RONDA PROBINSYA

Arestado ang isang lalaking online seller matapos madiskubre na mga endangered, exotic at mga wild animal ang ibinebenta nito sa Bagong Silang, Caloocan City.

Ayon sa Caloocan City Police, nadakip ang hindi pinangalanang suspek sa isinagawang Buy-bust operation ng Anti-illegal Logging Task Force ng DENR.

Nakatanggap ng sumbong ang pulisya hinggil sa iligal na aktibidad ng lalaki na nagsimula umanong magbenta ng mga exotic na hayop simula noong COVID-19 pandemic.

Kabilang sa mga nakumpiska sa suspek ang isang PHILIPPINE eagle-owl, salt water crocodile at isang ball python.

Nahaharap ang lalaki sa kasong paglabag sa Wildlife Resources Conservation and Protection Act.  —sa panulat ni Mara Valle

Patay ang isang lalaki matapos pugutan ng kaniyang pinsan sa San Fernando City, La Union.

Kinilala ang biktimang si Bienvenido Bautista Jr., 64- anyos at suspek na si Eduardo Marzo, 63- anyos, kapwa residente ng Barangay Pagdalagan Norte.

Ayon sa San Fernando City Police, nagluluto sa bahay si Bautista nang biglang dumating si Marzo na armado ng jungle bolo at walang pasintabing pinagtataga ang pinsan at pinugutan ng ulo.

Kakalabas pa lamang ni Marzo ng kulungan dahil din sa kasong pagpatay sampung taon na ang nakalilipas.

Paghihiganti ang nakikitang motibo ng suspek sa karumal-dumal na pagpatay habang balik-kulungan si Marzo at posibleng maharap sa panibagong kasong Murder.  —sa panulat ni Mara Valle

Arestado ang mag-live in partner makaraang mahulihan ng higit P1.3M halaga ng droga sa Pagbilao, Quezon.

Kinilala ang mga suspek na sina Jhon Nico Reyes Talingting at Sharmaine Lecaros Ferreras.

Narekober ng mga pulis ang 14 na plastic sachet ng shabu at P10K marked money.

Samantala, nahahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.  —sa panulat ni Mara Valle

Dead on arrival sa ospital ang isang binata matapos pagsasaksakin ng sariling ama sa Sariaya, Quezon.

Kinilala ang biktimang si Edrian Quejano, 19- anyos at Amang si aRnold, 46- anyos.

Ayon kay Col. William Angway, Hepe ng Sariaya Municipal Police, sinita umano ni Arnold ang anak dahil umano sa katamaran nito na nauwi sa pagtatalo.

Inundayan ng saksak ng suspek sa iba’t ibang bahagi ng katawan ang biktima na naging sanhi ng agad nitong pagkamatay.

Samantala, nasa kustodiya na ng mga otoridad ang nakatatandang Quejano na posibleng maharap sa kasong Parricide.  —sa panulat ni Mara Valle

Arestado ang isang lalaking nagnakaw ng motorsiklo ng kaniyang kaibigan sa Quezon City.

Ayon sa hindi pinangalanang biktima, tinutulungan niya pa umano sa mga bayarin ang hindi rin nabanggit na suspek dahil sa kapos ito at may tuberculosis pa ito.

Aniya, nagulat na lang umano siya nang tangayin ng kaibigan ang kaniyang motorsiklo.

Samantala, matapos mahuli ay umamin ang suspek sa kaniyang kasalanan, humingi ito ng tawad sa biktima at hiniling na huwag na lang ituloy ang pagsasampa ng kaso.

Ngunit desidido na umano ang biktima na kasuhan ang suspek ng Qualified Theft. —sa panulat ni Mara Valle

Umabot sa 18 bahay ang naapektuhan ng sunog sa isang residential area sa Barangay Bagumbayan, Taguig City.

Base sa imbestigasyon, mabilis na kumalat ang apoy na gawa umano sa mga light materials.

Ayon sa mga otoridad, nang inspeksiyonin ang lugar ay narekober ang ilang mga baril at bala.

Patuloy pang iniimbestigahan ng mga otoridad ang insidente. —sa panulat ni Angelica Doctolero

Nauwi sa patayan ang pag-aaway ng mag-utol na kinilalang sina Jerry at Jesus Cabiling sa Angono, Rizal.

Base sa imbestigasyon ng mga otoridad, masayang nag-iinuman ang magkapatid at nang malasing ay nauwi sa away kung saan, napatay si Jerry Cabiling matapos pagsasak-sakin sa ibat-ibang parte ng katawan gamit ang isang kutsilyo.

Nadakip naman sa follow-up operation ng mga otoridad makaraang tumakas ang suspek at kapatid nitong si Jesus Cabiling na nahaharap sa kasong homicide. —sa panulat ni Angelica Doctolero

Arestado ang dalawang suspek sa ikinasang drug buy-bust operation ng mga otoridad sa Rodriguez, Rizal.

Kinilala ang mga suspek na sina Calvin Asotado at Robert Faller na nakuhanan ng 11 piraso ng transparent plastic sachet ng shabu na may timbang na 12 gramo at nagkakahalaga ng 81,600 pesos, ilang mga paraphernalia, buy bust money at cash na ginamit sa operation.

Sasampahan ang mga suspek ng paglabag sa RA-9165 Sec. 5 at 11 Art. 2.  —sa panulat ni Angelica Doctolero

Aabot sa 850 laptops ang ipinamahagi ng Olongapo City Government sa mga pampublikong guro.

Ang nasabing mga laptop ay itinurn-over para sa unang batch na pinondohan mula sa special educational fund na malaking tulong sa kasalukuyang estado ng edukasyon sa bansa.

Ayon sa  pamahalaang lokal ng lalawigan, magsasagawa sila ng ikalawang batch sa buwan ng Pebrero kung saan aabot sa 650 piraso ng laptops ang kanilang ipamamahagi. —sa panulat ni Angelica Doctolero

Inaresto ng mga otoridad ang apat na indibidwal matapos maaktuhang nagsusugal sa Ecoland Terminal, Brgy 76-A, Davao City.

Kinilala ang mga nadakip na sina, Joel Compo Bunod, 42-anyos; Oloy Delan, 52-anyos; Noel Burilla Saberon, 50-anyos; at Mansor Ewa Son na pawang mga garbage collector.

Ayon sa mga tauhan ng Ecoland Police Station, nakatanggap sila ng tip mula sa isang concerned ciizen tungkol sa iligal na aktibidad ng mga suspek.

Nakuha sakanila ang isang set ng baraha at 240 pesos na bet money.

Nasa kustodiya na ng mga otoridad ang mga suspek at nahaharap sa kasong Illegal Gambling. —sa panulat ni Angelica Doctolero