RONDA PROBINSYA

Nanguna ang Ilocos Region sa may pinakamaraming naturukan ng bakuna kontra COVID-19 sa isinagawang Bayanihan, Bakunahan 3 mula February 10 hanggang 18.

Ito’y matapos umabot ng mahigit 203K  ang nabakunahan mula sa 207K  na target ng rehiyon.

Dahil dito, pinuri ni Ilocos Region Regional Director  Paula Paz Sydiongco , ang lahat ng kanyang mga health workers dahil nakamit nila ang target na bilang na dapat mabakunahan laban sa COVID-19.

Kabilang sa mga probinsiya na lumagpas sa target ng mga nabakunahan ay ang Ilocos Sur, Ilocos Norte, Dagupan City, Pangasinan at La Union.

Niyanig ng magnitude 5.7 na lindol ang Jose Abad Santos, Davao Occidental.

Batay sa ulat ng Philippine Institute of Volcanology and Seismology (PHIVOLCS), may lalim itong 54 km at tectonic ang origin ng naturang lindol.

Naramdaman ang intensity 3 Santa, Davao Occidental; Lupon, at Mati City, Davao Oriental; Malapatan, Alabel, At Malungon, Sarangani; Tupi, South Cotabato.

Habang intensity 2 naman sa Davao City; Digos City, Davao Del Sur; General Santos City, South Cotabato.

At intensity 1 naman sa Davao City; Kidapawan City, Cotabato.

Inihayag ni Police Major Edwin Villarba ng Oriental Mindoro- Gloria Municipal Police Station na sasampahan ng kasong attempted robbery si Police Corporal Leonell Maranan.

Sa panayam ng DWIZ, sinabi ni Villalba na ito ay dahil sa pagtangkang pagpasok ni maranan sa isang hardware sa kanilang bayan noong February 18.

Sa ngayon, sa pag-iimbestiga po ng ating mga imbestigador na pumunta doon sa pinangyarihan ng krimen , ito po si Police Corporal Maranan ay nagtangkang pumasok po sa isang harware po sa aming bayan at sa katunayan po ay nakita po siyang ng ibang barangay tanod at ng ibang siblyan na sya nga po ay  nagtangkang pumasok at nanira ng door knob nga

Batay sa malalimang imbestigasyon, di umano’y nalulong si Maranan sa sabong o talpakan kung saan umabot sa halos isang milyon ang utang nito.

Bago gawin yung nasabing krimen na yun ay may naniningil na sa kanya ng 90K kaya medyo natutuliro na itoat  hindi na alam ang gagawin kung saan kukuha ng pera na pambayad po sa mga utang niya , kaya nga ito ang naisip niya itong paraan unti-unting mabayaran ang utang niya na  kulang kulang isang milyong piso.

–  sa panulat ni Airiam Sancho

Iminungkahi ng jeepney drivers sa Iloilo City na taasan ang minimum na pasahe ng P2.50 para mabawasan ang epekto ng pagtaas ng presyo ng gasolina at mga protocol laban sa COVID-19.

Ayon sa Iloilo City Loop Alliance of Jeepney Operators and Drivers Association ICLAJODA President Raymundo Parcon, nagsumite na ang grupo ng petisyon sa Land Transportation Office- Region 6.

Mula sa P9 tataas sa P11.50 ang pasahe sa unang apat na kilometro habang karagdagang P1.5 sentimo sa mga susunod na kilometro.  – sa panulat ni Airiam Sancho

Inaresto ng mga otoridad ang isang dayuhang Chinese makaraang mahulihan ng baril at bala sa Bacoor City, Cavite.

Kinilala ang suspek na si Zhen Tian Chen, 29-anyos na nagtatrabaho sa isang Industrial company sa nabanggit na lugar.

Ayon sa dalawang sekyu na nagbabantay sa lugar, napansin nilang nakabukol sa gilid ng bewang ni Zhen ang isang “revolber 22” kasama ng 14 na piraso ng bala.

