RONDA PROBINSYA

Isa ang patay habang anim ang sugatan matapos mahulog sa isang creek ang isang pampasaherong dyipni sa bayan ng Luba sa Abra kahapon.

Ayon kay Luba Police Chief Captain Odilo Fel Osoria, bumibiyahe mula sa bayan ng tubo patungong Bangued sa Abra ang jeep sakay ang 23 pasahero nang mangyari ang aksidente.

Iniwasan nito ang isa pang jeep dahilan para mawalan ng kontrol at mahulog sa creek na may lalim na pitong metro.

Dahil sa nangyari, nasawi ang isang pasahero kahit umabot sa ospital.

Nasa mabuti namang kalagayan ang anim na nasugatan. —sa panulat ni Abby Malanday

Arestado ang pitong katao matapos mahuli sa isang nadiskubreng drug den sa Bacoor, Cavite.

Kinilala ang mga suspek na sina Manuel Aquino Jr. alyas “Boy Tawa”, 52 anyos, Jayson Alperto, 52 anyos, Jonjip Arquinez, 42 anyos, Guillermo Lorca, 50 anyos at Loida Batal, 36 anyos.

Kasama rin sina Mylene Ruda Navarro, 40, at Rachelle Santiago Diocaresa, 37; pawang residente ng Brgy. Molino 4, Bacoor City.

Ayon sa Bacoor Police, sinalakay nila ang bahay ng target suspect na si Aquino matapos silang matimbrehan na halos araw-araw umanong maraming kliyente si Aquino at libre batak sa kanyang tirahan.

Narekober naman sa lugar ang walong transparent plastic sachet na naglalaman ng 15 gramo ng shabu na tinmatayang nagkakahalaga ng 100,000 pesos, tatlong nakabukas na plastic sachet na may mga bakas pa ng shabu, mga drug paraphernalia, isang cellphone at buy-bust money.

Samantala, kasalukuyan nang nakakulong ang mga suspek at nahaharap sa kasong paglabag sa Comprehensive Dangerous Drug Act of 2002. —sa panulat ni Mara Valle

Patay ang isang welder makaraang gilitan at barilin sa ulo ng mga hindi pa kilalang salarin sa Quezon City.

Kinilala ang biktima na si Ronel Rita, 24 anyos.

Ayon kay PCPL Angel Pascasio III, ng Criminal Investigation and Detection Unit ng Quezon City Police District (CIDU-QCPD), sa salaysay ng dalawang taxi driver, naghihintay umano sila ng pasahero nang biglang lumapit si Rita na duguan na at nanghihingi ng tulong sakay ng motorsiklo.

Gayunman, bago pa siya natulungan ng mga taxi drivers ay bumagsak na ito sa sementadong kalsada kaya’t kaagad nang ini-report sa mga pulis.

Sa imbestigasyon ng Quezon City Police, nakitang may sugat sa leeg ang biktima at may tama rin ito ng bala sa likod ng ulo.

Samantala, patuloy naman ang isinasagawang imbestigasyon ng mga otoridad para sa agarang ikareresolba ng naturang krimen. —sa panulat ni Mara Valle

Nawindang ang mga residente matapos magkaroon ng malalakas na pagsabog bunsod ng pagliyab ng dalawang sasakyan sa Taguig City.

Unang umapoy ang isang nakaparadang suv na sinundan naman ng katabing jeep.

Agad namang naapula ng mga bumbero ang apoy habang patuloy pang iniimbestigihan ng mga otoridad ang naganap na insidente. —sa panulat ni Angelica Doctolero

Matapos ang ginawang panghoholdap ng isang suspek sa isang babaeng online seller na tinutukan ng baril at ninakawan sa Caloocan City, isa nanamang panghoholdap ang naganap sa isang lugawan sa Barangay Democracia sa Jaro, Iloilo City.

Sa nakuhang CCTV footage ng mga otoridad, makikitang natutulog ang dalawang bantay nang dumating ang isang lalaking nakasumbrero at nakasuot ng itim na jacket.

Nakuha pa ng suspek na umupo at magpanggap na kostumer saka nagdeklara ng holdap sa mga biktima at kinuha ang kita ng lugawan na nagkakahalaga ng 5,000 piso saka mabilis na tumakas.

Ayon sa may-ari ng lugawan, posibleng minanmanan na ng suspek ang kanilang tindahan at galaw ng kaniyang mga tauhan dahil sa dami ng kumakain.

