pero napansin niyang sa live video na hindi na si Ferdinand ang nagbitaw ng manok sa mga sumunod na laban.

Napag-alaman ng pulisya na isang alyas julius ang financer at may-ari ng cock farm na pinuntahan ng grupo ni Dizon.

Pagbebenta ng laro o game-fixing ang posibleng motibo sa biglaang paglalaho ng 10 sabungero.

Samantala, pursigido naman ang pamilya ng mga nawawala na kasuhan ang may-ari ng cock farm na hindi rin umano mahagilap hanggang ngayon. —sa panulat ni Mara Valle

Arestado sa operasyon ang isang lalaki matapos magbenta ng tatlong pekeng vaccination cards sa Nueva Vizcaya.

Kinilala ang suspek na si Perlito Cabanban Y Padilla na naniningil ng 3,000 piso sa bawat pekeng vaccine card.

Ang naturang vaccine cards ay kaparehas umano ng DOH cards pero walang pirma ng Municipal Health Officer at iba din ang mga detalye hindi gaya sa orihinal na card na mayroong dry seal.

Ayon sa mga otoridad, noong nakaraang taon pa nila minomonitor ang nasabing suspek maging ang sinasabing bentahan ng pekeng vaccination cards.

Nahaharap ngayon sa kasong Falsification of Public Document Art. 172 of RPC in Relation to RA11332 ang naarestong suspek.  —sa panulat ni Angelica Doctolero

Lumutang sa dalampasigan ng Dapitan City, Zamboanga Del Norte ang isang patay na sperm whale.

Ayon sa Bureau of Fisheries and Aquatic Resources (BFAR), may haba ito na 13 metro at lapad na pitong metro.

Bagamat sa tantya ng otoridad ay 20 anyos pa lamang ito, tumitimbang ng nasa tinatayang 41,000 kilos and balyena.

Ayon sa mga otoridad, posible na naipit sa mga fish corral ang naturang sperm whale at na-stranded sa isang parte ng dagat sa gitna ng low tide, at nahirapan na itong lumangoy pabalik sa malalim na parte ng karagatan, na nagdulot ng pagkasawi nito.

Samantala, pinag-aaralan na kung paano ililibing ang naturang balyena.—sa panulat ni Mara Valle

Arestado ang isang Amerikano matapos maaresto ng Philippine National Police-Drug Enforcement Group sa Zambales.

Kinilala ang suspek na si john Louis may, alyas ‘John Louis’, 42 anyos.

Ayon kay PDEG Director P/BGen. Remus Medina, naaresto si Louis sa ikinasang buy-bust operation at narekober mula dito ang nasa tinatayang 50 grams ng shabu na nagkakahalaga ng 340,000 pesos at boodle money na ginamit sa operasyon.

Sa ngayon, nasa custody na ng special operations unit ng Police Regional Office 3 ang suspek para sa documentation.—sa panulat ni Mara Valle

Arestado ang isang dating Barangay tanod na nagpaputok ng baril at kalaunay nagbaril sa ulo matapos rumesponde ang pulisya sa San Miguel, Bulacan.

Kinilala ang suspek na si Marcelo Yambot.

Ayon sa San Miguel Police, napagalamang nagpaputok ng baril ang suspek sa tapat ng kanyang bahay at nang makarating sa kaalaman ng pulisya ay agad silang rumesponde sa lugar at doon na nakita na hawak ng suspek ang cal.38 pistol.

Sinabihan umano ng mga pulis ang suspek na isuko ang baril subalit walang kaabog-abog na itinutok sa kanyang ulo at pinaputok ito.

Agad namang dinala ng mgaotoridad sa pinakamalapit na ospital ang sugatang tanod para sa paunang lunas at nabati na maayos na ang kalagayan nito.

Samantala, nahaharap sa kasong paglabag sa gun ban alinsunod sa omnibus election code ang suspek.—sa panulat ni Mara Valle