Naniniwala ang Philippine National Police (PNP) na pananakot lamang ang magkasunod na pagsabog sa Isabela City, Basilan noong Lunes.
Sa panayam ng DWIZ kay PNP Civil Security Group Director, BGEN. Valeriano de Leon, sinabi nitong tila nagbibigay mensahe ang dalawang pagsabog kung saan dalawa ang nasugatan.
Umaasa naman si de Leon na hindi na mauulit ang insidente lalo’t malapit na ang pag-upo sa pwesto ni President-elect Ferdinand ‘Bongbong’ Marcos Jr.
May person’s of interest na ang Philippine National Police (PNP) sa kambal na pagsabog sa Isabela City, Basilan noong Lunes.
Ayon kay PNP officer-in-charge, LT. Gen. Vicente Danao Jr., narekober na ang CCTV footage sa unang insidente ng pagsabog.
Naganap ito dakong alas-5:45 ng hapon noong Lunes sa parking lot ng isang fast food chain.
Sa video, makikita ang isang lalaking nakasuot ng dilaw na damit at cap na nagsilid ng container sa cellophane na kalaunan ay sumabog.
Ang pangalawang pagsabog ay napansin naman ng security guard ng D’Biel transportation kung saan isang kahon ang iniwan ng isang pasahero bago ito sumabog.
Sa ngayon, nagpapatuloy pa ang imbestigasyon ng PNP habang pinaghahanap na ang mga salarin.
Iniutos na ng Department of Transportation (DOTr) sa lahat ng transport operators ang pagpapatupad ng mahigpit na seguridad matapos ang magkasunod na pagsabog sa Isabela City, Basilan.
Ayon sa DOTr, dapat maging mapagbantay ang lahat ng bus, rail, sea vessel at tollway operators laban sa anumang banta sa seguridad.
Ilan sa kailangang paigtingin ay ang pagsuri sa mga gamit na ipapasok at ilalabas, pag-deploy ng security personnel, equipment at K9 units; pag-report ng kahina-hinalang pasahero at security plan sa counter bus attacks.
Noong Lunes, dalawa ang nasugatan sa nasabing mga pagsabog sa isang fast food restaurant at bus terminal sa Isabela City.
Nakakita ang Philippine Coast Guard (PCG) ng bagong ebidensiya sa posibleng dahilan ng sunog sa MV MERCRAFT 2 sa Real, Quezon noong nakaraang linggo.
Ayon kay Admiral Artemio Abu, Commandant ng PCG, maraming highly combustible materials ang natagpuan nila sa deck ng barko.
Kasabay ng init ng panahon, posibleng sumiklab ang naturang materyales dahilan ng sunog na kumitil sa buhay ng pitong pasahero.
Hindi naman tinukoy ng opisyal ng PCG kung anong klase ng materyales ang nagliyab sa barko.
Sa ngayon, patuloy ang imbestigasyon ng PCG at MARINA sa pagsabog na sinundan ng sunog.
Arestado ng mga otoridad ang magkapatid na suspek sa pagpatay sa isang lalaki sa Brgy. San Gregorio, San Pablo City.
Kinilala ang nasawing biktima na si Diolando Banayad habang ang dalawang magkapatid na suspek ay kinilalang sina Maximino Oribiada, 34-anyos at Ryan Oribiada, 25-anyos.
Sa imbestigasyon ng mga tauhan ng San Pablo City PNP at SWAT- San Pablo City, nasawi ang biktima matapos paluin ng kahoy at bote sa ulo ng mga suspek sa Railroad, Brgy. San Gregorio.
Ayon sa kapatid ng biktima na si Beverly Banayad Constantino, nagkaroon ng hindi pagkakaunawaan sa pagitan ng biktima at mga suspek kung saan, lumabas sa medical results na head injuries ang ikinamatay ni Banayad.
Patuloy pang nagsasagawa ng imbestigasyon ang San Pablo City PNP hinggil sa kasong Murder laban sa mga suspek.
Naglaan ng P1-B pondo ang Department of Labor and Employment (DOLE) para sa mga displaced workers sa rehiyon ng Cordillera.
