RONDA PROBINSYA

Patay sa bakbakan ang dalawang miyembro ng New Peoples Army (NPA) habang naaresto naman ang dalawa pa matapos makaengkwentro ang mga sundalo sa Lamana, Barangay Kibalagbag, Malaybalay City sa Bukidnon.

Sa pahayag ni 8th Infantry Battalion (IB) at Civil Military Operations (CMO) Officer 1st Lt. Abigail Lorenzon, hindi muna isinapubliko ang mga pangalan ng mga rebelde para narin sa kaligtasan ng dalawa pang naaresto.

Narekober sa lugar ang tatlong cal. 45 pistols, isang 9mm pistol, limang magazine, medical supplies, mga bala at pagkain.  —sa panulat ni Angelica Doctolero

Nasabat ng mga tauhan ng Philippine Drug Enforcement Agency (PDEA) ang nasa P3.4M halaga ng shabu matapos ikasa ang Buy-bust operation sa Mabalacat, Pampanga.

Kinilala ang suspek na si Dennis Balaba, 45-anyos na isinailalim sa ilang buwang surveillance.

Nakuha sa suspek ang limang pirasong plastic sachet na naglalaman ng humigit-kumulang 500 gramo ng shabu at marked money na ginamit ng undercover agent para sa transportasyon.

Nahaharap ngayon si Balaba sa kasong paglabag sa Republic Act 9165 o Comprehensive Dangerous Drugs Act of 2002.  —sa panulat ni Angelica Doctolero

Hinuli ng mga otoridad ang isang lalaki makaraang magbirong magpapasabog ng granada sa isang checkpoint sa Davao City.

Ayon sa mga tauhan ng Task Force-Davao, isang Telecommunications Technician na 42-anyos ang nagdeklarang may bitbit na granada.

Agad na umaksiyon ang mga otoridad at naaresto ang suspek na ngayon ay nahaharap sa kasong paglabag sa Presidential Decree No. 1727 o Anti-Bomb Joke Law.  —sa panulat ni Angelica Doctolero

Aabot sa mahigit 500 mga baboy ang pinatay ng mga otoridad matapos tamaan ng african swine fever ang Purok San Lorenzo sa Barangay Apopong, General Santos City.

Ayon sa Regional Animal Disease Diagnostic Laboratory, nagpositibo sa ASF ang mga blood sample na ipinadala noong Enero a-24 dahilan para patayin ang mga nasabing baboy.

Binayaran naman ang mga apektadong backyard raiser ng P5,000 para sa inahin at  barako; P3,000 sa grower at P1,000 naman para sa bawat biik.

Samantala, nilinaw naman ng Lokal na Pamahalaan sa lalawigan na isolated incident lamang ang naitalang ASF sa lungsod.  —sa panulat ni Angelica Doctolero

Ikinatuwa ng mga healthcare worker sa Bicol ang inilaang P1.85B pondo na inaprubahan ni Pangulong Rodrigo Duterte para sa mga hindi pa nakatatanggap ng Special Risk Allowance o SRA.

Ayon kay Dr. Eric Raborar ang Medical Chief Bicol Regional Training and Teaching Hospital, hindi nila inaasahan na mabibigyan sila ng nasabing insentibo dahil marami umano sa kanila ang hindi pa nakatanggap ng SRA mula sa gobyerno.

Sinabi ni Raborar na malaking tulong ang perang ibibigay ng gobyerno para mapataas ang moral ng mga Medical worker sa gitna pandemya. —sa panulat ni Angelica Doctolero

Winasak ng otoridad ang mahigit P2.170M Marijuana mula sa apat na cultivation sites sa lalawigan ng Ilocos Sur.

Kabilang dito ang Sitio Nagawa, Brgy. Caoayan, Sitio Bekes, Brgy.Tacadang, Kibungan at Benguet na may lawak na 1,550 sqm kung saan nadiskubre ang 10, 850 na pananim ng nasabing ilegal na damo.

