RONDA PROBINSYA

Sinuspinde na ng provincial government ng Cebu ang lahat ng Paragliding activities sa Bayan ng Oslob matapos ang aksidenteng pagkamatay ng isang American Professional Paraglider, noong linggo.

Kinumpirma ni Cebu Provincial Tourism Officer Ma. Lester Ybañez na indefinite suspension ang kanilang ipinatupad matapos bumagsak sa bulubunduking bahagi ng Sitio Can-Aw, Barangay Poblacion ang biktima.

Kinilala ang dayuhang si Peter Clifford Humes, 63- anyos mula New Jersey sa U.S.

Bagaman iniimbestigahan pa, isa anya sa nakikitang dahilan ng trahedya ay pilot error.

Nasa Oslob si Humes upang tumulong sa expansion at improvement ng paragliding sa Cebu makaraang i-hire ng Oslob Cebu Paragliding Development na nag-a-alok ng Paragliding activities sa mga turista at propesyunal simula noong 2021.

Natagpuang patay ng mga rescuers ang mag-ama sa ilog sa bahagi ng Banawel, Natonin, Mt.Province.

Ayon sa mga otoridad, posibleng nalunod ang mag-amang biktima na kinilalang sina Rindo Charwasen at anak nitong si Renz Ardel Charwasen.

Ayon sa mga tauhan Municipal Disaster Risk Reduction Management Office na nagsagawa ng search operation, unang narekober ang katawan ni Rindo na natagpuan sa ilalim ng River Bed na may 5 metro ang lalim habang natagpuan naman si Renz, 2 metro ang layo mula sa kanyang ama.

Sa ngayon, patuloy pang inaalam ng mga otoridad ang dahilan ng pagkalunod ng mga biktima.

Aabot na sa 85% ng mga barangay sa Cebu City ang wala nang aktibong kaso ng COVID-19.

Ayon kay Emergency Operations Center Head Joel Garganera, 67 mula sa 80 barangay ang hindi na nakapagtala ng mga bagong kaso.

Sa ngayon anya ay nasa 27 na lang ang active cases sa buong lungsod na karamiha’y nasa home isolation.

Patuloy na ring bumaba ang positivity rate sa Cebu City matapos lumagpak sa point 43% o sa 467 na nagpa-test ay dalawa lamang ang nagpositibo.

Gayunman, nababahala pa rin si Garganera sa posibilidad ng pagtaas muli ng mga kaso lalo’t nananatili sa COVID-19 alert level 1 ang Cebu City.

Ilang barangay sa Lemery, Batangas ang nalubog sa baha dahil sa malakas na ulan.

Dakong ala-6 kagabi nang magsimulang bumaha sa ilang bahagi ng nabanggit na bayan.

Ayon sa Municipal Disaster Risk Reduction and Management ng Lemery, hindi madaanan ang Bypass Road sa Barangay Palanas at iba pang kalsada.

Stranded din ang mga sasakyan habang ang ilan ay tumirik na.

Samantala, lubog din ang Barangay Malinis at Ayao-Iyao at kung magpapatuloy ang malakas na ulan ay posibleng lumawak pa ang baha.

Sa kabila nito, wala namang inililikas pa na mga residente.

Patay ang isang 48-anyos na lalaki matapos sumiklab ang sunog sa bayan ng Naguillan, sa Barangay Baraoas Sur, La Union.

Base sa imbestigasyon ng mga otoridad, paralisado umano ang biktima kaya nahirapan itong makalabas ng kaniyang bahay.

Patuloy pang iniimbestigahan ng mga otoridad ang posibleng sanhi ng sunog at kabuuang halaga ng pinsala sa nabanggit na lugar.

Dead on arrival sa ospital ang dalawang lalaki matapos magbanggaan ang sinasakyan nilang motorsiklo sa Dao, Capiz.

Ayon sa mga otoridad, sa lakas ng banggaan, tumilapon ang mga suspek na kinilalang sina Joenel Celiz, 30- anyos at Nonito Flores, 28-anyos.

Base sa imbestigasyon, parehong walang suot na helmet ang mga biktima nang mangyari ang insidente kung saan, nagtamo sila ng malubhang sugat sa katawan dahilan ng kanilang agarang pagkamatay.

Aabot sa P1.1-M na halaga ng hinihinalang shabu ang nasamsam mula sa isang mag-asawa sa ikinasang buy-bust operation sa kanilang bahay sa Purok Kapawa, Barangay Punta Taytay, Bacolod City.

Kinilala ang mga suspek na sina Pearl Je-Ann Elera, 26 taong gulang, at Reigel Troy Quimba, 20 taong gulang.

Bukod sa buy-bust money, nasabat din sa operasyon ang 174 grams ng umano’y shabu na tinatayang nagkakahalaga ng higit P1.1-M.

Mahaharap ang mga suspek sa reklamong paglabag sa Comprehensive Dangerous Drugs Act.

Mahigit P1-M halaga ng shabu ang nasabat ng mga awtoridad sa magkahiwalay na operasyon sa Butuan City at Agusan del Norte.

Sa bayan ng Carmen, nasakote ang tatlong drug suspects kung saan nasabat mula sa mga ito ang tinatayang P600-K na halaga ng umano’y shabu.

Sa Barangay Diego Silang, Butuan, nahulihan naman ng P41-K na halaga ng hinihinalang shabu ang isa pang drug suspect.

Samantala, nadakip din ang isang pang high-value target sa hiwalay na operasyon sa Barangay Fort Puyohon sa Butuan City pa rin kung saan nakumpiska mula rito ang P408-K na halaga ng pinaniniwalaang shabu.

Nasakote ng Surigao del Sur Police ang isang lalaki na matagal nang wanted dahil sa panggagahasa ng isang menor de edad.

Ayon kay PRO-13 director, Brig. Gen. Romeo Caramat Jr., si Elmar Cumos Cagas ay nadakip sa bayan ng Tagbina.

Matagal nang tinutugis ng batas si Cagas dahil sa kasong rape na kinakaharap nito sa isang korte sa Bislig City matapos umanong gahasain ang isang 12-anyos na dalagita noong October 2021.