RONDA PROBINSYA

Patay ang 2 katao habang 5 ang sugatan matapos bumangga ang kanilang sinasakyan sa isang puno sa Sanchez Mira sa Cagayan.

Ayon kay Chief Master Sargeant Vladimir Enteria, Police Chief Investigator ng Sanchez Mira, kinilala ang mga nasawi na sina Demi Mar Sadoy na namatay on-the-spot at Mark Gil Manantan na idineklarang dead-on-arrival sa ospital.

Posibleng mechanical trouble at human error ang dahilan ng aksidente bunsod ng madulas na kalsada dahil sa sunod-sunod na pag-ulan.

Patungong Claveria town ang mga biktima nang maganap ang aksidente. —sa panulat ni Abby Malanday

Labing anim na indibidwal ang sugatan matapos mahulog sa bangin ang kanilang sinasakyang pampasaherong jeep sa Old Zigzag Road, Barangay Silangang Malicboy, Pagbilao, Quezon.

Bandang alas-3 ng madaling araw kanina nang mangyari ang aksidente.

Dahil madilim at masukal ang lugar ay naging pahirapan ang pag-rescue sa mga pasahero.

Isinugod naman sa Quezon Medical Center sa Lucena City ang mga biktima kung saan karamihan sa mga ito ay nagtamo ng head injury at bone fracture.

Timbog sa entrapment operation ang isang ginang matapos mangikil kapalit ng isang unit ng bahay ng National Housing Authority (NHA) sa Naic, Cavite.

Kinilala ang suspek na si Jesusa Austral, 52 anyos.

Ayon sa Naic Municipal Police, inaresto si Austral sa makaraang tumanggap ng bayad para umano sa “prioritization” sa aplikasyon sa pabahay ng biktimang si Cristal Lasca, 21 anyos.

Disyembre a–28 nang binigyan ni Lasca ang suspek ng 10,000 pesos kapalit ng pangakong magkakaroon siya ng bahay ng NHA.

Gayunman, nadiskubre ng biktima na noong January 20 sa isang tanggapan ng local government unit na walang otorisasyon si Austral upang mag-process ng aplikasyon.

Nahaharap naman ang suspek sa kasong estafa at fraud. —sa panulat ni Mara Valle

Patay matapos pagbabarilin ng mga salarin ang isang babaeng konsehal at kaniyang mister habang abala sa kanilang hapunan sa San Fernando, Cebu.

Kinilala ang mag-asawang biktima na sina Barangay Balungag Councilor Maria Louella at mister niyang si Peter na kakain sana sa labas ng kanilang bahay kasama ang kanilang mga anak nang dumating ang nasa limang salarin saka pinagbabaril ang nasabing pamilya.

Base sa imbestigasyon, pinagnakawan pa umano ng mga salarin ang bahay ng mga biktima at tinangay ang mga pera at mga alahas.

Naisugod pa sa ospital ang mag-asawa pero idineklara silang dead-on-arrival habang nakaligtas naman ang kanilang mga anak.

Ayon sa mga otoridad, posibleng pulitika ang motibo sa krimen dahil tatakbong Municipal Councilor ang anak ng mag-asawa sa darating na eleksiyon.

Sa ngayon, patuloy pang iniimbestigahan ng mga otoridad kung pulitika, negosyo o personal na away ang anggulo sa krimen. —sa panulat ni Angelica Doctolero

Natagpuang patay sa isang bakanteng lote sa Sison, Pangasinan isang araw matapos mawala ang anak ng isang Overseas Filipino Workers.

Ayon kay Police Major Katelyne May Awingan, PIO Pangasinan-PPO, posibleng ginahasa ng mga salarin ang 23-anyos na dalaga kung saan, napilitang umuwi ng Pilipinas ang ina ng biktima matapos malaman ang sinapit ng kaniyang anak.

Humihingi ngayon ng hustisya ang Ina ng biktima at nananalangin na sanay ma-konsensya at sumuko ang gumawa ng karumaldumal sa kaniyang anak.

Sa ngayon, planong isailalim sa autopsy ang biktima habang hinihintay nalang ang persons of interest at testimonya sa ginawang imbestigasyon kaugnay sa naganap na krimen. —sa panulat ni Angelica Doctolero

Nagbalik loob na sa pamahalaan ang 14 na miyembro ng Bangsamoro Islamic Freedom Fighters (BIFF) sa Midsayap, North Cotabato sa mismong araw ng mga puso.

