RONDA PROBINSYA

Nasa 36.7 million pesos na halaga ng puslit na sigarilyo ang nasabat ng mga pulis sa isang warehouse sa Zamboanga City.

Nag-iimbestiga ang mga pulis sa naganap na pamamaril sa barangay kasanyangan na ikinasugat ng apat na biktima nang matiyempuhan sa dastun drive ang isang bodega na walang tao.

Ayon kay Zamboanga City Police Office Director, Col. Alexander Lorenzo, bumungad sa kanila ang kahon-kahon ng sigarilyong walang dokumento nang pasukin ang nasabing lugar.

Nakumpiska rin ang isang van na naglalaman ng nasa animnpaung master case ng sigarilyo.

Hindi pa natutukoy kung sino ang may-ari ng warehouse habang dinala na ang mga kontrabando sa Bureau of Customs (BOC).

Patay ang isang sundalo habang sugatan ang dalawang iba pa matapos pagbabarilin ng Abu Sayyaf gunmen ang sinasakyan nila sa barangay tugas sa Patikul, Sulu.

Ayon sa ulat, kabilang sa Philippine Army 45^th Infantry Battalion ang nasawi at nasugatan.

Pasado alas-6 ng gabi kahapon nang bumibiyahe ang mga ito lulan ng military truck nang sila ay na-ambush.

Agad naman silang dinala sa ospital pero nasawi na ang isa.

Hindi pa pinapangalanan ang mga ito. —sa panulat ni Abby Malanday

Patay ang isang pulis matapos na pagbabarilin ng tatlong hindi pa nakilalang suspek sa Tondo, Maynila, nitong Martes ng gabi.

Kinilala ang biktima na si Richard Ramos, 45-anyos, isang pulis na nag-AWOL matapos ang tatlong taon sa serbisyo.

Batay sa ulat, nag-iinuman ang biktima kasama ang kapatid nito nang dumating ang mga suspek at tsaka pinagbabaril si Ramos.

Patuloy ang imbestigasyon ng mga otoridad sa pagpaslang sa biktima.

Inaprubahan na ng Quezon City Government ang walk-in COVID-19 vaccination sa mga mall at ilang establisyimento sa lungsod.

Ayon sa lokal na pamahalaan, papayagang pumunta ang mga indibidwal sa QC protektodo booths sa loob ng mga malls, kung saan bibigyan sila ng walk-in stub na may petsa at oras sa kanilang pagbabakuna.

Magkakaroon ng 150 doses ng Aztrazeneca vaccine ang bawat vaccine sites para sa mga walk-in resident.

Kabilang sa mga malls at establisyimentong inilaan sa pagbabakuna ay ang mga sumusunod:

*January 25 hanggang 26 sa:

Sm Skydome

Ayala Trinoma

Ayala Cloverleaf

Sm North Edsa Drive Thru

Sm Centerpoint

* January 26 lang

Elements Centris

*January 25 hanggang 29 sa:

Ever Commonwealth

Robinsons Magnolia

Eastwood City

Robinsons Novaliches

Sm Novaliches

January 27 hanggang 29 sa:

Ayala Fairview Terraces

Ayala Up Town Center

Robinsons Galleria

Waltermart Edsa

Sm Fairview

Sm Fairview Drive-Thru

Fishermall

Samantala, nagpaalala ang QC LGU na kanilang uunahin ang mga residenteng nagparehistro online o sa kani-kanilang barangay. —sa panulat ni Angelica Doctolero

Aabot sa 30 gramo ng pinatuyong dahon ng marijuana ang narekober ng mga tauhan ng Philippine Drug Enforcement Agency (PDEA) sa isang suspek matapos  ikasa ang operasyon sa Brgy. San Pedro sa bayan ng Hermosa, Bataan.

Kinilala ang suspek na si Christian Jomar na nahuli sa tulong ng isang courier service na nagtimbre sa mga otoridad kaugnay sa iligal na aktibidad ng suspek.

Nakakulong na sa Hermosa Municipal Jail ang suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002. —sa panulat ni Angelica Doctolero

Arestado sa ikinasang operasyon ng mga otoridad ang isang american national sa Barangay Del Pilar Castillejos, Zambales.

