Isa na lamang ang aktibong kaso ng COVID-19 sa lalawigan ng Quezon.
Batay sa pinakahuling datos mula sa Integrated Provincial Health Office, ang nasabing pasyente ay nasa bayan ng Gumaca.
Samantala, dalawang siyudad at 28 munisipalidad sa lalawigan ay COVID-19 free na.
Hanggang nitong huwebes, nakapagtala ang lalawigan ng Quezon ng 32,861 COVID-19 cases, 31,300 recoveries, at 1,560 deaths.
Hindi apektado ang presyo ng kada kilo ng bigas sa Baguio Public Market sa kabila ng patuloy na pagtaas ng presyo ng petrolyo.
Nabatid na nasa P36 hanggang P38 ang presyo kada kilo ang regular milled rice, nasa 40 hanggang 46 pesos sa kada kilo ng imported rice, at nasa P34 hanggang P35 naman ang kada kilo ng durog na bigas.
Sinasabing walang nangyaring pagtaas sa presyo ng bigas kahit pa tumaas ang presyo ng mga produktong petrolyo na nakakaapekto sa transportasyon ng mga bigas.
Samantala, mayroong sapat na suplay ng bigas ang mga itinitinda sa naturang merkado.
Isang granada ang nadiskubre habang naghuhukay ang isang construction worker sa Barangay San Pedro, Sto. Tomas City, Batangas.
Ayon sa construction worker na si Garry Carandang, 40-anyos, magtatayo sana sila ng bahay kasama ang iba pa niyang kasamahan nang mahukay ang isang granada na swerte umanong hindi sumabog.
Nasa kostudiya na ng Batangas Explosive Ordinance Disposal (EOD) ang naturang granada para sa proper disposition nito.
Umabot na sa 108 katao ang na-ospital matapos kumain ng pansit bihon sa dinaluhang political rally sa Lake Sebu, South Cotabato.
Dumadalo ang mga biktima sa kampanya ng kandidato sa pagka-konsehal na si Leo Bobong sa Sitio Bayabas, Barangay Tasiman nang makaranas ng pananakit ng tiyan at pagsusuka, dalawang oras matapos kumain ng bihon.
Ayon kay Roberto Baggong, Head ng Lake Sebu Municipal Disaster Risk Reduction and Management Council, dahil liblib ang naturang lugar ay inabot sila ng ilang oras bago naisugod sa mga ospital ang mga biktima.
Nanghihina na anya ang mga biktima na karamiha’y bata pagdating ng mga rescuer.
Papanagutin naman ng lokal na pamahalaan ng Lake Sebu ang organizer ng nasabing aktibidad.
Narekober na ng Philippine Coast Guard (PCG) ang bangkay ng dalawa sa limang batang nalunod matapos maligo sa bahagi ng Taal Lake, sa Lipa City, Batangas.
Ayon sa PCG, dalawang bangkay ng babae na edad 12 at 13 ang kanilang narekober.
Pinaghahanap na ang iba pang biktima na edad 7 hanggang 10.
Naganap ang trahedya dakong tanghali kahapon sa Barangay Sto, Toribio.
Nabatid na ipinagbabawal maligo sa ilog na may nakalagay nang karatula dahil nasa 14 na metro ang lalim nito.
Aabot sa P2-M halaga ng shabu ang nasabat ng pinagsanib na pwersa ng Philippine National Police (PNP) at philippine Drug Enforcement Agency (PDEA) sa isang babaeng suspek matapos ikasa ang drug buy-bust operation sa Barangay Tejero, Cebu City.
Hindi naman pinangalanan ang inarestong suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ayon kay PNP Chief Dionardo Carlos, patuloy na paiigtingin ng kanilang ahensya ang kampanya laban sa ilegal na droga.
Patay na nang matagpuan ang isang lalaking aakyat sana ng ligaw matapos makuryente sa maisan sa Mangaldan, Pangasinan.
Kinilala ang biktima na si Melson Ramos, 31-anyos at residente ng San Carlos City.
Ayon kay Lt. Vicente Castor Jr., hepe ng Mangaldan Police, nagpaalam pa si Ramos sa kapatid nito na magtutungo sa barangay Pogo.
Gayunman, hindi na nakarating ang biktima matapos makuryente sa live wire sa maisan.
Duda naman ang kaanak ng biktima sa tunay na sanhi ng pagkamatay nito habang walang nakitang foul play ang pulisya.
Patay sa engkwentro ang tatlong miyembro ng New Peoples Army sa boundary ng Barangay Buenavista, Pio Duran, Albay at Barangay Sta. Cruz, Donsol, Sorsogon.
Tumagal ng sampung minuto ang ikinasang combat operation ng mga sundalo at pulis kung saan, kabilang sa tatlong nasawi ang umano’y lider ng naturang grupo na si alyas Bong.
Na-recover sa lugar ang dalawang m-16 rifle, cal .45 baril at iba pang personal na kagamitan ng mga rebelde.
Ayon sa 9th infantry division ng Philippine Army, mas pinaigting ngayon ang seguridad sa rehiyon lalo’t papalapit na ang halalan.
Hindi bababa sa 77 residente ng Lake Sebu sa South Cotabato ang na-ospital dahil sa umano’y insidente ng food poisoning.
Ayon sa Municipal Disaster Risk Reduction and Management Office (MDRRMO), nakaranas ang mga residente ng pagsusuka, pagdudumi at pananakit ng tiyan matapos kumain sa isang political rally nitong linggo.
Nagkaloob na ng tulong ang lokal na pamahalaan sa mga apektadong residente gaya ng mga gamot at dextrose.
Patuloy na inaalam ng mga otoridad ang posibleng sanhi ng umano’y food poisoning.
Binaha ang 37 lugar sa Zamboanga peninsula dahil sa nararanasang malakas na pag-ulan bunsod ng Low Pressure Area (LPA) na nasa Inter Tropical Convergence Zone (ITCZ).
Ayon kay Office of Civil Defense (OCD) Regional Director Ramon Ochotorena, kabilang sa mga binaha ang 16 na barangay mula sa Zamboanga Sibugay, 7 sa Zamboanga del Norte at 11 sa Zamboanga del Sur habang 3 naman sa Zamboanga Peninsula.
Nabatid na nagdeploy ng mga tauhan ang Local Disaster Risk Reduction Management Office (DRRMO) matapos makaranas ng tatlong landslide ang Zamboanga Sibugay.
Layunin nitong maisalba ang nasa 2K residente na nakatira sa critical areas na naapektuhan ng pagbaha at pagguho ng lupa dahil sa walang tigil na pag-ulan.