RONDA PROBINSYA

Natagpuang patay at hubo’t hubad sa isang damuhan sa Puerto Princesa City, Palawan ang isang babae matapos umanong makipag-eyeball nito.

Kinalala ang biktima na si Beverlyn Ampan, 19 anyos

Sa ulat ni Police Major Loreto Maulion, tagapagsalita ng mimaropa police, nadiskubre ng isang residente ang bangkay ni Ampan na nakahandusay sa madamong bahagi ng lugar na hubo’t hubad.

Sa imbestigasyon ng puerto princesa police, huling nakitang buhay ang biktima sa isang bus terminal station upang makipagkita umano sa isang di pa kilalang tao hanggang sa siya ay mawala na at matagpuang patay.

Samantala, dinala na ang mga labi ng biktima sa Heaven’s Gate Funeral Homes para sa awtopsiya o post mortem examination at vaginal swab upang makumpirma na siya ay ginahasa, patuloy na ring pinaghahanap ng mga otoridad ang suspek sa karumal-dumal na insidente.-sa panulat ni Mara Valle

Patay ang isang umano’y lider ng organized crime group matapos pagbabarilin ng hindi pa nakikilalang suspek habang sakay ng tricycle sa Tiaong, Quezon.

Kinilala ang biktima na si Arnel Saez, 52 anyos.

Ayon sa Tiaong Police, pinagbabaril ang biktima ng hindi pa nakilalang suspek habang nagmamaneho ng kanyang tricycle at nagtamo ito ng mga tama ng bala sa katawan na naging sanhi nang agad nitong pagkamatay.

Nabatid na ang biktima ay naaresto rin dahil sa kasong robbery noong April 24, 2021.

Samantala, nangangalap na ang mga otoridad ng impormasyon para matukoy ang suspek at inaalam na rin nila kung ang pagpatay sa biktima ay may kinalaman sa mga aktibidad nito. – sa panulat ni Mara Valle

Bumulaga ang katawan ng isang babae na hinihinalang tinortyur bago pinatay sa isang beach sa Sta. Cruz, Davao Del Sur.

Ayon sa Sta. Cruz Police, natagpuan ng mga miyembro ng Philippine Coast Guard (PCG) na nakatali ang paa gamit ang nylon at nakakabit sa isang water container na may lamang semento ang bangkay ng biktima.

Kapansin-pansin din umano na winarak ang tiyan ng babae, at nagtamo rin ito ng tama sa mukha kaya hindi pa rin matukoy ang pagkakilanlan nito.

Lahad ng pulisya, blonde, may tattoo sa kilay at nakapustiso ang naturang babae.

Tinataya ring nasa edad 25 hanggang 35 ang babae, maputi at may tangkad na 5-foot-2.

Samantala, patuloy na iniimbestigahan ng mga otorida ang motibo ng marahas na pagpatay sa biktima. – sa panulat ni Mara Valle

Anim katao ang sugatan matapos salpukin ang kanilang sinasakyang L300 van ng isang truck sa Polangui, Albay.

Ayon sa Polangui Municipal Police, pansamantalang tumigil ang mga biktima sa gilid ng kalsada pero biglang dumating ang tractor at binangga ang van.

Patuloy na iniimbestigahan ng mga otoridad ang insidente.-sa panulat ni Mara Valle

Patay ang isang nurse makaraang barilin habang lulan ng kanyang motosiklo sa Candelaria, Quezon.

Kinilala ng Candelaria Municipal Police ang biktima na si Denreb Ibre, 30 anyos.

Ayon sa pulisya, naka-angkas sa motorsiklo si Ibre at tumigil habang palabas na sana sa highway nang sumulpot ang salaring lulan din ng motorsiklo at pinagbabaril ang biktima.

Hindi naman ang kasama ni Ibre habang nakatakas ang salarin.

Inaalam na ang motibo sa krimen at pagkakakilanlan ng salarin. – sa panulat ni Mara Valle

Ipapamahagi na ng Department of Agriculture (DA) ang 1,500  binhi ng palay sa mga magsasaka sa Caraga Region na naapektuhan ng bagyong Odette.