Ayon kay DOLE regional Director Nathaniel Lacambra, nasa 164, 841 displaced workers na ang nakinabang sa employment assistance sa ilalim ng Tulong panghanapbuhay sa ilalim ng Disadvantaged/Displaced Workers o TUPAD program.
Sa datos ng ahensya noong Mayo a-25, ang lalawigan ng Benguet ang may pinakamalaking disbursement na P80, 827, 250 na may 15,429 na benepisyaryo; sinundan ng Baguio City na mayroong P10, 500, 000 na may 2,000 manggagawa; Apayao na mayroong P9, 891, 000 na may 1,884 na manggagawa; Abra na mayroong P8, 483, 220 na may 1,661 manggagawa; Kalinga na mayroong P3, 126, 590 na may 823 na manggagawa; Ifugao na mayroong P2, 732, 310 na may 770 na manggagawa; at Mt. Province na mayroong P1, 997, 500 na may 565 manggagawa.
Sa ngayon ay nasa kabuuang P1, 156, 762, 644.73 na ang nai-download sa ahensya kung saan, P957, 806, 510.72 na ang naipamahagi sa 164, 841 na benepisyaryo.
Tulong ng gobyerno sa mga displaced workers bilang emergency employment na nawalan ng trabaho sa gitna ng pandemiya.
Tatlo ang sugatan sa magkasunod na pagsabog sa Isabela City, Basilan, kahapon.
Dakong ala-5:30 ng hapon yumanig ang unang pagsabog sa loob ng isang fastfood restaurant sa Plaza Rizal.
Ayon kay Brig. Gen. Domingo Gobway, commander ng Joint Task Force Basilan, bahagyang napinsala sa pagsabog ang likurang bahagi ng naturang establisimyento.
Dakong ala-6:15 naman nang umalingawngaw ang isa pang pagsabog sa bus terminal sa Valderosa Street, Barangay La Piedad kung saan tatlo ang nasugatan at isang nakaparadang truck ang nawasak.
Bagaman inaalam pa kung ano ang sanhi ng mga pagsabog, umapela naman ang City Disaster Risk Reduction and Management officer sa mga residente na maging kalmado at iwasang mag-panic.
Patay ang 51- anyos na babae matapos tumalon sa sinasakyang jeep sa bayan ng San Guillermo, Isabela.
Batay sa imbestigasyon ng San Guillermo Police, kinilala ang nasawi na si Josie Parocha Ordenas na nagtamo ng head injury.
Papunta sanang sentro ng bayan ang jeep na may kargang mais at siyam na pasahero nang bigla itong tumirik sa pataas na bahagi ng kalsada dahil wala ng gas.
Nataranta na ang sakay ng jeep nang umatras ito dahilan para magtalunan sila sa sasakyan.
Gasgas lamang ang natamo ng ilang pasahero na agad ding nalapatan ng lunas.
Hindi na kinasuhan ang driver na kamag-anak din ng mga biktima pero nangako itong tutulong sa gastusin ng nasawi.
Umaabot na sa P10 kada kilo ang ibinebentang Carrots ng ilang magsasaka sa La Trinidad, Benguet.
Ayon sa kanila, walang bumibili sa alok nilang gulay kaya nagpasya silang ibenta na ito sa mababang halaga.
Nabatid na una na ring sinabi ng League of Associations sa La Trinidad vegetable trading areas na matumal ngayon ang bilihan ng Carrots.
Bunsod ito ng patuloy na smuggling ng gulay partikular ang Carrots na nakakaapekto sa maraming magsasaka.
Inihayag ng Dagupan City Health Office na nakitaan nila ng pagtaas ang naitatalang kaso ng rat bite sa lungsod.
Batay kasi sa datos ng DCHO, dalawa hanggang tatlong rat bite cases ang kanilang naitatala kada araw.
Anila, dumudulog sa kanilang tanggapan at sa mga health center ang kanilang mga residente para humingi o magpaturok gamot gaya ng Anti-tetanus at Anti-rabies
Mayroon naman daw sapat na supply ng Anti-rabies vaccines ang naturang city health center para sa mga pasyenteng biktima ng kagat ng hayop.
Sa ngayon, pumalo na sa halos tatlong libong animal bite cases ang naitala sa Dagupan simula lamang noong Enero hanggang Mayo ng kasalukuyang taon.