RONDA PROBINSYA

Tiklo ang aabot sa 16 na katao, kabilang ang isang kapitan, dahil sa ilegal na tupada o sabong sa Barangay San Miguel, Alaminos sa lalawigan ng Laguna,

Ayon sa Laguna Police Provincial Office, nagkasa sila ng anti-illegal gambling operations noong Mayo a-26 kung saan nasakote ang mga suspek na kinilalang sina Mars Libang, Edcel Sahagun, Nelson De Rama, Gregorio Malabuyoc, Jhon Mike Dominguez, Mike Joshua Toling, at Oscar Manalo.

Hindi rin nakaligtas sa kamay ng otoridad sina, Jhon Albert Hular, Steven Ram Cangas, John Borg Gaspay, Rico James Castillo, Reden Marcelino, Raymond Manalo, Joshua Enovidad, Andy Lunaat Prisco Manalo.

Nakuha sa mga ito ang dalawang buhay na manok na panabong, dawalang pirasong razor-sharp steel blades, at P3,300 na pera ginamit panaya.

Kasalukuyan nang hawak ng Alaminos Municipal Police Station ang mga suspek at nahaharap sa kasong illegal gambling.

Nagdeklara na ng dengue outbreak sa Zamboanga City dahil sa pagsirit ng kaso ng sakit sa lugar.

Batay sa datos, mahigit 2K na ang kumpirmadong kaso ng dengue sa siyudad mula Enero hanggang Mayo 14.

Sa nasabing bilang, labing siyam na ang nasawi sa nasabing sakit.

Dahil dito, pinaigting na ng mga otoridad ang fogging operations sa mga lugar sa siyudad na may mataas na dengue cases.

Maliban sa nabanggit na lugar, sinabi ng Department of Health – Region IX, na mataas rin ang kaso ng dengue sa Zamboanga Sibugay, Zamboanga Del Sur at Isabela City sa Basilan.

Walong aso ang nareskyu ng mga otoridad sa umano’y ‘dog meat trade’ sa Pandi, Bulacan.

Dalawang indibidwal ang naaresto sa ikinasang operasyon ng pulisya at animal kingdom foundation, makaraang maaktuhan ang gagawin sanang pagbebenta ng karne ng aso.

Nabatid na ang dalawang nadakip ay ang namamahala rin sa pagkatay ng mga ito.

Nahaharap ang mga suspek sa kasong paglabag sa animal welfare act of 1998.

Dalawa ang sugatan sa pambobomba sa isang bus sa Koronadal City.

Naganap ang pagsabog sa isang pampasaherong bus sa bahagi ng General Santos Drive sa Koronadal City, South Cotabato.

Dakong alas-2:30 ng tanghali, kahapon nang sumabog ang likurang bahagi ng Yellow Bus Line Unit na galing Tacurong City, Sultan Kudarat.

Ayon kay South Cotabato Provincial Police Office Spokesman, Capt. Renjun Bagaman, dalawang tricycle driver na kasunod ng pampasaherong bus ang nasugatan sa insidente.

Bukod dito, isa pang pagsabog ang yumanig sa isang bakanteng lote sa Barangay New Carmen, Tacurong City, Sultan Kudarat kung saan wala naman nasugatan.

Inaalam na kung sino o anong grupo ang nasa likod ng mga pambobomba at kung may kaugnayan ang dalawang insidente.

Nilinaw ng Philippine Coast Guard (PCG) na hindi overloaded ang Fast Craft na nasunog sa Real, Quezon noong Mayo 23.

 Ayon sa PCG, 180 ang kapasidad ng MV Mercraft 2 pero 157 lamang ang sakay nito nang maganap ang trahedya, batay sa imbestigasyon ng PCG-Station Northern Quezon.

 Taliwas ito sa unang napaulat na 134 ang sakay ng nasunog na vessel.

 Inaalam na kung bakit ang hindi isinama sa naunang manipesto ang 23 pasahero.

 Pito ang nasawi habang 29 ang sugatan at 121 ang nailigtas.

 Patuloy namang iniimbestigahan ang sanhi ng sunog sa nasabing Fast Craft.

Arestado ang 12 indibidwal matapos makuhanan ng 3 milyong pisong halaga ng marijuana sa Benguet at Kalinga.

 Ayon sa Police Regional Office-Cordillera Regional Operations Division, ang Baguio City Police Office ang may pinakamataas na bilang ng mga naaresto na may anim na drug personalities na sinundan ng Apayao Provincial Police Office (PPO) at Benguet PPO na may tig-dalawang naaresto at Abra PPO at Kalinga PPO na may tig-iisang inaresto sa isang linggong anti-illegal drug operation.

 Nasamsam sa magkahiwalay na buy-bust operation ang kabuuang 18.19 grams ng hinihinalang shabu na may standard drug price na P123, 692.

 Bukod pa diyan, nakumpiska din ang mahigit isanglibong gramo ng pinatuyong dahon ng marijuana na nagkakahalaga ng P120,108; 4,350 fully grown marijuana plants na nagkakahalaga ng P870,000; limang libong piraso ng pinatuyong dahon ng marijuana na nagkakahalaga ng P600,000; 8,500 fully grown marijuana plants na nagkakahalaga ng 1.7 million pesos at 1,000 gramo ng marijuana seeds na nagkakahalaga ng P25,000.

 Nahaharap ngayon sa kaukulang kaso ang mga naarestong suspek.

Dumalaw sa burol ng yumaong Student Leader na Si Fredrick Mark Bico Alba sina Vice President elect Sara Duterte-Carpio at Senator elect Loren Legarda.

 Si Alba ay namataang wala nang buhay ng kaniyang pamilya matapos umanong kitilin ang sariling buhay sa Barangay San Jose, Antique.

 Sinasabing si Alba ay isang BBM-SARA supporter kung saan, isang kaibigan ng biktima ang tumawag para i-report na si Alba ay biktima ng cyber bullying sa social media.

 Napag-alaman din na si Alba ay nag-suicide matapos makaranas ng depression.

Aabot sa 4.2 milyong pisong halaga ng smuggled cigarettes ang nakumpiska ng mga otoridad sa Kapatagan, Zamboanga City.

 Ikinasa ang operasyon sa tulong ng pinagsanib puwersa ng mga tauhan ng Philippine National Police (PNP), Philippine Airforce at Customs Police kung saan, naaresto ang tatlong hinihinalang smuggler.

 Nakuha sa mga inaresto ang 121 master cases ng mga puslit na sigarilyo na nasa loob ng isang closed van.

 Nahaharap ngayon sa kaukulang kaso ang mga inaresto habang isasailalim naman sa imbestigasyon at komposisyon ang mga nasamsam na smuggled cigarettes.