RONDA PROBINSYA

Makakapagdaos na muli ang pamosong San Isidro Pahiyas Festival matapos na suspindihin ng halos dalawang taon dahil sa pandemya sa Lucban, Quezon.

Sa bisa ng clearance mula sa Department of Tourism (DOT-Tourism) promotion board muling idaraos ang Festival na magsisimula sa Mayo 10 hanggang Mayo 20 taung kasalukuyan.

Bukas para sa lahat ng mga fully vaccinated individuals at magkakaroon ng online registration para sa mga bisita na nais sumaksi ng pahiyas ngayong taon.

Mahigpit ding ipapatupad ang minimum health protocol katuwang ang mga Local Government Units (LGUs) sa lalawigan.

Samantala, tinanghal ang Lucban bilang no.1 sa buong Region 4-A at lalawigan ng Quezon pagdating sa inoculation dahilan din sa patuloy na pagkamit ng zero COVID-19 cases bawat araw at mababang bilang ng mga nagpositibo sa virus.  – sa panulat ni Kim Gomez 

Patay ang lima umanong rebeldeng New People’s Army kabilang ang isang lumad teacher sa engkwentro sa New Bataan Town sa Davao De Oro.

Sa inilabas na ulat ng 10th infantry division ng Philippine Army, kinilala ang nasawi na sina alyas rain, alyas chad, alyas daday at hindi pa nakikilalang dalawang lalaki.

Nasawi ang mga ito matapos ang 15 minutong pakikipagpalitan ng putok sa mga otoridad.

Naiwan sa lugar ang isang m653 rifle, kalibre 45 na pistol, hand grenade, anti-personnel mine, iba’t ibang pagkain at personal belongings.

Itinanggi naman ng Communist Party of the Philippines (CPP) na kagagawan nila ang nangyari.  – sa panulat ni Abigail Malanday 

Umabot na sa mahigit siyam na milyong piso ang kabuuang halaga ng naabong ari-arian sa apat na magkasunod na sunog sa Iloilo City.

Unang nasunog ang residential structure sa Brgy. Sta Cruz, Arevalo, na nagdulot ng 1.6 million pesos na halaga ng pinsala.

Nasunog din ang isang two-storey residential structure sa Burgos, La Paz na tinatayang aabot sa mahigit 4.3 million pesos ang halaga ng pinsala.

Aabot naman sa 2 million pesos ang halaga ng pinsala matapos maabo ang dalawampung bahay sa Brgy. General Hughes, Iloilo City Proper.

Nasunog  din ang two-storey residential building sa Sta. Rosa Subd., Tagbak, Jaro na nagkakahalaga naman ng 971,000 pesos kung saan, nasawi ang ilang indibidwal.

Dahil dito, planong magbigay ang City Social Welfare and Development Office ng P10,000 cash assistance para sa totally burned women at P7,000 naman para sa partially damaged women. —sa panulat ni Angelica Doctolero

Nasamsam ng mga otoridad ang aabot sa dalawang milyong pisong halaga ng assorted ukay-ukay sa isang bodega sa Lapu-Lapu City, Cebu.

Ayon sa mga tauhan ng NBI-Cebu District Office, walang kaukulang papeles ang naturang mga ukay-ukay na hinihinalang galing sa ibang bansa.

Ayon kay NBI Officer-In-Charge (OIC) Director Eric B. Distor, naglabas ng search warrant ang Regional Trial Court ng Lapu-Lapu City laban sa may-ari na kinilalang si Minj Abatayo kung saan, ang naturang mga produkto ay ibinebenta sa pamamagitan ng online sa negosyong Minj Ukay-Ukay Clothing.

Lumabas sa imbestigasyon ng NBI na ang subject place ng search warrant ay pag-aari ng isang nagngangalang Cressia Cabales-Antonio na sinasabing Manila Based Trader mula sa nakuhang certification sa Camella Homeowners’ Association at statements mula sa mga kawani na nagmamantine ng negosyo ng nasabing employer sa nasabing lugar.

Nakumpiska ang 300 bundles na assorted VIP used clothing na may estimated value na dalawang milyon.

Sa ngayon nahaharap sa RA 4653 o ang Illegal Commercial Importation of Used Clothing/Rugs na may kaugnayan sa Section 6 ng RA 10175 o ang Anti-Cybercrime Prevention Act of 2012 ang naturang suspek. —sa panulat ni Angelica Doctolero

Patay matapos madurog sa concrete mixer ang isang pitong taong gulang na batang lalaki sa Ugac Sur, Tuguegarao City, Cagayan.

