RONDA PROBINSYA

Patay ang tatlong tirador ng baka at kalabaw habang isang pulis ang sugatan matapos ma-engkwentro ang mga otoridad sa Camarines Sur.

Inaalam pa ng mga operatiba ang pagkakakilanlan ng tatlong napatay na suspek.

Isinugod naman sa pinakamalapit na ospital ang lider ng operating team na si Police Senior Master Sergeant Reuben Pesigan makaraang magtamo ng sugat sa katawan.

Ayon sa Police Regional Office, na­mataan ang anim na suspek na pawang mga nakamotorsiklo at nang sitahin ay biglang pinagbabaril ang mga pulis dahilan para magkaroon ng palitan ng putok hanggang sa bumulagta ang tatlo at nakatakas naman ang tatlo pang kasamahan nito.

Nakuha sa mga napaslang ang mga kalibre ng baril, mga bala at isang motorsiklo.

Sa ngayon, tinutugis na ng mga pulis ang hindi pa kilalang tatlong suspek na tumakas. —sa panulat ni Kim Gomez

Arestado ang isang kolehiyala na supplier ng shabu sa isang buy bust operation sa Camarines Sur.

Kinilala ang suspek na si Sheena May Armendi Bazar, 21 anyos na itinuturing na high value target personality ng Philippine Drug Enforcement Agency (PDEA).

Nasabat dito ang dalawang plastic na may lamang shabu na nagkakahalaga ng P350K.

Nakakulong at sinampahan ang suspek sa kasong paglabag sa Comprehensive Dangerous Drugs Act of 2002. —sa panulat ni Kim Gomez

Bumagsak sa first quarter ng school year 2021-2022 ang 275 estudyante sa grade 10 mula sa iba’t- ibang eskwelahan sa Camarines Norte.

Ayon kay Schools Division Superintendent Nympha Guemo, ito ay base sa naging datos ng ahensya noong November 2021.

Iginiit ni Guemo na hindi man ito kasing dami ng mga nasa sekundarya pero dapat itong mabigyang pansin.

Kumpiyansa si Guemo na kaya pang magawan ng paraan para matulungan ang mga estudyante sa natitirang dalawang quarter sa nasabing taon.

Samantala, hinimok ni Guemo ang lahat ng mga guro at magulang na magtulungan para sa mga estudyante. —sa panulat ni Angelica Doctolero

Hinuli sa ikinasang anti-illegal drug buy-bust operation ang isang high value target sa Brgy. Bibincahan, Sorsogon City.

Kinilala ang suspek na si Cedric Repia Galit, 21-anyos na residente ng Purok 6, Brgy. Boton sa bayan ng Casiguran, Sorsogon.

Nakuha sa suspek ang dalawang sachet ng marijuana leaves na may timbang na 35 gramo na nagkakahalaga ng 3,000 piso kasama ng isa pang sachet na naglalaman ng mahigit-kumulang limampung gramo na shabu na may street value na 340,000.

Kasong paglabag sa Seksyon 5 at 11 ng Art. 2 ng RA 9165 o ang Comprehensive Dangerous Drugs Act of 2002 ang inarestong suspek. —sa panulat ni Angelica Doctolero

Binuksan sa publiko ang Library and Information Center sa Sorsogon kasunod ng pagbubukas ng museo kung saan, matatagpuan ang nasabing aklatan.

Ayon sa website ng naturang ahensya, maaaring ma-avail ang mga mag-aaral ang iba’t-ibang serbisyo kabilang na ang 20,000 E-Books na maaaring mabasa.

Bukod pa dito, mapapakinabangan din ang internet services ng library para sa online research.

Samantala, nagpaalala naman ang pamahalaang lokal ng Sorsogon na panatilihin ang pagsunod sa minimum health protocols para mapanatiling ligtas ang lahat ng gagamit ng library. —sa panulat ni Angelica Doctolero

Arestado ang isang barangay tanod matapos ikasa ang drug buy-bust operation sa Sitio Tagmaya, Bgy. Sapa, Bataraza, Palawan.

Kinilala ang naarestong suspek na si Along Muhammad Kim, 34-anyos na nakuhanan ng apat na sachet na pinaghihinalaang shabu kasama ng ilang mga drug paraphernalia.

Nahaharap ngayon sa kasong paglabag sa RA 9165 o Comprehensive Dangerous Drugs Act of 2002 ang naarestong tanod. —sa panulat ni Angelica Doctolero

Isang lalaki ang natagpuang walang buhay makaraang magbigti umano sa loob ng banyo ng pinapasukang trucking company sa Navotas City.

Ayon sa katrabaho ng hindi pinangalanang biktima, nagkarga pa umano sila ng mga itatapong basura sa Parañaque City.

Gayunman, nang hinahanap na niya ang kasamahan ay hindi ito nakita kaya’t nagpasyang pumunta sa banyo kung saan tumambad sa kanya ang nakabigting katawan ng 37 anyos na biktima.

Napagalaman naman ng Navotas City Police na may problema sa pamilya ang lalaki habang inaalam pa kung may foul play.  —sa panulat ni Mara Valle

Putol ang kamay ng isang dalagita matapos maipit sa sprocket ng motorsiklo sa Tagkawayan, Quezon.

Kinilala ang biktima na si Rosiel Candor, 16 na taong gulang.

Ayon sa Tagkawayan Municipal Police, naka-angkas ang biktima sa motorsiklo ng kuya nitong si Ronald Candor at habang nasa pababang bahagi ng highway ay nahulog ang sling bag ng dalagita sa gulong ng motorsiklo.

Sinubukang kunin ni Rosiel ang bag na sumabit sa sprocket pero nahila ng kadena ang kamay nito.

Tuluyang kinain ng sprocket ang kamay ng biktima bago naihinto ng kapatid ang motorsiklo.

Bagaman naisugod pa sa Maria Lourdes Eleazar General Hospital ang biktima, hindi na naisalba ang kamay nito. —sa panulat ni Mara Valle

Umabot na sa 88% ng populasyon sa Bacolod City ang nabakunahan na kontra sa COVID-19.

Ayon kay Bacolod Mayor Evelio Leonardia, lagpas na sila sa herd immunity matapos mabakunahan ang 523K katao mula sa 590K residente nito.

Layon ng lungsod na hanapin pa ang 67k residente nito upang maabot 100% ng kanilang vaccination rate.

Nitong miyerkules, nasa 100.78 bagong kaso ang naitala sa Bacolod city para sa kabuuang 26,208 kaso. —sa panulat ni Abigail Malanday

Nananatili sa ‘very high risk classification’ ang Cebu City dahil sa patuloy na pagtaas ng kaso ng COVID-19.

Ayon sa OCTA Research Group, nasa 722 bagong kaso ang naitala mula Enero 19 hanggang 25 na mas mataas sa 325 na naitala nitong nakaraang Linggo.

Habang umakyat sa 31 hanggang 69 ang average daily news cases para sa 100k katao.

Samantala, tumaas din ang seven-day positivity rate ng Cebu City sa 36% mula sa 40%. —sa panulat ni Abigail Malanday