RONDA PROBINSYA

Hindi umubra ang tikas at yabang ng isang mekaniko nang maglabas ito ng baril sa pampublikong lugar matapos arestuhin ng mga awtoridad sa Purok 4, Barangay Putatan, Muntinlupa City.

Kinilala ang suspek na si Jeffrey Sison, 41 taong gulang, at residente ng nasabing lungsod.

Nabatid na nagsasagawa ng anti-carnapping operation ang mga pulis sa lugar nang bigla umanong maglabas ng improvised firearm o pen gun na naglalaman ng dalawang bala ng kalibre .38 baril.

Ayon kay Southern Police District (SPD) Director PBGen Jimili Macaraeg, sasampahan ang suspek ng reklamong paglabag sa omnibus election code (Comelec) gun ban at illegal possession of improvised firearms & ammunition.

Laglag sa kamay ng mga awtoridad ang anim na indibidwal sa magkahiwalay na anti-drug operations sa Pateros at Pasay.

Sa E. Quiogue Street, Brgy. Aguho, Pateros, nadakip sa buy-bust operation sina Myko Bayanin, Mykel Bayanin, at Rowena Villace kung saan nasabat mula sa kanila ang tatlong daang pisong buy-bust money at 6,800 pesos na halaga ng hinihinalang shabu.

Sa Lim-an St., Brgy. 4, sa Pasay, timbog naman sina Geronimo Jacobe, Glenn Barba, at Jose Labadia kung saan nakumpiska sa operasyon ang dalawang daang pisong buy-bust money at halos 22,000 pesos na halaga ng umano’y shabu.

Nakakulong na ngayon ang mga suspek at nakatakdang sampahan ng kaukulang reklamo.

Nagwakas naman ang maliligayang araw ng isang lalaking wanted sa kasong rape at pangmomolestiya matapos madakip ng mga awtoridad sa C5 Road, Western Bicutan, Taguig City.

Kinilala ang naaresto na si Rolando Fuselero Jr., alyas Kuyakol, 21 taong gulang, nakatira sa nasabing lugar.

Nahuli si Fuselero sa bisa ng warrant of arrest na inilabas ng Taguig RTC dahil sa kasong rape at acts of lasciviousness.

Walang inirekomendang piyansa ang korte laban sa akusado.

Timbog ang dalawang lalaki na matagal nang tinutugis ng batas sa magkahiwalay na operasyon ng mga elemento ng Southern Police District (SPD).

Ayon kay SPD Director PBGen Jimili Macaraeg, unang naaresto sa Barangay Ipil 1, Silang, Cavite si Joemar Parado na may kasong homicide sa isang korte sa Muntinlupa City kung saan aabot sa 40,000 pesos ang itinakdang piyansa laban sa akusado.

Sa BF Homes, Parañaque, nasakote naman ang top 3 most wanted person na si Robert Damasco na may kasong attempted murder sa isang korte sa Allacapan, Cagayan.

Aabot naman sa 120,000 pesos ang inirekomendang piyansa ng korte para sa pansamantalang paglaya ng akusado.

Naghihimas ngayong ng malamig na rehas na bakal ang dalawang indidbiwal dahil sa iba’t ibang paglabag kasunod ng ikinasang operasyon ng mga elemento ng Southern Police District (SPD).

Sa Brgy. San Antonio, Parañaque, arestado ang drug suspect na si Mendy Logmao matapos mahulihan ng halos dalawang daang libong pisong halaga ng umano’y shabu.

Sa Brgy. 94, Pasay City, timbog ang graphic artist na si Marcelo Cabansag dahil sa umano’y pamemeke ng COVID-19 vaccination cards na ibinebenta naman sa mga hindi bakunadong indibidwal.

Sasampahan ng kaukulang reklamo ang mga naturang suspek.

Timbog ang isang kilabot umanong tulak ng droga sa ikinasang Oplan Galugad ng mga pulis sa Admiral Road, Brgy. Talon Tres, Las Piñas City.

Kinilala ang suspek na si Freddie Caballero, 38 taong gulang, at nakatira sa nasabing lungsod.

Nabatid na sinita ng mga pulis si Caballero dahil wala itong suot na face mask pero dito na nakuhanan ng umano’y ipinagbabawal na droga na nagkakahalaga ng halos pitong libong piso.

Sasampahan ang suspek ng reklamong paglabag sa comprehensive dangerous drugs act.

Nagwakas ang maliligayang araw ng dalawang lalaki na matagal nang tinutugis ng batas matapos madakip ng Las Piñas PNP.

Unang nahuli si Elly Boy Delumen sa Balanga City, Bataan na may kasong carnapping sa isang korte sa Las Piñas kung saan nasa 180,000 pesos ang itinakdang piyansa laban sa akusado.

Samantala, sa Mabalacat City, Pampanga, nasakote si Orien Roca na may kasong attempted murder sa isang korte.

Aabot naman sa 120,000 pesos ang inirekomendang piyansa ng korte laban sa akusado.

Bagsak sa kulungan ang isang 41 taong gulang na lalaki matapos mahulihan ng patalim sa Pulang Lupa Dos, Las Piñas City.

Kinilala ang suspek na si Gerald Hilom, residente ng ABC Compound sa nasabing lugar.

Nagsumbong sa mga pulis ang isang residente nang mahuli niya sa kanilang bakuran si Hilom na may dala umanong patalim.

Mahaharap ang suspek sa reklamong illegal possession of bladed weapon na may kaugnayan sa Omnibus Election Code.

Arestado ang tatlong katao habang nailigtas ang tatlo pang babae matapos salakayin ng mga otoridad ang isang sex den sa Nueva Vizcaya.

Kinilala ang mga suspek na sina Jualita Morales, 40 anyos; Paul Butal Jr., 47 anyos, at Ashley Santos 20 anyos.

Habang ang tatlong babaeng nasagip sa operasyon ay hindi pinangalanan.

Ayon kay Police Major Jesus Ventura, Hepe ng Bayom­Bong Police, nakatanggap sila ng impormasyon kaugnay sa ginagawang pambubugaw ng mga suspek sa ilang kababaihan na dinadala sa isang boarding house na ginagawang sex den.

Nakakulong na at sasampahan ng kaukulang kaso ang mga suspek. —sa panulat ni Kim Gomez

Kalaboso ang isang lider ng Sarimos Crime Syndicate na sangkot sa illegal drug trade at gun-for-hire sa isinagawang buy bust operation sa Cavite.

Kinilala ang suspek na si Joel Perez Sarimos alias “joel”, 40 anyos.

Ayon sa ulat ng mga otoridad, nang magkaabutan ng droga at pera, agad hinuli ang suspek at nasabat ang dalawang plastic sachet ng shabu at walong boodle money kasama ang isang genuine P500 bill na ginamit sa operasyon.

Nakakulong na at nahaharap sa kaukulang kaso ang suspek. —sa panulat ni Kim Gomez