RONDA PROBINSYA

Arestado ang 5 babae sa Atimonan, Quezon matapos magpatakbo ng sex den.

Ayon sa National Bureau of Investigation (NBI), kinilala ang mga suspek na sina; Renita Francia, Rowena Abo, Lyra Riego, Josefina Devilles at Mary Anne Alvarez na nagpapatakbo ng Kingfisher lodge hotel and videoke bar.

Inamin naman ng mga suspek ang akusasyon at nagsabing nag-aalok sila ng panandaliang-aliw sa kanilang mga kliyente.

Agad na iti-nurn over ang 5 sa social welfare office ng lungsod na nahaharap sa kasong human trafficking. —sa panulat ni Abby Malanday

Inihayag ng Department Agriculture Regional Field Office-Region 2 (DA-RF02) na magpapatuloy ang subsidy ng fertilizer para sa mga magsasaka sa Cagayan Valley habang nananatiling mataas ang presyo ng farm input sa bansa.

Ayon kay DA-RFO2 Executive Director Narciso Edillo, lumiit ang supply ng fertilizer na nagmumula sa ibang bansa.

Dadag pa ni Edillo na nananatiling mahal ang transport cost at inuuna ng mga bansang gumagawa ng fertilizers ang kanilang domestic agriculture at binabawasan ang quota nito para sa export.

Gayunpaman, binigyang diin ng opisyal, na ang fertilizer program sa ilalim ng Rice Resiliency Project 2  (RRP2) ay masusustinihan upang maipagpatuloy ang produksyon ng palay sa rehiyon ngayong tag-araw na panahon ng pagtatanim.

Samantala, ipinaliwanag din ni Edillo na ang mga magsasaka na dati nang nabigyan ng supply ng libreng binhi at nakarehistro sa Registry System for Basic Sectors in Agriculture (RSBSA) ng ahensya ay kwalipikadong tumanggap ng supply ng libreng abono mula sa DA. – sa panulat ni Kim Gomez 

Tatanggap na ng 1,000 unvaccinated foreign travelers ang Mactan Cebu International Airport simula Marso a-1.

Ayon kay Cebu Governor Gwendolyn Garcia, batay sa sinabi ni Mactan Cebu International Airport Authority Manager Julius Neri, ito ay para hindi agad mapuno ang mga quarantine hotels sa lungsod.

Una nang nagpalabas ng kautusan ang Cebu City Government nitong Pebrero a-nuwebe, kung saan papayagang makapasok ang hindi pa nababakunahang dayuhan basta magpapakita ng negatibong rt-pcr test.

Susundan pa ito ng swab test pagdating sa quarantine facility at magka-quarantine hanggang lumabas ang result. —sa panulat ni Abby Malanday

Nasa low risk classification na sa Covid-19 ang lahat ng probinsya sa Calabarzon

Ito ay matapos ibaba sa low risk classification ang Batangas dahil sa pagbuti ng health care utilization at positivity rate.

Ayon kay OCTA Research Group Fellow Dr. Guido David, bumaba sa 31% ang hospital bed occupancy sa probinsya mula sa dating 36%.

Habang bumaba sa 8% mula sa 10% ang positivity rate o bilang ng mga indibidwal na nahahawa sa Covid-19 sa Batangas.

Ang Calabarzon ay kinabibilangan ng Cavite, Laguna, Batangas, Rizal at Quezon. —sa panulat ni Abby Malanday

Inaresto ng Philippine National Police (PNP) sa Guagua Pampanga ang isa sa most wanted person’s ng Department of the Interior and Local Government (DILG).

Ayon kay PNP Chief General Dionardo Carlos, nanggaling ang ulat sa Pampanga Police Provincial Office (PPO).

Kinilala ang naaresto na si Crispin Jimenez, 34 anyos sa operasyon sa Jose Abad Santos Avenue sa Guaguna barangay Matias.

May patong na P130,000 sa ulo si Jimenez na wanted sa dalawang counts ng rape.

Binati naman ni Carlos at ni PPO Director Brigadier General Mattew Baccay ang mga opisyal na umaresto kay Jimenez. —sa panulat ni Abby Malanday

Kalaboso ang dalawang estudyante na nagtutulak ng marijuana sa Gamu, Isabela.

Kinilala ang mga suspek na sina Mj Balauag, 19 na taong gulang at  si alyas ‘arniel’, labing anim na taong gulang.

