RONDA PROBINSYA

Arestado ang apat na miyembro ng isang pamilya matapos magtago ng limang taon sa kasong pagpatay sa isinagawang operasyon ng mga pulis sa lalawigan ng Masbate.

Kinilala ang mag-aamang sina Elesor Gamgam; mga anak nitong sina Jomar Gamgam, Eleser Gamgam at Jovert Gamgam.

Ayon sa mga otoridad, ang mag-aama ay responsable sa pagpatay at sa bigo pang pamamaslang sa kanilang kapit-bahay.

Kung saan, matapos ang krimen ay nagtago sa batas hanggang sa mahuli ng mga pulis sa kasong murder at frustrated murder. —sa panulat ni Kim Gomez

Patay ang mag-asawang magka-angkas sa motorsiklo matapos pumasok sa Edsa busway at masalpok ng bus sa Quezon City.

Kinilala ang mga nasawi na sina Leonilo Roquino at Juanita Roquino.

Arestado naman ang driver ng bus na si Jonathan Villanueva.

Ayon sa mga otoridad, binabagtas ng bus ang Balintawak patungong Cubao nang pumasok sa linya ang motorsiklo ng mag-asawa.

Sinubukan pang iwasan ng driver ng bus ang motorsiklo ngunit nahagip pa rin at tumilapon ang mag-asawa at agad na nasawi sa pinangyarihan ng aksidente.

Samantala, nakatakdang sampahan ng kasong Reckless Imprudence Resulting in Multiple Homicide and Damage to Property ang driver ng bus. —sa panulat ni Kim Gomez

Kalaboso ang isang babae matapos mahulihan ng hinihinalang shabu sa isinagawang buy-bust operation sa Manila.

Kinilala ang suspek na si Madonna B. Romaguera.

Nakumpiska kay Romaguera ang 700 gramo ng shabu na nagkakahalaga ng limang milyong piso.

Nakakulong at nakatakdang nang sampahang ang suspek ng patong-patong na kaso. —sa panulat ni Kim Gomez

Hinuli ang dalawang babae sa isang isolation facility sa Negros Occidental matapos umanong magpakita ng pekeng RT-PCR tests nang dumating sa probinsya galing Maynila.

Ayon kay Provincial Incident Management Team head Zeaphard Gerhart Caelian, natuklasang huwad ang COVID test results ng dalawa nang i-scan nila ang mga ito.

Nakatakdang sampahan ng kaukulang reklamo ang dalawang suspek na kalauna’y nagpositibo rin sa virus.

Narekober ang walang buhay na 8 anyos na batang babae sa isang kanal sa barangay Dolores, Taytay, Rizal.

Ayon sa Taytay Municipal Police Station, natagpuan ng ilang residente ang bangkay na isang linggo ng nawawala matapos mapansin ang masangsang na amoy sa isang kanal sa kanilang lugar.

Kaugnay nito, inimbitahan ng otoridad ang ama ng bata at inamin na siya ang pumaslang sa kaniyang anak matapos na gahasain.

Samantala, nahaharap sa kasong rape with homicide ang suspek. —sa panulat ni Airiam Sancho

Laglag sa kamay ng mga awtoridad ang dalawang umano’y tulak ng ipinagbabawal na droga sa ikinasang buy-bust operation sa Brgy. Pamplona Tres, Las Piñas City.

Kinilala ang mga suspek na sina Federico Domingo at Floriza Macapagal, kapwa nakatira sa naturang lugar.

Bukod sa buy-bust money na dalawang daang piso, nakumpiska rin sa operasyon ang hinihinalang shabu na may street value na 45,560 pesos.

Nakakulong na ngayon ang mga suspek at nakatakdang sampahan ng kaukulang reklamo.

Arestado ang isang lalaki matapos mahulihan ng mahigit isang daang libong pisong halaga ng hinihinalang shabu sa P. Mariano St., Brgy Ususan sa lungsod ng Taguig.

Sa buy-bust operation nahuli ang suspek na si Axl John Mariano, 25 taong gulang, at nagtatrabaho sa City Administrator’s Office.

Bukod sa limang daang pisong buy-bust money, nakuha rin mula kay Mariano ang tinatayang labinlimang gramo ng umano’y shabu na nagkakahalaga ng 102,000 pesos at isang pitaka.

Kasong paglabag sa comprehensive dangerous drugs act ang isasampang reklamo laban sa suspek.

Kalaboso ang isang lalaki matapos umanong mahuling nagbebenta ng ipinagbabawal na droga sa Guillermo St., Brgy. Bayanan Muntinlupa City.

Kinilala ang suspek na si Romel De Guzman, nakatira sa nasabing barangay.

Maliban sa buy-bust money na dalawang daang piso, nasabat din mula kay De Guzman ang mahigit isang gramo ng hinihinalang shabu na tinatayang nagkakahalaga ng mahigit sampung libong piso.

Sasampahan ang suspek ng reklamong paglabag sa comprehensive dangerous drugs act.

Nasakote ng mga awtoridad ang tatlong indibidwal na matagal nang tinutugis ng batas sa magkahiwalay na operasyon sa Metro Manila.

Sa Brgy. Bayanan, Muntinlupa, huli ang rank no. 10 top most wanted person na si Juanito Solema na may kasong robbery (hold -Up) sa isang korte at aabot sa isang daang libong piso ang itinakdang piyansa laban sa akusado.

Sa Infanta St., Brgy. Olympia, Makati City, arestado rin ang isang Guillermo Buluran na may kasong kriminal sa isang korte sa lungsod.

Sa Brgy. Wawa, Taguig City, timbog ang isa pang wanted person na si Jimuel Diaz na may nabinbin ding warrant of arrest na ipinalabas ng Taguig RTC dahil sa kasong kriminal.

Samantala, ayon sa pamunuan ng Southern Police District (SPD), hindi hadlang sa kanila ang pandemya para maipagpatuloy ang kampanya kontra droga at kriminalidad.

Arestado ang tatlong indibidwal, kabilang ang isang lolo, dahil sa iba’t ibang paglabag sa Makati City.

Kinilala ang mga suspek na sina Ricardo Dadivas, John Patrick Espino, at Luisito Espino.

Nabatid sa pulisya na nahuli ang tatlo habang nagsusugal sa Coronado St., Brgy. Guadalupe Viejo kung saan nasabat mula sa kanila ang kalibre .38 baril, pinatuyong dahon ng marijuana, hinihinalang shabu na nagkakahalaga ng higit 8,000 piso, at pera na 560 pesos.

Mahaharap ang mga suspek sa mga reklamong illegal gambling, illegal possession of firearms & ammunition na may kaugnayan sa gun ban, at paglabag sa comprehensive dangerous drugs act.