Isinailalim sa State of Calamity ang barangay Colongulo sa Surallah, South Cotabato dahil sa cholera outbreak.
Ayon sa awtoridad, isang 9 years old na bata ang nasawi habang sampung residente ang nakaranas ng diarrhea, kung saan apat ang positibo sa cholera.
Sinabi naman ng Committee on Health ng lokal na pamahalaan na may nadiskubreng coliform bacteria sa pinagkukunan ng inuming tubig ng mga residente.
Mayroon ding problema sa mga palikuran ang ilang sitio sa nasabing barangay.
Nasabat ng awtoridad ang tinatayang 68 milyong pisong halaga ng hinihinalang shabu sa isinagawang buy bust operation sa Angeles City, Pampanga.
Bandang alas-2:30 nitong linggo nang ikasa ang operasyon sa barangay Balibago.
Nasamsam rin ng pulisya ang iba’t ibang drug paraphernalia, boodle money at buy bust money.
Nakatakas naman ang tatlong suspek na siyang pinaghahanap ngayon ng awtoridad.
Niyanig ng magnitude 4.6 na lindol ang Davao Occidental ala-1:37 ng hapon, kahapon.
Namataan ang pagyanig sa Balut Island na sakop ng Munisipalidad ng Sarangani, Davao Occidental sa layong 238km.
May lalim ang lindol na 9km at tectonic ang origin o pinagmulan nito.
Wala namang naitalang nasawi o nasugatan at wala ring inaasahang aftershocks matapos ang pagyanig.
Inanunsyo ng Commission on Elections na hindi na ito magsasagawa ng special elections sa mga bayan ng Binidayan at Butig sa Lanao Del Sur.
Nilinaw ni Comelec deputy executive director for operations Teopisto Elnas na iprinoklama na ang mga nanalong kandidato sa mga nasabing bayan kung saan matatandaang nagdeklara ng “failure of elections.”
Aminado naman si Comelec commissioner George Garcia na ang unang deklarasyon ng failure of elections sa Binidayan at Butig ng local office ng poll body ay pagkakamali lamang.
Requirement sa nasabing sistema na magkaroon ng threshold upang makapag-print ng Certificate of Proclamation at hindi naman ini-request ng dalawang bayan na ibaba ang kanilang threshold.
Nangangahulugan anya ito na nakapag-transmit ng sapat na boto ang Binidayan at Butig.
Inaresto ng mga otoridad ang Top 6 Most Wanted Person sa Iloilo.
Ayon sa Banate PNP, nahaharap sa kasong homicide ang suspek na kinilalang si Roger Anthony Pineda, 49-anyos at residente ng Barangay Carmelo, Banate, Iloilo.
Nakakulong na ngayon ang suspek na ngayon ay isinasailalim sa imbestigasyon.
Tiniyak naman ng mga otoridad na kanilang ipagpapatuloy ang kanilang kampanya para arestuhin ang mga wanted person sa lalawigan.
Nasabat ng mga otoridad ang aabot sa P1.5-M halaga ng marijuana sa isang lalaking drug pusher matapos ikasa ang anti-drug operation sa Tuguegarao City, Isabela.
Kinilala ang suspek na si Arjee Villaluan alyas “Takki” 31-anyos na inaresto matapos magbenta ng dahon ng marijuana sa isang tauhan ng PDEA.
Ayon sa Philippine Drug Enforcement Agency (PDEA)-Region 2, Nakatanggap sila ng tawag mula sa isang concerned citizen hinggil sa iligal na gawain ng suspek dahilan para magsagawa sila ng operasyon sa nabanggit na lugar.
Nakuha sa suspek ang limang bricks ng marijuana, marked money, at isang sumpak na may kargang dalawang bala.
Nakakulong na ngayon si Villaluan na nahaharap sa kasong Republic Act RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition at Omnibus Election Code.
Dalawa katao ang patay habang sugatan ang 14 na iba pa matapos maaksidente ang kanilang sinasakyang pick-up sa bayan ng Llorente, Eastern Samar.
Kinilala ang mga nasawi na sina Randy Palce, 32-taong gulang at anak nitong si Ranz Matthew, 3-taong gulang na kapwa lulan ng Black Mitsubishi Strada na may plakang RNW-593.
Naganap ang aksidente sa National Highway ng Barangay San Roque, noong Sabado.
Karamihan sa mga nasugatan ay isinugod sa Llorente Community Hospital at inilipat sa Borongan Doctors Ospital.
Inaalam na ng pulisya ang sanhi ng aksidente.
Plano na ng provincial government ng Negros Occidental ang pagsasagawa ng apat na araw na bakunahan kontra COVID-19.
Ayon kay Dr. Ernell Tumimbang, Provincial Health officer, ipinanukala na niya ang programa kay Negros Occidental Governor Eugenio Jose Lacson.
Bagaman wala pang eksaktong petsa, kampante si Tumimbang na makatutulong ang plano upang mas marami ang mabakunahan sa probinsya.
Nananatili sa Alert level 2 ang buong Negros Occidental maliban sa Bacolod City, mga bayan ng EB Magalona, Pulupandan, San Enrique, Candoni, Sagay, Victorias at La Carlota City na nasa Alert level 1.
Hanggang Mayo 19, umabot na sa 12 ang aktibong kaso sa naturang lalawigan.
Wala nang buhay nang matagpuan ng mga residente ng barangay Pagatpat ang isang 33 taong gulang na babae malapit sa bahay nito sa Cagayan De Oro City nitong Sabado.
Ito’y matapos umanong hampasin ng kahoy sa ulo ng nakababatang kapatid ang babae ayon sa ulat ng pulisya.
Ayon kay police master Sgt. Ariel Reursora, batay sa salaysay ng suspek pumunta ito sa bahay ng biktima dahil naiingayan ito sa radyo. Nagkainitan ang dalawa at nasuntok ng biktima ang kanyang kapatid na agad kumuha ng kahoy pero naagaw ito ng suspek, na siyang ginamit panghampas sa ulo nito.
Sumuko naman sa mga tauhan ng barangay ang suspek at inaming siya ang nakapatay sa kanyang kapatid gamit ang panggatong na kahoy at ayon sa mga magulang nito na may sakit umano sa pag-iisip ang suspek
Handa na ang Commission on Elections sa gaganaping special elections sa Lanao del Sur sa Martes, Mayo – 24.
Ayon kay Comelec commissioner George Garcia, mayroon na silang ugnayan sa Philippine National Police (PNP), Armed Forces of the Philippines (AFP), at Philippine Coast Guard (PCG) na magbabantay sa eleksyon.
Aniya, dinamihan nila ang pwersa ng otoridad sa Lanao del Sur dahil sa posibilidad ang kaguluhan sa bayan ng Tubaran.
Ipinaliwanag din ni Garcia kung bakit pulis ang magsasagawa ng eleksyon sa 14 na polling precints sa Tubaran dahil tinatakot umano ng mga residente ang mga gurong nagbabantay.
Pero nilinaw niya na pawang mga na-train ng mga pulis ng ilang araw at linggo.
Nabatid na kabilang sa pagdarausan na mga barangay sa Tubaran ay Tangcal, Datumanong, Guiarong, Baguiangun, Wago, Malaganding, Gadongan, Riantaran, Pagalamatan, Mindamunag, Paigoday-Pimbataan, at Metadicop.