Ayon kay Col. Julio Go, Hepe ng Gamu Municipal Police Station, huli sa aktong nagbebenta ng marijuana ang dalawang suspek sa pulis na nagpanggap na poseur buyer.

Narekober sa dalawa ang isang tea-bag ng marijuana, isang cellphone, 500 peso cash at pulang motorsiklo na walang plaka na sinakyan ng mga suspek.

Nahaharap sa kasong paglabag sa RA 9165 o Comprehensive Dangerous Drugs Act of 2002 ang dalawang estudyante habang isinailalim sa counselling si Arniel sa DSWD. Ng nasabing bayan.

Isang binatilyo ang nagtangkang tumalon mula sa isang cellsite tower sa San Miguel, Bulacan.

Ayon sa San Miguel Municipal Police, nakatanggap sila ng ulat mula sa mga residente ng Barangay Camias na may isa umanong lalaki ang umakyat sa tower na tila tatalon.

Napag-alaman ng mga otoridad na disi sais anyos pa lang ang lalaki na dumaranas ng matinding depresyon.

Agad rumesponde ang San Miguel Rescue, BFP. – san miguel at ang first scout ranger regiment upang pigilan ang lalaki sa kanyang tangkang pagpapakamatay.

Sa tulong ng mga residente at pagpupursige ng mga rescuer, napapayag ang binatilyo na bumaba sa tore makalipas ang apat na oras.

16 na bayan sa Region 2 o Cagayan Valley ang idineklarang African Swine Fever (ASF) free na.

Ayon kay Regional Executive Director Narciso Edillo ng D.A. – Region 2, karamihan sa mga idineklarang ASF Free ay mula sa lalawigan ng Isabela na may 11; tig-iisa sa Cagayan at Nueva Vizcaya habang tatlo sa Quirino.

Kabilang sa mga ASF free ang mga bayan ng Benito Soliven, Burgos, Cordon at Echague sa Isabela; Solana sa Cagayan; bagabag sa Nueva Vizcaya at Aglipay sa Quirino.

Inilagay na ang mga nasabing lugar sa pink zone mula sa red na nangangahulugang maaari na muling mag-alaga ng baboy.

Pagkatapos ng anim na buwan na wala nang maitatalang ASF ay maari na muling ilipat sa yellow mula sa pink zone.

Aminado naman si Edillo na may naitatala na namang kaso ng ASF sa Cagayan partikular sa mga frozen meat na nakalulusot pa rin sa mga checkpoint.

Dapat anyang gumawa ng paraan ang mga local government unit dahil sila ang may kontrol sa kanilang mga palengke upang hindi makalusot ang mga frozen meat.

Patay ang tatlo at limang taong gulang na magkapatid matapos masunog ang kanilang bahay sa Barangay Tubectubang, Moncada, Tarlac.

Kinilala ang magkapatid na sina Prince Rolan Ferolino, limang taong gulang at Princess Sophia na tatlong taong gulang.

Base sa imbestigasyon ng mga otoridad, napabayaan ang nakasinding katol kung saan mabilis na nagliyab ang kanilang bahay dahil gawa umano ito sa light materials.

Nakaligtas naman ang ina ng magkapatid na agad isinugod sa ospital matapos malapnos ang malaking bahagi ng kaniyang katawan.

Patuloy pang iniimbestigahan ng mga otoridad ang naganap na insidente. —sa panulat ni Angelica Doctolero

Nasagip ng mga tauhan ng Philippine Coast Guard (PCG) ang anim na pasahero kabilang na ang tatlong bata matapos masira ang makina ng bangkang kanilang sinasakyan sa bahagi ng Little Coco Island sa Basilan.

Ayon sa PCG, patungo sana sa Sacol Island sa Zamboanga City ang mga pasahero nang biglang magkaproblema ang sinasakyang motorized banca.

Sakto naman na may nagpapatrolyang mga tauhan ng PCG sakay ng BRP malamawi at namataan ang nasabing mga pasahero.

Nasagip ang anim na pasahero matapos ang dalawang oras na palutang lutang sa dagat.

Agad namang hinila ng PCG ang bangka patungong daungan ng Zamboanga City habang dinala na muna sa PCG Southwestern Mindanao ang mga nasabing pasahero. —sa panulat ni Angelica Doctolero