Agad namang pinagbubunot ng otoridad ang mga marijuana at sinunog ito.

Samantala, walang nadatnang cultivator sa mga nasabing lugar. -sa panulat ni Airiam Sancho

Inanunsyo ng lokal na pamahalaan ng Baguio City na magbibigay na rin sila ng booster shots sa mga turista simula ngayong araw, January 31 hanggang sa February 5.

Maaaring magpabakuna ang mga turista mula alas-8 ng umaga hanggang alas-2 ng hapon sa SM Baguio 1 parking ngayong araw, sa Miyerkules at sa Sabado.

Bukas din para sa mga turistang magpapa-booster ang Baguio Country Club Cordillera Hall sa February 1 at University of Baguio Gymnasium sa February 3 at 4.

Kinakailangan lang ng mga turista na magpakita ng qr code mula sa baguio local government unit, valid id, at vaccination card o certificate na nakalagay ang petsa kung kailan natanggap ng huling dose ng COVID vaccine.

Arestado ang mag-asawa sa ikinasang buy-bust operation ng mga tauhan ng Dinalupihan Municipal Police Station sa Barangay Sapang Balas, Dinalupihan, Bataan.

Kinilala ang mag-asawa na sina Diosdado Cortez Romero, 54-anyos, at Fatimah Quimada Abella na nakuhanan ng 4 na maliit na pakete ng shabu, marked money na ginamit sa buy-bust at isang cal.38 na baril kasama ng mga bala nito na nakalagay sa isang bag.

Aminado ang mag-asawang suspek na gumagamit sila ng iligal na droga at inaangkat pa raw umano nila ito mula sa Caloocan City.

Ayon sa mga otoridad, matapos makatanggap ng impormasyon kaugnay sa iligal na gawain ng mag-asawa ay agad silang nagsagawa  ng surveillance.

Nahaharap ngayon sa kasong paglabag sa pinaigting na Dangerous Drugs Law at Illegal Possession of Firearms and Ammunitions ang mag-asawang suspek.  —sa panulat ni Angelica Doctolero

Sugatan ang apat na indibidwal matapos mahulog ang isang 10 wheeler truck sa gumuhong tulay sa Barangay San Isidro, Majayjay, Laguna.

Kinilala ang mga biktima na sina Jielan Benlot, 34-anyos; Noel Clemente, 43-anyos; Den Fernandez, 44-anyos at Jeffrey Primo, 29-anyos.

Ayon sa Majayjay MDRRMO, mabilis na isinugod sa Laguna Medical Center ang mga sugatang biktima para sa paunang lunas sa kanilang natamong sugat.

Sa imbestigasyon ng mga otoridad, ipinilit na idaan sa isang bakal na tulay ang naturang truck na dapat ay tanging mga pampasaherong jeep, tricycle at motorsiklo lang ang maaaring makagamit.

Dahil dito, pansamantalang lulusong sa ilog ang libo-libong redidente ng dalawang bayan para sa kanilang pang-araw araw na gawain.   —sa panulat ni Angelica Doctolero

Nagsagawa ang Zamboanga City Health Office ng larvicide application operation sa Barangay Putik ng nasabing lungsod upang matugunan ang tumataas na kaso ng dengue fever.

Ayon kay Assistant CHO Health Officer Dr. Cathy Garcia, na ang Barangay Putik ay isa sa mga barangay na may mataas na kaso ng dengue sa lungsod.

Gayunpaman, hindi sinabi ni Garcia kung ilan ang kaso ng dengue sa nasabing nayon maliban na lamang na nakapagtala ng kabuuang isang daan at dalawamput tatlong kaso ng dengue sa iba’t ibang barangay na may dalawang nasawi simula noong Enero taong kasalukuyan.

Samantala, pinayuhan ni Garcia ang mga magulang na agad na magpatingin sa doktor kapag nagpakita ng sintomas ng dengue ang kanilang mga anak upang maiwasan ang karagdagang komplikasyon. — Sa panulat ni Kim Gomez