Kinilala ang nasawing bata na si Jasper Canap na napag-alamang naglalaro sa Kim Hollow Block Compound kasama ang iba pa nitong mga kalaro na sina Aljon Dave Tumaliuan, 14-anyos; Summer Krent Balubal; Mc Deyvin Atara, 8-anyos; Aeron Fulig, 10-anyos; John Loyd Bulaqui, 7-anyos; Richard Banguilan, 11-anyos; at Richmond Banguilan, 11-anyos.

Base sa imbestigasyon, pumasok sa concrete mixer ang biiktima pero biglang pinagana ng isa sa kaniyang kalaro ang switch nito na nagresulta sa pagkadurog ni Canap.

Gayunman, wala aniyang umaamin sa mga kalaro ng biktima kung sino ang nag-switch sa nasabing mixer machine.

Inaalam na ng mga otoridad ang dahilan ng aksidente.  —sa panulat ni Angelica Doctolero

Patay ang isang taxi driver sa Danao City, Cebu matapos holdapin at pagsasaksakin ng lalaking nagpanggap na pasahero.

Kinilala ang biktimang si Edilberto Manulat, 35 anyos, habang natukoy ang suspek na si Albert Toregoza.

Ayon sa Danao City Police, tinangay ni Toregoza ang 1,400 pesos na kita ni manulat at sinaksak niya rin ito nang dalawang beses.

Naabutan naman sa loob ng taxi ang suspek kasama ang labi ng tsuper matapos makulong dahil ini-lock ng biktima ang mga pintuan ng sasakyan.

Agad naaresto si Toregoza at nahaharap sa patong-patong na kaso. —sa panulat ni Mara Valle

Nakatakdang magsampa ng kaso ang Davao City Government laban sa may-ari ng isang restobar dahil sa paglabag sa COVID-19 protocols at pag-operate ng walang business permit.

Ayon kay Davao City COVID-19 Task Force Spokesperson Dr. Michelle Schlosser, isang viral video ang nakunan sa loob ng Spladoz Restobar sa Illustre Street kung saan hindi nasunod ng mga partygoers ang physical distancing at pagsusuot ng face masks.

Nahaharap sa kasong ilegal na operasyon ng walang permit, kabiguang ipatupad ang Minimum Public Health Standards (MPHS) at paggamit ng safe DQR scanning para sa mga kliyente nito na pumasok sa establisyimento ang may-ari ng restobar.  – sa panulat ni Airiam Sancho 

Patay ang isang senior citizen matapos pagtatagain ng kanyang katrabaho sa loob ng inuupahang bahay sa Lipa City, Batangas.

Kinilala ang biktima na si Ernesto Calis, 62 anyos, habang natukoy ang suspek na si Antonio Castillo, 45 anyos.

Ayon sa Lipa City Police, nasa loob ng inuupahang bahay sa barangay Malitlit si Calis nang dumating si Castillo na may dalang itak, tatakbo pa sana ang biktima pero pinagtataga na ito sa ulo, mukha at katawan.

Tumakas naman ang suspek subalit sumuko rin sa pulisya kalaunan.

Base sa imbestigasyon, matagal ng may alitan sa trabaho ang dalawa. —sa panulat ni Mara Valle

Hinatulan ng 20 taong pagkakabilanggo ng Sandigan Bayan ang dating alkalde ng Aloguinsan, Cebu na si Augustus Caesar Moreno.

Ito’y sa kasong paglabag sa Anti-Graft and Corrupt Practices Act dahil sa paggamit sa kaban ng bayan upang ipambili ng mga pagkain mula sa bakeshop na pagmamay-ari ng kanyang pamilya.

Umabot sa halos 300,000 pisong halaga ng pagkain ang binili gamit ang pondo ng gobyerno mula sa AVG bakeshop na pagmamay-ari ng kanyang misis na si Cynthia.

Nabatid na bukod kay Moreno, makukulong din ang kapwa niya akusadong si Evangeline Manigos, na dating miyembro ng Bids and Awards Committee at Kapwa hindi na makahahawak ng posisyon sa gobyerno. —sa panulat ni Mara Valle

Timbog ang isang lalaking wanted na kukuha sana ng police clearance sa Sta. Cruz, Ilocos Sur.

Kinilala ang naaresto na si Job Riel Junior, 54 anyos.

Ayon sa Sta. Cruz Municipal Police, habang ipinoproseso ang aplikasyon ni Riel, nadiskubre ng mga otoridad na mayroon siyang warrant of arrest na inilabas noong 2016 dahil sa kasong frustrated murder.

Nakasaad sa Mandamyento De Aresto na 200,000 pesos ang piyansa habang kasalukuyang nasa kustodiya na ng Sta. Cruz Police si Riel. —sa panulat ni Mara Valle