RONDA PROBINSYA

Timbog ang apat na katao matapos mahulihan ng mga smuggled cigarettes ng mga tropa ng Philippine Coast Guard (PCG) sa Zamboanga City.

Kinilala ang mga suspek na sina Sakili Adong Lim, sina Samri Mohammad Hadjula Nasri at Sahiban Arabasa Alfadzri.

Nasabat ng PCG ang 1.2 milyong halaga ng smuggled na sigarilyo.

Habang ang mga nahuling suspek ay nanatili sa kustodiya ng Zamboanga City Maritime Police Station at hinahanda ang kaukulang kasong laban sa mga suspek. —sa panulat ni Kim Gomez

Kalaboso ang dalawang lalaking nagbebenta ng droga sa isinagawang buy-bust operation ng mga pulis sa Negros Occidental.

Kinilala ang mga suspek na sina Jesther Soquena alyas “Bong” at Biboy Dacumos, kapwa residente ng Bacolod City.

Nakumpiska sa mga suspek ang 390 grams ng shabu na tinatayang nagkakahalaga ng 2,652,000 pesos, isang green paper bag, isang kotse na may plakang PNR: YJA224, at isang black plastic garbage bag.

Kinasuhan ang mga suspek ng paglabag sa Republic Act 9165 o ang “Comprehensive Dangerous Drugs Act of 2002.” —sa panulat ni Kim Gomez

Patay ang siyam na miyembro ng Moro Islamic Liberation Front (MILF) habang tatlo ang sugatan matapos tambangan ng mga armadong lalaki mula sa separatistang grupo sa malagim na clan war sa Guindulungan, Maguindanao.

Kinilala ang mga sugatan sina Anwar Dimasinsil, Mangi Mamasainged at Banarin Luma­Lag.

Habang ang mga nasawi ay sina Peges Mamasainged alyas Commander Black Magic, Sadam Mamasainged, Sadre Mamasainged, Johari Mamasainged, Kamaro Mamasainged, isang alyas Tani at tatlo pa na pawang mga aktibong miyembro ng milf.

Agad na sinugod ang mga sugatan sa pinakamalapit na pagamutan upang malapatan ng lunas.

Sa ngayon, patuloy pang inaalam ng mga otoridad ang sanhi ng nasabing pananambang sa mga rebelde. —sa panulat ni Kim Gomez

Inihayag ng Ministry of Health (MOH) na mas mataas ang vaccination rate sa mga island provinces ng Basilan, Sulu at Tawi-Tawi o Basulta kumpara sa mainland provinces sa ilalim ng Bangsamoro Autonomous Region in Muslim Mindanao (BARMM).

Ayon sa MOH, ang basulta ay may average na kabuuang saklaw ng pagbabakuna na 30.11%, habang ang mga lalawigan ng mainland ay may average na saklaw na 20.79%.

Ito’y matapos nasertipika ng mga doktor na ang mga bakuna ay halal at ligtas at ibinibigay sa lahat ng mga residente nang libre.

Samantala, binigyang-diin ni Assistant Health Secretary Dr. Abdulhalik Kasim ang kahalagahan ng wastong koordinasyon upang matugunan ang pag-aalangan sa bakuna at pataasin ang kumpiyansa at tiwala sa bakuna ng komunidad. —sa panulat ni Kim Gomez

Naabo ang mahigit 100 bahay matapos sumiklab ang sunog sa ilang barangay sa Cavite City.

Ayon sa mga tauhan ng Bureau of Fire Protection (BFP) Cavite Provincial Office, mabilis kumalat ang apoy dahil karamihan sa mga bahay na tinamaan ng sunog ay gawa umano sa light materials.

Ayon sa imbestigasyon ng mga otoridad, 30 minutong nawalan ng kuryente ang lugar at nang bumalik ang kuryente, napansin ng mga residente ang biglang pagsiklab ng apoy sa mga kabahayan.

Wala namang naitalang nasawi o nasugatan sa naganap na sunog.

Sa ngayon, pansamantalang mananatili sa Ladislao Diwa Elementary School sa barangay 20 ang mga nasunugan. —sa panulat ni Kim Gomez

Kalaboso ang tatlong lalaki matapos mahulihan ng shabu sa magkahiwalay na buy bust operation na isinagawa sa Negros Occidental.

Kinilala ng Western Visayas Regional Police, ang mga suspek na sina Jesther Soquena at Biboy Dacumos, sa Barangay 21, Victorias City habang nahuli si Mark Daniel Angas sa Purok Kabulakan 1, Barangay Singcang, Bacolod City.

Nasmsam ng mga otoridad ang nasa 705 grams o P3.4M halaga ng shabu na nagkakahalaga sa halos P4.8M halaga.

Ang tatlong naarestong suspek ay itinuturing na “high-value target” sa kampanya laban sa droga at nakatakdang kasuhan ng paglabag sa comprehensive dangerous drugs law.  —sa panulat ni Kim Gomez

Patay ang isang miyembro ng New People’s Army (NPA) matapos maka-engkwentro ang mga militar sa Alegria, Surigao Del Norte.

Kinilala ng mga militar, si Ricky Vocales Rosaldo alyas “kenz”. Miyembro ng isang platoon sa ilalim ng North-Eastern Mindanao Regional Committee’s Guerrilla Front 16.

Narekober ng tropa ng mga militar ang isang improvised explosive na may detonating device, blasting cap, magazine para sa m16 rifles, at bandolier. —sa panulat ni Kim Gomez

Malubha ang kalagayan ng isang lalaki sa ospital matapos pukpukin sa ulo ng kaniyang kasamahan sa trabaho sa Tondo, Manila.

Kinilala ang biktima na si Jason Sapuan,31 anyos, at ang suspek na si Arvin Maiz, 36 anyos, kapwa helper sa nasabing lugar.

Ayon sa Manila Police District (MPD), madalas binu-bully ng biktima si Maiz na nagtanim ng galit. Tiniyempuhan niya na abala sa paglalaro ng cellphone si Sapuan saka pukpukin ng tatlong beses para mailabas ang kaniyang galit.

Nakakulong at sasampahan ng mga otoridad ng kaukulang kaso laban sa suspek. —sa panulat ni Kim Gomez