RONDA PROBINSYA

Patay ang 15-anyos na Grade 7 student matapos pagbabarilin kahapon ng hindi pa nakikilalang mga lalaki sa Calasiao, Pangasinan.

Ayon sa ulat, naglalakad lang ang binatilyo kasama ang kaniyang Tito nang paligiran sila ng apat na motorsiklo sa mismong harap ng Barangay Hall sa Bayan ng Nagsaing.

Binaril ng isa sa mga suspek ang binatilyo.

Pero hindi pa nasiyahan ang mga ito at nilaslas ang leeg ng biktima bago tumakas.

Anim na bala ng caliber 45 pistol ang narekober sa lugar.

Nagpapatuloy naman ang imbestigasyon ng PNP sa nangyari.

Aabot sa P660-K na halaga ng smuggled cigarettes ang nasabat ng mga otoridad sa anim na indibidwal sa Fish Port ng San Pedro Village, Pagadian City, probinsya ng Zamboanga del Sur.

Ayon kay Police Brigadier General Franco Simborio, Director ng Police Regional Office (PRO) Zamboanga Peninsula, kinilala ang mga naaresto na sina Rommel Hajijul, 35-anyos; Kumar Albain, 23-anyos; Samil Kuddiya, 29-anyos; Una Albain, 55-anyos; Ruslan Ahari, 25-anyos; at Alih Hakim, 45-anyos.

Nakuha sa mga suspek ang 18 master cases ng sigarilyo na may brand na Champion, 13 master cases ng Absolute brand, at 250 reams ng Fort Cigarettes.

Dinala na sa Pagadian City Police Station ang mga nakumpiskang smuggled cigarettes maging ang mga naaresto na isasailalim sa inventory at documentation para sa proper disposition.

Hindi na kailangan ng mga biyahero na magpakita ng vaccination cards mula sa Western Visayas Region papunta ng Isla ng Guimaras.

Kasunod ito ng Executive Order no. 2022-28 na ipinasa ng Guimaras Provincial Board sa tulong na rin ni Gobernador Samuel Gumarin para mapagaan ang mga travel protocol laban sa COVID-19.

Kabilang sa mga lugar na hindi na kailangan ng vaccination cards ay ang mga residente ng Aklan, Antique, Capiz, Iloilo, at Negros Occidental Provinces gayundin ang highly urbanized na lungsod ng Iloilo at Bacolod.

Base sa naturang resolusyon ang mga biyaherong papasok mula sa labas ng Western Visayas ay kailangan pa ring magpakita ng mga vaccine cards.

Kung hindi pa nabakunahan ang isang biyahero ay dapat pa ring magpakita ng test results upang masigurong hindi ito nahawaan ng sintomas ng COVID-19.

Samantala, bukod sa vaccination cards, inalis na rin ang pag-iisyu ng inbound at outbound travel pass sa mga nabanggit na lugar.

Aabot sa mahigit P8-M halaga ng shabu ang nasabat ng mga otoridad sa pitong drug pushers sa Central Visayas.

Nabatid na nagsagawa ng magkakasunod na Anti-Illegal Drug Operations ang mga otoridad sa Barangay Duljo-Fatima; Barangay Bunga, Toledo City; Barangay Tisa; Barangay Poblacion; Barangay Tip-Tip, Tagbilaran; at Bayan ng Balamban, Cebu City.

Layunin ng nasabing operasyon na mabawasan ang ibat-ibang uri ng krimen sa bansa.

Nahaharap ngayon sa kasong Republic Act 9165 o Comprehensive Dangerous Drugs Act of 2002 ang mga inarestong suspek.

Iniimbestigahan na ang 11 opisyal ng Reserve Officers Training Corps (ROTC) na inireklamo ng mga kadete sa Colegio De Kidapawan.

Batay sa reklamo, pinakain umano ang mga kadete ng iisang kendi at pinagamit ng iisang face mask ng mga ROTC officers.

Umamin naman ang ROTC officers sa kanilang ginawa at handang panagutan ang paglabag sa Anti Hazing Law at IATF Protocols.

Ayon kay ROTC Commandant Staff Sergrant Hernando Maria Santiago, isasailalim sa RT-PCR test ang mga nagreklamong kadete.

Nakumpiska ng mga otoridad sa isang Taiwanese National ang nasa 600 gramo ng Ketamine o nagkakahalaga ng P3.5 sa Makati City.

Kinilala ng mga tauhan ng PDEA Region 3 ang carrier na si Chang Bin Yen, 33-anyos at residente ng Tainan, Taiwan.

Ayon sa mga otoridad, ang naturang gamot na ginagamit bilang anesthesia ay idineklara bilang air purifier at dumating sa Port of Clark, Pampanga noong Mayo a-12 at nadiskubre kahapon Mayo a-17.

Aabot sa dalawang kahon na naglalaman ng anim na piraso ng stainless steel water purifier kung saan nakatago ang ipinagbabawal na substance.

Sasampahan ng kasong paglabag sa Section 4 o Importation of Dangerous Drugs ang naarestong suspek.