RONDA PROBINSYA

Patay ang isang babae matapos barilin ng kanyang pinsan sa bayan ng Banate, Iloilo.

Kinilala ang biktimang si Joyce Ferrer, 26 anyos habang tinutugis pa ang suspek na si Mel Ferrer, 42 anyos, kapwa residente ng Barangay Merced.

Ayon kay Master Sergeant Joelito Babayo III ng Banate Municipal Police, dakong alas otso ng umaga noong Sabado naganap ang krimen sa labas ng bahay ng biktima at suspek.

Batay sa imbestigasyon, gabi ng Biyernes nang magkaroon ng pagtatalo ang dalawa dahil umano sa tsismis sa kanilang lugar hanggang kinabukasan ay nagkasalubong ang mag-pinsan.

Muling sumiklab ang argumento sa pagitan ng dalawa hanggang sa bumunot na ng kalibre 45 si Mel at binaril ang pinsan nang malapitan sa dibdib.

Nagpapatuloy ang imbestigasyon ng pulisya sa naturang krimen.

Sugatan ang anim na indibidwal sa magkahiwalay na aksidente sa Benguet matapos mahulog sa bangin ang isang sasakyan habang bumaligtad naman sa kalsada ang isa pa.

Unang naitala ang aksidente sa siyudad ng Baguio matapos mawalan ng kontrol ang isang sasakyan sakay ang tatlong pasahero at nag-resulta ng pagkakabangga sa concrete canal at diretsong nahulog sa ilog na may lalim na 50 ft. mula sa tulay.

Nagpapagaling na sa pagamutan ang tatlong sugatan na sina Marlon Paras Tolentino, 36-anyos; Gabriel Del Mundo, 22-anyos; at Jared Gonzales Ladson, 25-anyos.

Samantala, sugatan naman sa Benguet ang tatlong senior citizen, matapos namang mabangga ang sinasakyang SUV sa Caliking, Atok, Benguet.

Sa imbestigasyon ng Atok Municipal Police Station, binabagtas ng nasabing sasakyan ang kalsada papuntang La Trinidad nang antukin ang driver kaya bumangga ito sa gilid ng kalsada na nagresulta naman ng pagbaliktad ng sasakyan.

Nagpapagamot na sa ospital ang mga bikitimang sina Roberto Saguid Aritao, 63 years old; Conchita Pol-Oc Aritao, 61 years old at Annie Laoyan Binay-An, 68 years old.

Aabot sa  higit 70 indibidwal ang na-food poison sa Barangay Inirangan sa bayan ng Bayambang, Pangasinan.

Ayon sa municipal health office, nakaranas ng pagsakit ng tiyan at pasusuka ang nasa 75 inbidwal matapos kumaon ng galunggong at tahong mula sa dumaang tinder sa barangay.

Nagsagawa na rin ng imbestigasyon ang otoridad para alamin kung positibo sa red toxin at tukuyin ang dahilan ng food poisoning.

Kumuha na rin ng sample mula sa mga pasyente at kasalukuyan nang sumailalim sa medical test.

Natukoy ang walong barangay sa Baybay City na danger zone ng Mines and Geosciences Bureau (MGB) Regional Office.

Kabilang dito ang mga barangay ng Mailhi, Kantagnos, Bunga, Maypatag, Makinhas, Cagumay, Mag-Aso, at Kan-Ipa.

Ito’y kasunod ng ginawang assessment ng mgb sa mga nasabing lugar bilang tugon sa ulat mula sa mga residente hinggil sa mga nakita nilang  “visible tension cracks.”

Naisumite na ng mgb sa local na pamahalaan ang resulta ng kanilang assessement upang makapagpatupad ito ng “no dwelling zones.”

Ayon kay MGB Regional Chief Geologist Celestina Carranza, nasa 50% ng land area sa lugar ang maikokonsiderang landslide-prone base sa kanilang pinakabagong geohazard map.

Samantala, anim naman na lugar sa Baybay ang tinukoy ng MGB na ligtas para malipatan ng mga naapektuhang residente.

Tatlo ang nasawi habang lima ang nasugatan matapos ang karambola ng mga sasakyan sa Baguio City.

Ayon sa mga otoridad, nabangga ng isang container van ang isang taxi at isang private van bago sumalpok sa pader.

Nasawi ang driver at isang pahinante ng container van.

Isinugod naman sa ospital ang mga sakay ng private van pero binawian din ng buhay ang isa sa kanila.

Wala namang nasaktan sa sakay ng taxi.