Nagsasagawa na ng imbestigasyon ang mga otoridad para matukoy ang pagkakakilanlan sa suspek. —sa panulat ni Angelica Doctolero

Nahuli na ng mga otoridad ang apat na top most wanted suspect na nagbalik sa kanilang bayan sa San Pascual, Masbate matapos ang anim na taong pagtatago sa batas.

Kinilala ang mga suspek na sina, Jessie Hamili Nacion, 26-anyos, na nasa rank no. 1 most wanted person; Arnel Garbo Escarlan, 27-anyos, no.2 most wanted person; Mark Laila Arma, 24-anyos, no.3 most wanted person at Erol Garcia Avila, 25-anyos at nasa rank no.4 most wanted person sa nabanggit na lugar.

Agad na nagkasa ng operasyon ang mga otoridad matapos nakatanggap ng report tungkol sa pagbabalik ng mga suspek sa kanilang lugar.

Ayon kay PSSgt. Mc Donald Casi, naganap ang krimen noong taong 2015 kung saan, isang biktima ang nasawi habang nahaharap sa kasong murder ang mga suspek kung saan, walang inirekumendang piyansa ang korte laban sa mga akusado. —sa panulat ni Angelica Doctolero

Patay ang isang lalaki at babaeng lulan ng motorsiklo nang mabangga sila ng bus sa Edsa Busway sa Quezon City.

Ayon kay MMDA Traffic Operations Chief Bong Nebrija, nagkamali ng direksyon ang mga biktima dahil sa mobile navigation app na ang itinurong direksyon na North Avenue u-turn slot ay matagal na umanong sarado.

Dead-on-spot ang lalaking rider at kinalaunan ay binawian din ng buhay ang angkas niyang babae.

Ipinaliwanag naman ni Nebrija na dapat maunawaan ng mga rider na ang ginagawang paninita ng mga otoridad sa pagpasok sa bus lane ay para maiwasan ang aksidente. —sa panulat ni Mara Valle

Isang rider ang sugatan matapos tumilapon mula sa kanyang motorsiklo na sumalpok sa nag-overtake na truck sa San Ildefonso, Bulacan.

Ayon sa San Ildefonso Municipal Police, naghintay ng pagkakataon ang rider na makatawid sa kabilang bahagi ng kalsada at nang makakita ng tiyempo ay tumawid ito.

Gayunman, nag-overtake naman ang truck sa mas maliit na delivery truck na nasa unahan at nagbigay-daan sa motorsiklo.

Sa paglipat ng malaking truck sa kabilang linya at doon na nasalpok ang tumawid na motorsiklo at sa lakas ng pagbangga ay tumilapon ang rider.

Naipit pa sa ilalim ng truck ang motorsiklo at nagliyab habang ligtas na at nagpapagaling ang rider na nagtamo ng bali sa binti at sugat sa tuhod. —sa panulat ni Mara Valle

Nasa 800 kahon ng pekeng Paracetamol at iba pang gamot ang nasabat sa Bambang, Maynila.

Naaresto naman ang sinasabing nagbebenta online ng mga naturang gamot na kinilalang si Monique Gamboa, 29 anyos.

Ayon kay Lt. Col. Rosalino Ibay, Jr., hepe ng Manila Police District (MPD) Special Mayors Reaction Team, nakatangap sila ng impormasyon sa online selling ng Paracetamol.

Bukod sa mga Paracetamol, tumambad din sa mga otoridad ang kahon-kahong Bioflu, Neozep at rapid test kits na pawang peke.

Nasa kustodiya na ng MPD ang suspek habanginaalam na kung saan nito nakakuha ng supply ng mga pekeng gamot. —sa panulat ni Mara Valle

Apat na tulak ng shabu ang natimbog sa isinagawang buy-bust operation sa Barangay Holy Spirit, Quezon City.

Kinilala ang mga suspek na sina Tohame Ali, 20 anyos; Jayson Cawili, 29 anyos; Christian Dela Cruz, 36 anyos at Michael Selga, 38 anyos.

Ayon sa Quezon City Police District, bumili ng shabu ang kanilang asset at nang magkaabutan ng bayad ay inaresto ang mga suspek.

Narekober mula kina Ali ang siyam na plastic sachet ng 20 grams ng shabu na nagkakahalaga ng 136,000 pesos at buy-bust money. —sa panulat ni Mara Valle