Ito ay bahagi ng ipinangako ng DA-Mindanao Cluster Regional Offices kaugnay sa rehabilitation efforts sa farming sector ng nasabing rehiyon,

Maliban dito, naglaan din ang DA-Caraga rice program ng 685 ng certified rice seeds at 200 hybrid rice seeds sa mga naturang magsasaka.

Samantala, nakatakdang magbigay ang DA-Philrice-Agusan Rice Competitiveness Enhancement Fund (RCEF) seed program ng 884 bag ng nasabing binhi sa Butuan City at halos 1K  bag  para sa munisipalidad ng Agusan Del Norte. - sa panulat ni Airiam Sancho 

Nakabalik na sa trabaho ang halos 80%-90% ng mga healthworkers sa ospital ng Imus na tinamaan ng COVID-19.

Ayon sa opisyal na si Doctor Jennifer Roamar, umabot sa halos 35% katumbas ng 130 empleyado ang nagkasakit ng nasabing virus.

Sinabi rin niya na karamihan sa mga pasyenteng naka-admit sa kanilang ospital ay nagpakita lamang ng moderate symptoms.

Samantala, muling nagpaalala si Roamar na importante ang pagpapabakuna para hindi lumala ang sintomas ng COVID-19.  – sa panulat ni Airiam Sancho

Patay ang isang babaeng balikbayan matapos pagsasaksakin ng live-in partner nito sa Sipalay City, Negros Occidental.

Kinilala ang biktima na si Enelisa Petua at suspek na si Jhondad Sase.

Ayon kay Sipalay City Police Chief, Maj. James Latayon, posibleng selos ang nag-udyok kay Sase upang paslangin si Petua.

Bumili anya ng kutsilyo si Sase habang lasing at pumunta sa boarding house ni Petua kung saan nagkaroon ng away ang dalawa dahil sa umano’y ka-chat na foreigner ng biktima.

Matapos nito ay pinagsasaksak ni sase si Petua ng 50 beses, base sa mga sugat na natamo ng biktima.  – sa panulat ni Mara Valle

Patay ang isang lola habang sugatan ang 17 kapwa nito pasahero matapos maaksidente ang sinasakyan nilang van sa Bayan ng Ibajay, Aklan.

Ayon kay Corporal Daniel Morris Galan ng Ibajay Municipal Police, nag-overtake ang van sa isang tricycle at sumalpok sa isang nakaparadang pick-up truck.

Bagaman agad na nadala sa ospital ang mga biktima, dead-on-arrival naman ang lolang edad isa sa mga pasahero na 63 anyos na babae.

Samantala, pinaghahanap na ng mga otoridad ang tumakas na driver ng van na kinilalang si Feljun Caberoy.

Nawawala matapos magpunta sa isang sabungan sa Batangas ang dalawang lalaki mula sa Bulacan.

Base sa reklamo ng mga kaanak ng mga biktima, gabi ng Enero a-6 nang sunduin ng puting van sina Edgar Malaca at Alexander Quijano sa Calumpit, Bulacan para magpunta sa isang sabungan sa Lipa, Batangas para magtari ng panabong na manok.

Nakausap pa umano ng pamilya malaca ang kaniyang kapatid kung saan, sinabi nitong natalo ang lahat ng nilabang manok sa sabungan at magpapahinga na muna dahil may laban pa kinabukasan.

Enero a-8 ay hindi na daw umano nakausap ang mga biktima hanggang sa ireport na ang mga ito sa mga otoridad.

Kinabukasan, Enero a-9 ng may tumawag sa pamilya ng mga biktima kung saan nakita umano ang sinakyang van ng mga biktima na inabandona sa Calumpit, Bulacan.

Ayon sa mga otoridad, tanging mga gamit nalang ng mga biktima ang nakita sa loob ng van.

Sa ngayon, palaisipan parin kung saan, nagtungo o napadpad ang mga biktima.

Humihingi naman ng tulong sa publiko ang pamilya ng mga biktima sa mga makakakita o may impormasyong nalalaman ay agad na ipaalam sa kinauukulan.

Sa ngayon, patuloy sa imbestigasyon ang Calumpit Police Station kaugnay sa kaso ng mga nawawalang indibidwal sa Bulacan.  —sa panulat ni Angelica Doctolero