RONDA PROBINSYA

Natagpuang patay sa isang bakanteng lote sa Sison, Pangasinan isang araw matapos mawala ang anak ng isang Overseas Filipino Workers.

Ayon kay Police Major Katelyne May Awingan, PIO Pangasinan-PPO, posibleng ginahasa ng mga salarin ang 23-anyos na dalaga kung saan, napilitang umuwi ng Pilipinas ang ina ng biktima matapos malaman ang sinapit ng kaniyang anak.

Humihingi ngayon ng hustisya ang Ina ng biktima at nananalangin na sanay ma-konsensya at sumuko ang gumawa ng karumaldumal sa kaniyang anak.

Sa ngayon, planong isailalim sa autopsy ang biktima habang hinihintay nalang ang persons of interest at testimonya sa ginawang imbestigasyon kaugnay sa naganap na krimen. —sa panulat ni Angelica Doctolero

Nagbalik loob na sa pamahalaan ang 14 na miyembro ng Bangsamoro Islamic Freedom Fighters (BIFF) sa Midsayap, North Cotabato sa mismong araw ng mga puso.

Ayon kay Army’s 34th Infantry Battalion Commander Lt/Col. Edgardo Vilchez Jr., unang sumuko ang Field Commander ng BIFF na si alias Malayo sa ilalim ng Karialan Faction kasama ang 12 tagasunod.

Sinundan naman ito sa araw ding iyon ng isa pang BIFF combatant na sumuko at nakilala sa alias na Nick Taro na nagmula sa Northern Kabuntalan sa Maguindanao.

Kasamang isinuko ng mga bandido ang kani-kanilang armas na pawang matataas ang kalibre tulad ng M1 Garand Rifles, Springfield Cal. 30 Sniper Rifle, 7.62mm M14 rifle, 5.56mm M16 rifle, RPG, Cal .45 pistols at mga bala nito.

Pormal na sinaksihan ng Pamahalaang Bayan ng Midsayap at North Kabuntalan ang nangyaring pagsuko gayundin ng matataas na opisyal ng Armed Forces of the Philippines (AFP).

Patay ang isang drug suspek sa ikinasang operasyon ng Philippine National Police (PNP) sa Mandaue City Cebu na nagresulta sa pagkakasabat ng halos 7 milyong pisong halaga ng iligal na droga.

Kinilala ni PNP Chief P/Gen. Dionardo Carlos ang napatay na drug suspek na si Jomar Espinoza, 27 anyos at residente ng Brgy. Tejero, Cebu City.

Napatay si Espinoza matapos makipagpalitan ng putok sa mga pulis na nagkasa ng operasyon habang nakatakas ang kasabwat nito na siyang tinutugis na rin sa kasalukuyan.

Nagawa pang dalhin sa Eversley Sanitarium si Espinoza dahil sa tinamo nitong sugat subalit hindi na ito umabot at idineklarang dead on arrival.

Narekober sa pinangyarihan ng engkwentro ang may 1000 gramo ng hinihinalang shabu na nagkakalahalaga ng 6.8 million pesos.

Babala ni Carlos, hindi nila tatantanan ang pagsugpo sa iligal na droga na siyang salot sa lipunan at sumisira sa buhay gayundin sa kinabukasan ng mga kabataan.

Nagsilikas ang nasa 300 pamilya dahil sa mga patayan at karahasan ng naglalabanang armadong grupo ng mga Moro sa lalawigan ng Maguindanao.

Ayon sa militar, nagsasagawa na ng hakbang ang mga awtoridad upang maresolba ang “rido” o “clan war” sa Sultan Kudarat kasunod ng engkuwentro ng nag-aawayang pamliya na naging dahilan upang magsilikas ang libong indibiduwal na naiipit sa bakbakan.

Hinikayat naman kahapon ni Major Gen. Juvymax Uy, Commander ng 6th Infantry Division ng Philippine Army ang mga lokal na opisyales na pumagitna at pahupain ang naglalabang grupo upang maiwasang maapektuhan ang iba pang mga residente sa lugar.

Samantala, kasalukuyan na umanong kumikilos ang ceasefire committee ng Moro Islamic Liberation Front (MILF) upang resolbahin ang rido sa pagitan ng dalawang grupo na sinasabing mga kasapi rin ng MILF. - sa panulat ni Mara Valle

Nasawi ang isang binata matapos malunod habang naliligo sa Taal lake sa Batangas.

Kinilala ang biktimang si Jonathan More, 25 anyos.

Ayon sa mga otoridad, naliligo sa lawa ang biktima kasama ang isang kaibigan nang biglang lumubog at mawala.

Bagaman sinaklolohan si More, natagpuan itong walang malay kaya’t dinala agad sa Metro Lipa Medical Center kung saan ito binawian ng buhay matapos ang kalahating oras.

Inalis na ng Local Government Unit ng Davao City ang modified liquor ban matapos ang isang taong paghihigpit sa gitna ng COVID-19 pandemic.

Base sa Executive Order na inisyu ng Lokal na Pamahalaan, papayagan nang makapag benta ng mga alak o nakakalasing na inumin ang mga tindahan mula alas-8 ng umaga hanggang alas-1 ng madaling araw.

Kabilang din sa mga papayagan ang mga establisyimento, mga Restaurant, bar, videoke, at Hotel pero ipinagbabawal pa rin ang pag-inom ng alak sa mga parke, kalsada at eskinita.

Inalis na rin ang mga regulasyon sa lahat ng aktibidad ng Barangay maging ng Local at National offices.

Ang pag-alis ng restriksiyon sa nasabing lugar ay bunsod ng magkakasunod na araw ng mababang bilang sa arawang kaso ng COVID-19. —sa panulat ni Angelica Doctolero

Sugatan ang dalawang pulis matapos ang pag-ambush ng mga tauhan ng New People’s Army (NPA) sa Bayan sa Negros Occidental.

Kinilala ang dalawang sugatang pulis na sina LT. Charles Richard Casalan, Deputy police ng nasabing presinto, at Binalbagan Corporal Julius Tranquillero.

Ayon kay Police Maj. Ellendie Rebusquillo, sakay ng patrol car ang mga pulis nang bigla silang pagbabarilin ng mga rebeldeng grupo.

Sugatan din sa insidente ang isang residente na aksidenteng tinamaan ng ligaw na bala.

Nakikipag-ugnayan na ang mga otoridad sa Philippine Army upang tugisin ang responsable sa pananambang.  —sa panulat ni Angelica Doctolero

Nanaksak matapos madepressed ang isang lalaking nahirapan umano sa pagbabawas ng kaniyang timbang sa Tagum City, Davao Del Norte.

Ayon sa imbestigasyon, isang 26-anyos na lalaking kinilalang si Jayson Torredo ang pumasok sa isang Mall sa nabanggit na lugar saka sinaksak ang isang Promodiser at isang Security guard.

Kinilala ang mga biktima na sina Sherwin Bustamante, 23-anyos, isang Promodiser at Security officer na kinilalang si Ronald Costan, 45-anyos na parehong kritikal sa ospital.

Sa naging pahayag ng Ama ng suspek, nakararanas umano ng depresyon ang kaniyang anak matapos bigong mamayat sa kabila ng matinding pagda-diet at pag-ehersisyo nito.

Ayon sa mga otoridad, nagdulot ng takot sa mga tao ang insidente dahila para kanilang barilin ang suspek dahilan ng agarang pagkasawi ni Torredo.