Ayon kay Army’s 34th Infantry Battalion Commander Lt/Col. Edgardo Vilchez Jr., unang sumuko ang Field Commander ng BIFF na si alias Malayo sa ilalim ng Karialan Faction kasama ang 12 tagasunod.

Sinundan naman ito sa araw ding iyon ng isa pang BIFF combatant na sumuko at nakilala sa alias na Nick Taro na nagmula sa Northern Kabuntalan sa Maguindanao.

Kasamang isinuko ng mga bandido ang kani-kanilang armas na pawang matataas ang kalibre tulad ng M1 Garand Rifles, Springfield Cal. 30 Sniper Rifle, 7.62mm M14 rifle, 5.56mm M16 rifle, RPG, Cal .45 pistols at mga bala nito.

Pormal na sinaksihan ng Pamahalaang Bayan ng Midsayap at North Kabuntalan ang nangyaring pagsuko gayundin ng matataas na opisyal ng Armed Forces of the Philippines (AFP).

Patay ang isang drug suspek sa ikinasang operasyon ng Philippine National Police (PNP) sa Mandaue City Cebu na nagresulta sa pagkakasabat ng halos 7 milyong pisong halaga ng iligal na droga.

Kinilala ni PNP Chief P/Gen. Dionardo Carlos ang napatay na drug suspek na si Jomar Espinoza, 27 anyos at residente ng Brgy. Tejero, Cebu City.

Napatay si Espinoza matapos makipagpalitan ng putok sa mga pulis na nagkasa ng operasyon habang nakatakas ang kasabwat nito na siyang tinutugis na rin sa kasalukuyan.

Nagawa pang dalhin sa Eversley Sanitarium si Espinoza dahil sa tinamo nitong sugat subalit hindi na ito umabot at idineklarang dead on arrival.

Narekober sa pinangyarihan ng engkwentro ang may 1000 gramo ng hinihinalang shabu na nagkakalahalaga ng 6.8 million pesos.

Babala ni Carlos, hindi nila tatantanan ang pagsugpo sa iligal na droga na siyang salot sa lipunan at sumisira sa buhay gayundin sa kinabukasan ng mga kabataan.

Nagsilikas ang nasa 300 pamilya dahil sa mga patayan at karahasan ng naglalabanang armadong grupo ng mga Moro sa lalawigan ng Maguindanao.

Ayon sa militar, nagsasagawa na ng hakbang ang mga awtoridad upang maresolba ang “rido” o “clan war” sa Sultan Kudarat kasunod ng engkuwentro ng nag-aawayang pamliya na naging dahilan upang magsilikas ang libong indibiduwal na naiipit sa bakbakan.

Hinikayat naman kahapon ni Major Gen. Juvymax Uy, Commander ng 6th Infantry Division ng Philippine Army ang mga lokal na opisyales na pumagitna at pahupain ang naglalabang grupo upang maiwasang maapektuhan ang iba pang mga residente sa lugar.

Samantala, kasalukuyan na umanong kumikilos ang ceasefire committee ng Moro Islamic Liberation Front (MILF) upang resolbahin ang rido sa pagitan ng dalawang grupo na sinasabing mga kasapi rin ng MILF. - sa panulat ni Mara Valle

Nasawi ang isang binata matapos malunod habang naliligo sa Taal lake sa Batangas.

Kinilala ang biktimang si Jonathan More, 25 anyos.

Ayon sa mga otoridad, naliligo sa lawa ang biktima kasama ang isang kaibigan nang biglang lumubog at mawala.

Bagaman sinaklolohan si More, natagpuan itong walang malay kaya’t dinala agad sa Metro Lipa Medical Center kung saan ito binawian ng buhay matapos ang kalahating oras.

Sumuko sa mga otoridad ang isang lalaki at kinakasama nitong babae na kapwa may katungkulan sa New people’s Army (NPA) sa Caraga region.

Kinilala ang mga rebeldeng sina alyas Wendel, 37 anyos, team leader at alyas Ann-Ann, 32 anyos, Squad Medic ng Sub-Regional Committee 3 – Guerilla Front 4-A sa ilalim ng North Central Mindanao Regional Committee.

Ayon sa Philippine National Police, sumuko ang dalawa sa 1,304th maneuver company ng Regional Mobile Force Batallion 13 at 1st Agusan Del Norte Provincial Mobile Force Company.

Sa ngayon ay kasama na ng dalawa ang kanilang pamilya.—sa panulat ni Mara Valle