Nasa kustodiya na ng Bacoor PNP ang suspek na sinampahan ng reklamong paglabag sa Republic Act. 10591 o Comprehensive Law on fireaRms and Ammunition.  —sa panulat ni Angelica Doctolero

Arestado ang isang pulis matapos tangkang nakawan ang isang hardware sa Barangay Sta. Maria sa Gloria, Oriental Mindoro.

Ayon sa barangay tanod na sina Jay Semilla, 37-anyos at Necole Pilapil, 22- anyos, nagsasagawa sila ng patrolya nang makarinig ng ingay sa a-b-c-3 hardware na pagmamay-ari ni Allan Mantaring.

Nang puntahan, dito na nakita ang isang pliers, screwdrivers at martilyo na pinaniniwalaang ginamit sa pagsira ng doorknob.

Nakita naman ng dalawa ang paglabas ni Corporal Leonell maranan malapit sa establisyemento kaya agad nila itong inaresto.

Si Maranan ay iti-nurn over na sa Municipal Police Station.  – sa panulat ni Abigail Malanday 

Namatay sa saksak ang isang Barangay Captain mula sa Malasiqui sa Pangasinan.

Ayon sa mga otoridad, kinilala ito na si Benigno De Luna, 54- anyos na residente ng Barangay Lasip.

Idineklara itong dead-on-arrival ng mga doktor matapos dalhin sa Malasiqui Municipal Hospital sa Barangay Cabatling.

Patuloy namang inaalam ng pulisya ang motibo ng pagpatay kay De Luna. - sa panulat ni Abigail Malanday 

Nahaharap sa kaso ang 22 katao na may kaugnayan sa naganap na ambush sa Guindulungan, Maguindanao na nag-iwan ng sampung patay at tatlong sugatan.

Ayon kay Lieutenant Colonel Cristio Lagyop, tagapagsalita ng Bangsamoro Autonomous Region Police, kasama sa kinasuhan si Jordan Mama, lider ng armadong grupo at anak nitong si morshid.

Kasong multiple murder at frustrated murder ang isinampa laban dito.

Ilan sa mga nasawi sa insidente ay sina; Peges “aka commander black magic” Mamasainged, Sadam Mamasainged, Sadre Mamasainged, Johari Mamasainged, Kamaro Mamasainged Tani at tatlong iba pa. – sa panulat ni Abigail Malanday

Inalis na ang ipinapatupad na curfew sa buong probinsya ng Cebu.

Ayon kay Cebu Governor Gwendolyn Garcia, alinsunod ito sa inilabas na Executive Order No. 1 na epektibo ang pagpapatupad.

Pero sa kabila nito, mananatili pa rin ang curfew hours para sa mga edad 18 pababa maliban kung kasama ang kanilang magulang o dahil sa essential na dahilan.

Nitong Biyernes, nakapagtala ang Cebu City ng panibagong 1,069 kaso na mas mababa kumpara sa naitala nitong Pebrero  1 na nasa 4,412. - sa panulat ni Abigail Malanday 

Patay ang dalawang hinihinalang miyembro ng New People’s Army (NPA) matapos ang engkwentro sa pagitan ng otoridad at rebelde sa Barangay Odiongan, Gingoog City sa Misamis Oriental.

Kinilala ang dalawang nasawi na sina; Jelan Pinakilid alyas baking/matrix, at kaniyang asawa na si Darling Pinakilid.

Ayon sa ulat, nagsagawa ng intelligence operation ang tropa ng gobyerno nang maka-engkwentro ang limang miyembro ng hinihinalang npa na nagsagawa ng pangingikil at nagpatupad ng “permit to campaign at permit to win” sa mga kandidato sa halalan.

Namatay ang dalawang suspek dulot ng barilan.  -sa panulat ni Abigail Malanday