RONDA PROBINSYA

Isang delivery rider sa Camarines Norte ang arestado makaraang magpanggap na na-holdap ang koleksyong pera.

Nagtungo sa Paracale Municipal Police ang suspek na si alyas Erick, 29 anyos, residente ng Barangay Dos, bayan ng Mercedes.

Ito’y upang magreklamo na naholdap siya at nakuha ang koleksiyon niyang pera.

Sumbong ni Erick sa pulisya, dalawang lalaki umano ang humarang sa kanya at kinuha ang koleksiyon sa pagde-deliver na umaabot sa mahigit 12,000 pesos.

Gayunman, nagduda ang mga pulis sa kanyang kuwento kaya kinalaunan ay umamin din ang rider na naisugal niya sa online sabong ang pera at natalo.

Dahil dito, inaresto siya ng mga otoridad at mahaharap sa kaukulang reklamo.

Labingtatlo sa dalawamput isang lokalidad sa Pampanga ang nakapagtala ng zero new COVID-19 case nitong February 21.

Batay sa datos ng Epidemiology and Surveillance Unit ng lalawigan, tanging ang siyudad ng San Fernando at Arayat, at maging ang Mexico, Santa Rita, at San Simon ang nakapagtala ng bagong mga kaso.

Hindi naman nakapagsumite ng datos sa provincial government ang Porac, Macabebe, at Sto. Tomas.

Batay sa pinakahuling datos, mayroong  56,403 COVID-19 cases sa Pampanga, kung saan 53,604 ang nakarekober sa sakit habang 2,577 naman ang nasawi.

Arestado ang isang konsehal at walong iba pa sa Bohol matapos mahuling nagsusugal sa bayan ng Jagna.

Kinilala ng lokal na opisyal na si Councilor Pacheco Rances.

Ayon kay Jagna Municipal Police Chief Maj. Marcos Lopez, nagpapatrolya sila sa lugar nang nakita si Rances at mga kasama nitong naglalaro ng mahjong sa isang bahay.

Nabatid na sa ngayon ay hindi pa nagbibigay ng permit sa mga sugalan sa naturang lugar dahil sa COVID-19 restrictions.

Samantala, kakasuhan ang siyam na suspek sa paglabag ng Anti-Gambling Law. —sa panulat ni Mara Valle

Patay sa pananaksak ng sariling kapatid ang isang Barangay Chairman sa Malasiqui, Pangasinan.

Kinilala ang biktima na si Benigno De Luna, 54-anyos, na Punong Barangay sa Lasip na sakop ng nasabing lugar.

Lumilitaw na suspek sa pananaksak ang nakababatang kapatid ng biktima batay narin sa pahayag ng asawa ni Luna na si Crispina.

Ayon kay Crispina, walang ibang kaaway ang kaniyang asawa maliban lang sa kaniyang kapatid na hinihinalang nagka-alitan dahil sa pera.

Nagtamo ng 11 saksak sa ibat ibang bahagi ng katawan si Luna.

Base sa imbestigasyon, walang ibang tao ang pumasok at lumabas sa bahay ng biktima kundi ang mismong kapatid nito na ngayon ay patuloy pang pinaghahanap ng mga otoridad.  —sa panulat ni Angelica Doctolero

Patay matapos saksakin ng sariling ama ang magkapatid na walo at siyam na taong gulang sa purok 10-B Barangay 39-D, Davao City.

Kinilala ang suspek na si Pajarito Castro Argon, 56-anyos na nagpatiwakal din sa loob ng kanilang bahay matapos ang krimen.

Base sa imbestigasyon, posibleng nakararanas ng depression si Argon matapos iwan ng kaniyang live-in partner at ina ng mga bata.

Nakuha mula sa pinangyarihang krimen ang dalawang kutsilyo at limang pahinang suicide note.

Sa ngayon patuloy pang iniimbestigahan ng mga otoridad ang naganap na insidente. - sa panulat ni Angelica Doctolero

Sugatan ang tatlong pulis matapos tambangan ng nga miyembro ng New Peoples Army (NPA) at masabugan ng Land mine sa Negros Occidental.

Base sa imbestigasyon ng mga otoridad, nag iimbestiga ang tatlong pulis ukol sa ulat na may natagpuang bangkay sa lugar pero agad silang hinarang ng nasa 12 mga rebelde.

Agad namang naisugod sa pagamutan ang tatlong pulis na ngayon ay patuloy na nagpapagaling.

Iniimbestigahan na ng mga otoridad ang naganap na pananambang.  —sa panulat ni Angelica Doctolero

Sugatan ang tatlong manood matapos isagawa ang iligal na drag racing sa Cagayan Province.

Viral ngayon ang isang video kung saan, dalawang sasakyan ang nagkarerahan pero nang magsimula ang karera ay dumiretso sa mga manonood ang isa sa dalawang sasakyan.

Dito na naararo ng isang sasakyan ang tatlong indibidwal saka bumangga sa isang truck.

Ayon kay PIO Cagayan Police Provincial Office, PCPT. Isabelita Gano, hindi umano drag race ang nakita sa nasabing video kundi sinubukan lamang umano ng mga residente kung gaano kabilis ang dalawang sasakyan.

Sa sesyon ng konseho, kinwestiyon ang isang pulis na nakita sa naturang video pero ayon sa PPO, Market Day sa lugar kaya nagpapatrolya ang mga pulis.

Paglilinaw ng pulis na nakita sa video, nagulat umano siya na may nagsisigawan sa lugar kaya siya lumapit.

Kinukuhanan na ng pahayag ng konseho ang Hepe ng Baggao Police at ng Traffic Management sa lugar.

Sa ngayon, nagpapagaling na sa pagamutan ang tatlong suspek na planong magsampa ng kaso.  —sa panulat ni Angelica Doctolero

Mahigpit na pinaalalahanan ng Philippine National Police o PNP ang kanilang mga tauhan na huwag papasok sa anumang uri ng sugal partikular na ang Sabong.

Ayon kay PNP Chief, P/Gen. Dionardo Carlos, nakasisira sa kanilang imahe na siyang nagpapatupad ng batas laban sa mga gumagawa ng mali subalit sila mismo ang sangkot sa mga ganitong gawain.

Kahapon, pormal nang ipinagharap ng reklamo sa Oriental Mindoro Provincial Prosecutor’s Office si P/Cpl. Leonell Maranan ng Technical Support Company ng Regional Mobile Force Battalion ng MIMAROPA PNP.

Si Maranan ang Pulis na nahuli sa akto ng mga humuli sa kaniyang Barangay Tanod na nanloob at nagtangkang magnakaw sa isang Hardware sa Brgy. Sta. Maria, bayan ng Gloria dahil sa pagkalulong sa Online Sabong.

Mismong si Gloria Municipal Police Station Chief, P/Maj. Edwin Villarba ang naghain ng 2 kasong kriminal laban kay Maranan partikular na ang attempted robbery at paglabag sa Omnibus Election Code dahil sa pagdadala nito ng armas.

Gayunman, pansamantalang makalalaya si Maranan dahil sa pinapayagan ng batas na makapaglagak siya ng piyansa sa mga kasong kaniyang kinahaharap.  —ulat mula kay Jaymark Dagala (Patrol 9)