Kinilala ang dayuhang suspek na si John Louis May, 42-anyos na nakuhanan ng limampung gramo ng hinihinalang shabu at may street value na 340,000 pesos.

Bukod pa diyan, nakuha rin sa kanya ang boodle money na ginamit sa drug buy-bust operation.

Kasong paglabag sa Republic Act 9165 o Comprehensive Dangerous Drugs Act of 2002 ang naarestong suspek. —sa panulat ni Angelica Doctolero

Patay ang isang mangingisda makaraang masabugan ng sariling dinamita sa bayan ng Jomalig, Quezon Province.

Kinilala ang biktima na si Jayson Madera Eusebio, 32-anyos na residente ng Barangay Apad, sa nabanggit na lugar.

Base sa nakuhang impormasyon ng mga otoridad, nangingisda ang biktima sa tapat ng kanilang barangay sakay ng kanyang bangka nang agad na sumabog ang improvised dynamite o mas kilala sa tawag na “bigas-bigas” na kanyang sinindihan.

Nabatid na hindi agad nito naihagis ang dinamita na agad sumabog sa kanyang katawan dahilan para magkalasog-lasog ang ulo, mga braso at kamay ng biktima. —sa panulat ni Angelica Doctolero

Pinaghahanap na ng mga otoridad ang suspek sa pagpatay sa isang tricycle driver sa Dasmarinas City, Cavite.

Base sa imbestigasyon ng mga otoridad, nagmamaneho ang biktima sakay ang kaniyang pasahero sa nabanggit na lugar nang paulanan ng mga bala ng hindi pa nakikilalang suspek at mabilis na tumakas matapos ang krimen.

Dead on arrival sa ospital ang biktimang driver habang nakaligtas naman sa pananambang ang sakay na pasahero.

Sa ngayon, inaalam pa ng mga otoridad ang motibo sa pagpaslang. —sa panulat ni Angelica Doctolero

Arestado sa tupada ang limang indibidwal kabilang na ang isang senior citizen sa Valenzuela City.

Sinalakay ng mga tauhan ng Northern Police District-District Special Operation Unit (NPD-DSOU) ang lugar kung saan, nalambat sina Benjamin Adriano, 65 years old; Jerico Badjao, 29 years old; Manuelito Depala, 54 years old; Nelson Adriano, 39 years old at John Redondo, 39 years old.

Ayon sa NPD-DSOU, nakatanggap sila tawag mula sa isang concerned citizen tungkol sa  nagaganap na iligal na sabong sa Block 9 Lot 1, Pinalagad, Barangay Malinta, Valenzuela City.

Agad na pinuntahan ng mga pulis ang lugar at doon inabutan ang grupo ng mga kalalakihan kung saan, nasasam ang dalawang patay na manok na ginamit bilang panabong kasama ng tari at 1,950 na bet money.

Nahaharap ngayon sa Presidential Decree No.449 o Illegal Cockfighting at Illegal Gambling ang mga naarestong suspek. —sa panulat ni Angelica Doctolero

Umabot na sa critical stage ang sitwasyon sa South Cotabato dahil sa patuloy na paglobo ng COVID-19 cases sa mga nakalipas na araw.

Kinumpirma ni South Cotabato Governor Reynaldo Tamayo Jr. na nagsimula nang mapuno ng COVID patients ang mga pampubliko at pribadong ospital sa lalawigan.

Sa ngayon ay mayroon ng 489 active COVID-19 cases sa South Cotabato matapos maitala ang additional 228 cases sa nakalipas na dalawang araw.

Kabilang anya sa mga nagpositibo ang 62 personnel ng South Cotabato Provincial Hospital sa Koronadal City.

Ang nasabing pagamutan ay mayroong kabuuang 109 COVID patients, kabilang ang animnapung naghihintay sa Emergency room dahil sa kakulangan ng hospital beds.

Tiniyak naman ni Tamayo na ginagawa na nila ang lahat ng paraan upang i-maximize ang resources sa ospital habang pinalawak pa sa 60 beds ang capacity o higit pa upang ma-accommodate ang iba pang pasyente.