Patay ang isang dalaga sa Guinobatan, Albay matapos tuklawin ng ahas habang naliligo.
Kinilala ang biktima na si Jovielyn Cervantes, 18 taong gulang.
Ayon sa Guinobatan Municipal Police, naisugod pa sa ospital ang biktima pero binawian din ng buhay matapos turukan ng anti-venom treatment.
Samantala, hindi pa mabatid kung anong uri ng ahas ang tumuklaw sa dalaga. —sa panulat ni Mara Valle
Bumagsak sa 45 ang aktibong kaso ng COVID-19 sa City of San Fernando mula sa 196 nitong nakalipas na linggo.
Batay sa pinakahuling bulletin, dalawang bagong nahawa sa COVID-19 ang nadagdag sa bilang, 15 nakarekober at walang nasawi.
Nangunguna ang Dolores Village na may 7 aktibong kaso ng COVID-19, sinundan ng San Agustin na may lima at apat sa bulaon.
Nasa 15 barangay naman sa lugar ang COVID-19 free. —sa panulat ni Abigail Malanday
Inaresto ng Masbate Police ang isang Local Government Employee sa pamamagitan ng search operation sa Cataingan Town sa Masbate Province.
Kinilala ito na si Florian Abejero, 45 anyos na sinilbihan ng arrest warrant sa Barangay Poblacion.
Narekober dito ang 22 sachet o 80 gramo ng shabu na nagkakahalaga ng P480K, drug paraphernalia at calibre 38 revolver.
Itinuturing din ng high-value target si Abejero sa lugar. - sa panulat ni Abigail Malanday
Arestado sa isang Buy-Bust Operation ang dalawang suspek sa San Mateo Town sa Rizal Province matapos makuhanan ng P10K halaga ng shabu at iligal na armas.
Ayon sa CALABARZON Police, kinilala ang mga suspek na sina Robinson Capistrano at Arnel Candelario.
Dakong 11:35 naganap ang transaksyon kung saan nagbenta umano ng shabu ang isang Undercover Cop sa Barangay Banaba.
Agad na ikinulong ang dalawa dahil sa paglabag sa Comprehensive Dangerous Drugs Act of 2002, firearms laws at election period gun ban. —sa panulat ni Abigail Malanday
Inaresto ng mga otoridad ang limang dayuhan matapos makuhanan ng marijuana makaraang bumisita sa kilalang tattoo artist na si Apo Whang-Od sa Barangay Buscalan, Tinglayan, Kalinga.
Kinilala ang mga suspek na sina mark adrian aguilar, 18-anyos; Andrie Punsalan, 21-anyos; Ramil Limtoyoco Dela Cruz, 21-anyos; Alvin Triplett Medel, 24-anyos at Mark Joseph Dela Pena, 23-anyos.
Base sa imbestigasyon, naharang sa checkpoint ang mga suspek kung saan, aabot sa 17 bricks ng dried marijuana leaves ang nakuha na may timbang ng mahigit 20 libo at nagkakahalaga ng 2.5 million pesos.
Paglabag sa Republic Act 9165 o Comprehensive Dangerous Drugs Act of 2002 ang kasong kakaharapin ng limang suspek. – sa panulat ni Angelica Doctolero
Dalawang koreanong lalaki na wanted sa International Police (InterPol) arestado sa Angeles City, Pampanga.
Ayon sa Angeles City Police, hinuli ang 37 at 38 anyos na hindi pinangalanang mga suspek sa loob ng isang mall sa Clark sa tulong ng Consular Officer ng South Korean Embassy.
Wanted ang dalawang dayuhan at nasa ilalim ng “red notice” dahil sa kasong fraud.
Nasa kustodiya na ang dalawa ng Bureau of Immigration-Fugitive Search Unit. —sa panulat ni Mara Valle
Timbog ang isang bagitong pulis matapos mang-holdap ng gasolinahan sa lungsod ng Sto. Tomas, Batangas.
Kinilala ang suspek na si Patrolman Glen Angoluan, na nakatalaga sa Laguna Police Provincial Mobile Force Company.
Ayon sa mga otoridad, umamin si Angoluan sa panghoholdap at idinahilan nito na nagawa niya ang krimen dahil nabaon siya sa utang bunga ng pagkalulong sa online sabong.
Nabatid na nasangkot na rin ang suspek sa ilan pang insidente ng panghoholdap sa ilang convenience store sa lalawigan.
Samantala, mahaharap ang suspek sa kasong administratibo at maaaring masibak sa serbisyo. —sa panulat ni Mara Valle
Kulong ang tatlong indibidwal na hinihinalang sangkot umano sa investment scam matapos ikasa ang Entrapment operation ng mga tauhan ng National Bureau of Investigation (NBI) sa Zamboanga City.
Kinilala ang mga naaresto na sina Francis Arthur Dalguntas, Rehan Tamorda, at Farha Sali na hinuli dahil sa pangloloko kung saan, nangako ang mga ito sa mga biktimang aplikante na ibabalik ang 15% hanggang 20% income sa kanilang ininvest na pera pero hindi umano ito nangyari.
Ayon sa mga bikitima, nakipagkasundo ang mga suspek na P20K na halaga ng mga produktong pampaganda ang kanilang makukuha kasama ng P100K na halaga ng insurance kapalit ng kanilang P10K na puhunan.
Hawak na ngayon ng mga otoridad ang mga suspek na nahaharap sa kasong may kaugnayan sa Securities Regulation Code. —sa panulat ni Angelica Doctolero
Aabot sa 10.5 million pesos na halaga ng ari-arian ang naabo o napinsala makaraang matupok ang warehouse ng isang hardware sa Barangay Tejero, Cebu City.
Dakong ala-6 kagabi nang magsimulang lamunin ng apoyang warehouse ng Pentax Hardware sa Benedicto Street.
Ayon sa Cebu City Fire Office, umabot sa unang alarma ang sunog at naapula makalipas ang halos isang oras.
Inihayag ni Edward Garcia, may-ari ng naturang establisyimento na karamihan ng nilalaman ng warehouse ay household equipment.
Wala namang nasugatan dahil nakauwi na ang mga empleyado habang inaalam na ng mga otoridad ang sanhi ng pagkalat ng apoy.
Isang family driver ang patay matapos umanong hampasin sa ulo ng brick cement at putulan ng ari ng kanyang amo sa Tugbok, Davao City.
Kinilala ng Tugbok District Police Station ang biktimang si Danilo Aranzo, 51 anyos.
Ayon kay Lt. Jeffrey Bangcas, deputy commander ng Tugbok Police Station, mag-a-ala syete noong Lunes ng gabi nang dumating si Aranzo sa bahay ng amo sa Barangay Tacunan kasama ang asawa ng suspek.
Pagpasok ng bahay ay biglang hinampas ng suspek na si Alexander Taclucop, 51 anyos ang biktima sa ulo gamit ang isang brick cement.
Agad nawalan ng malay si Aranzo at itinali ang mga kamay nito at pinutulan siya ng ari gamit ang kutsilyo.
Naisugod pa sa Southern Philippines Medical Center ang biktima pero binawian din ng buhay.
Narekober sa crime scene ang kutsilyo at ang brick cement na may isang kilo ang bigat habang naaresto ang suspek na nahaharap sa kasong murder.