Patuloy naman ang imbestigasyon ng mga otoridad sa insidente.

Aabot sa P3.4M  halaga ng shabu ang nakumpiska ng mga otoridad sa Quezon Province.

Kinilala ang babaeng suspek na si Anna Marie Laurel, alyas ging-ging, 45-anyos na inaresto sa ikinasang anti-drug operation ng pinagsanib na puwersa ng mga tauhan ng PDEA-4a, PDEA-Quezon, Quezon Police Office, Regional Special Enforcement Team at Tayabas City Police sa barangay mayumi ng nasabing probinsya.

Ayon sa mga otoridad, nakumpiska din kay laurel ang aabot sa 500 gramo ng pinaghihinalaang shabu at buy-bust money.

Sasampahan na ng kasong paglabag sa Republic Act 9165 o comprehensive dangerous drugs act of 2002 si Laurel.

Naitala ang magnitude 5.1 na lindol ang ang bayan ng Santa Monica, Surigao Del Norte kagabi.

Ayon sa PHIVOLCS, nangyari ang lindol bandang 7:42 ng Huwebes at natunton ang epicenter nito sa layong 16 kilometers ng Timog-Silangan ng Burgos, Surigao Del Norte.

Nabatid na tectonic ang origin ng pagyanig at may depth of focus na 23 kilometers.

Naitala ang intensity III sa Surigao City, at San Francisco, Southern Leyte; instrumental intensity II sa Bayugan City, Agusan Del Sur; Julita, La Paz, At Palo, Leyte; at instrumental intensity I naman sa Dulag, Leyte.

Naramdaman ang instrumental intensity III sa Surigao City; San Francisco, Southern Leyte; intensity II sa Abuyog at Hilongos, Leyte; Saint Bernard, Southern Leyte; Cabadbaran City, Agusan Del Norte; at intensity I sa Dulag at Palo, Leyte; Sogod, Southern Leyte; at Gingoog City, Misamis Oriental.

Sinabi ng PHIVOLCS na wala namang inaasahang pinsala kasunod ng lindol subalit posible ang aftershocks.

Natagpuan na ang 13 anyos na babae na mahigit isang linggo nang pinaghahanap sa bayan ng Madella, Quirino.

Gayunman, bangkay na at naagnas na ang biktimang estudyante na si Glaiza Mae Saguiped, nang madiskubreng palutang-lutang sa gilid ng sapa.

Ayon sa Quirino Provincial Police, pinaniniwalan ng mga kamag-anak na may kumuha sa biktima mula sa kanilang bahay sa Barangay Dipintin noong Abril 14.

Mag-isa lang umano sa bahay noon si Saguiped dahil nakipag-lamay ang kaniyang amang si Alfredo sa isa nilang kaanak pero kinaumagahan, wala na ang dalagita.

Hinihinala ng mga kaanak ng biktima na ginahasa muna ito bago patayin at itapon sa sapa.

Nananawagan naman ng katarungan si Mang Alfredo para sa kanyang anak at hiniling sa pulisya ang agarang pag-aresto sa sinumang nasa likod ng pamamaslang.

Bumigay ang lumang tulay sa bayan ng Loay, Bohol kung saan, nahulog sa Loboc River ang mga sasakyan.

 Ayon kay Loay Mayor, Atty. Hilario Ayuban, nasa sampung sasakyan ang bumulusok sa nasabing ilog.

 Sa pahayag ng mga nakasaksi, tumatawid umano ang mga sasakyan sa naturang tulay nang bigla na lamang bumigay ang Clarin Bridge.

 Patuloy pang nagsasagawa ng rescue operations ang mga tauhan ng Local Disaster Risk Reduction and Management Office (LDRRMO) at Philippine Coast Guard (PCG) kung saan, pito sa mga motorista ang nailigtas na ngayon ay binibigyan na ng paunang lunas.

Patay sa engkuwentro ang apat na miyembro ng New Peoples Army (NPA) sa Occidental, Mindoro at Masbate.

Ayon sa mga tauhan ng Armed Forces of the Philippines (AFP), dalawang NPA ang nasawi habang isang sundalo naman ang sugatan sa dalawang magkahiwalay na lugar sa Barangay Malpalon, bayan ng Calintaan, Occidental Mindoro.

Samantala, nasawi din sa sagupaan sa pagitan ng mga militar ang dalawa pang rebelde sa Barangay Miabas, Palanas, Masbate.

Nakumpiska sa lugar ang tatlong high-powered na baril at isang hand grenade.