RONDA PROBINSYA

Maglulunsad ang Municipal Health Office ng lalawigan ng Quezon ng sarili nitong bersyon ng National Vaccination Days (NVD) upang mabakunahan ang mas marami nilang kababayan kontra Covid-19.

Ayon kay Municipal health Officer Dr. Ronald Mararac, isasabay sa pagbabakuna ang mga batang edad 5 hanggang 11 taong gulang sa darating na Pebrero.

Samantala, umaabot na sa mahigit pitumput pitong porsyento ng target eligible population ng lalawigan ang naturukan na ng first dose, habang mahigit pitumput apat na porsyento ang fully-vaccinated na.– Sa panulat ni Kim Gomez

Sinuspinde ang mga pagbabakuna sa Bayan ng M-lang mula Enero a-27 hanggang Enero a-30.

Ayon kay Municipal Vaccination Coordinator Perla Piang, nagpakita ng mild symptoms ng Covid-19 ang 9 na vaccinators sa nasabing lungsod.

Gayunpaman, umaasa si Piang na ang mga nahawaang frontliners, kabilang ang mga doktor at nars, ay gagaling sa loob ng pitong araw.

Samanatala, ipinag-utos ni Mayor Russel Abondao na i-disinfect ang lahat ng vaccination hubs sa bayan upang mapigilan ang pagkalat pa ng virus. –Sa panulat ni Kim Gomez

Nakapagtala ang General Santos City ng dalawang kaso ng Omicron variant.

Ayon sa lokal na pamahalan ng lungsod, ang unang pasyente ay isang 26 anyos na babae, asympthomatic, habang ang pangalawa ay sesenta’y dos anyos na lalaki nakakaramdam ng mild symptom ng covid-19.

Kung saan, isa sa apat na natukoy na close contact ng unang pasyente ang lumabas na positibo sa sakit habang apat ang nahawa sa pitong taong na-exposed sa pangalawang pasyente.

Ang parehong mga pasyente at ang mga nahawaang close contacts ay kasalukuyang nagpapagaling at stable na ang kondisyon.  —sa panulat ni Kim Gomez

Mas pinaigting pa ng Zamboanga City Health Office (CHO) ang anti-dengue drive sa lungsod.

Ayon kay assistant city health officer Dr. Cathy Garcia, tuloy-tuloy ang search & destroy strategy sa Barangay Putik na isa sa mga nakapagtala ng maraming kaso ng dengue sa siyudad.

Sa kasalukuyan, pumalo na sa 123 dengue fever cases ang naitala sa Zamboanga ngayong taon kung saan dalawa sa mga biktima ang nasawi.

Patay ang 12 katao habang sugatan ang 11 iba pa, matapos humarurot ang kanilang sinasakyang van dahilan ng pagkabaliktad sa isang kanal sa Central Mexico.

Ayon sa mga otoridad, naganap ang aksidente sa isang tulay malapit sa siyudad ng Lagos De Moreno, na nagkokonekta sa Central States ng Guanajuato at Jalisco.

Pito sa mga nasawi ay na-trap pa sa loob ng sasakyan. —sa panulat ni Abby Malanday

Nasagip sa umano’y cybersex den sa Barangay Limaha sa Butuan City ang walong kabataan na edad 14 hanggang 16.

Isinagawa ang operasyon ng National Bureau of Investigation (NBI) at ng Regional Police Women and Children Protection Center, batay sa impormasyon mula sa Federal Bureau of Investigation (FBI).

Ayon sa FBI, na-monitor ang mga cybersex den kung saan dayuhang pedophiles ang kostumer.

Naaresto ang operator ng cybersex den  pero nakatakas ang isa pa dala ang batang edad tatlong taong gulang.

Tinatayang tatlong taon nang nag-ooperate ang den na sangkot din umano sa Online Trafficking of Children. —sa panulat ni Abby Malanday

Nagpositibo sa COVID-19 ang pitong bata sa Virac Town sa Catanduanes matapos paglaruan ang medical waste na itinapon sa bisinidad ng kanilang barangay.

Ayon sa mga otoridad, naglalaro sa 3 hanggang 11 ang edad ng mga bata na pinaglaruan ang mga syringes na itinapon sa baybayin ng barangay Concepcion.

Ang isa namang babae na sumaway sa mga bata ay nagpositibo rin sa COVID-19.

Agad na isinailalim sa isolation ang mga bata at nakatakdang isailalim sa RT-PCR testing sa Lunes.

Inako naman ng isang laboratoryo ang nangyari ang humingi na paumanhin sa council ng barangay. —sa panulat ni Abby Malanday

Sugatan ang apat na kataong sakay ng 12-wheeler truck matapos mahulog ang kanilang sinasakyan sa ilog na may lalim na 80 feet sa Majayjay sa Laguna.

Ayon kay Laguna Provincial Police Office Director Police Colonel Rogart Campo, galing sa Bacolor sa Pampanga ang truck na may lamang buhangin.

Dadalhin sana ang buhangin sa town proper, pero dahil sa lagpas sa 5 tons ang bigat ay hindi na nakayanan ng dinaanan nitong tulay na bakal na 5 tons lamang ang capacity.

Maaaring sampahan ng kasong Reckless Imprudence Resulting to Damage to Property ang driver dahil dumaan ito sa tulay kahit sobrang bigat ng dala.

Patuloy namang ginagamot sa ospital ang mga nasugatan na nakapagtala ng minor injuries.

Pinayuhan ang mga dumadaan sa tulay na gamitin ang alternatibong ruta sa bayan ng Liliw. —sa panulat ni Abby Malanday

Nabuking ang itinatago umanong droga ng isang lalaki matapos itong sitahin dahil sa hindi pagsusuot ng face mask sa lungsod ng Aguirre Road, Pilar Village, Brgy. Pilar, Las Piñas City.

Kinilala ang suspek na si Joden Jordan, 26 taong gulang, nakatira sa nasabing lungsod.

Nabatid na nasita si Jordan ng mga pulis habang nagsasagawa ng Oplan Galugad dahil wala itong suot na face mask.

Dito na nakumpiska ang mahigit anim na libong pisong halaga ng umano’y shabu mula kay Jordan na ngayo’y nahaharap sa kaukulang reklamo.

Naaresto na ng mga awtoridad ang top 19 most wanted person ng Parañaque City Police.

Kinilala ang akusado na si Christopher Boyles, 47 taong gulang, at nakatira sa nasabing lungsod.

Si Boyles na may kasong three counts ng child abuse cases at three counts ng paglabag sa Anti-Photo & Video Voyeurism Act sa isang korte sa Parañaque.

Mahigit anim na raang libong piso (666,000 pesos) ang itinakdang piyansa para sa pansamantalang paglaya ng akusado.