RONDA PROBINSYA

Natabunan ng gumuhong lupa ang dalawang bahay sa Bontoc, Mountain Province kahapon ng madaling araw.

Ayon kay Bontoc Local Government spokesperson Christy Mae Che-es, isang puno ang tumumba at tumama sa isang water pipe dahilan ng landslide sa lugar.

Mabilis na nakalikas ang tatlong indibidwal na nakatira sa natabunang bahay kung saan, isa sa kanila ang nasugatan sa paa matapos makaapak umano ng bote habang nagmamadaling lumikas.

Nagsasagawa na ng imbestigasyon sa lugar kasabay ng clearing operation ang mga otoridad matapos ang insidente.

Dead on arrival sa ospital ang dalawang menor de edad matapos masagsaan ng isang pick-up sa Barangay Bislig, San Andres, Catanduanes.

Base sa imbestigasyon ng mga otoridad, ang nasabing sasakyan ay pagmamay-ari umano ng pamahalaang panlalawigan ng Catanduanes kung saan, binabaybay ng puting pick-up ang kahabaan ng bayan ng pandan patungo sa Bayan ng Virac nang maganap ang insidente.

Ayon sa Catanduanes Police Provincial Office, aksidenteng nitong nasakop ang kabilang linya ng kalsada sa bahagi ng Barangay Bislig matapos umanong mawalan ng control ang sasakyan.

Dito na nabangga ng driver ng pick-up ang dalawang bata na may edad 9 at 16.

Nasa kustodiya na ng mga pulis ang driver na hindi na pinangalanan na mahaharap sa kasong Reckless Imprudence Resulting in Multiple Homicide.

Handa nang rumesponde ang Department of Social Welfare and Development (DSWD) sa mga naapektuhan nang pagputok ng Bulkang Bulusan sa Sorsogon.

Ayon sa DSWD, naghanda na sila ng 25, 069 family food packs na available sa DSWD warehouse sa Legaspi City, Catanduanes at Masbate.

Bukod pa rito ang nakahandang food items na nagkakahalaga ng halos P17-M  at non-food items na halos P31-M.

Sa ngayon, ini-activate na ng DSWD ang Social Welfare and Development team at quick reaction teams na makikipag-ugnayan sa Sorsogon Local Government para sa updates at tulong.

Nakataas pa rin ang Alert level 1 sa Bulkang Bulusan sa Sorsogon.

Ito ay matapos makapagtala ng phreatic eruption sa bulkan na naganap dakong alas-10:35 ng umaga kahapon na tumagal ng 17 minuto.

Batay sa datos ng PHIVOLCS hanggang alas-8 kagabi, umabot na sa 27 ang mahihinang pagyanig na naitala sa paligid ng Bulusan.

Nabalot na rin ng abo ang mga Barangay ng Puting Sapa, Añog, Guruyan, Catanusan, Buraburan, Bacolod, Sangkayon sa Bayan ng Juban at Bolos sa Irosin.

Tuloy din ang dumagundong na tunog at amoy ng asupre sa Añog, Guruyan at Catanusan.

Samantala, muling nagbabala ang PHIVOLCS sa mga residente na iwasang pumasok sa loob ng 4-kilometer danger zone ng bulkan.

Umabot sa 52 pamilya ang lumikas sa Barangay Puting Sapa, Juban, Sorsogon dahil sa pagputok ng Bulkang Bulusan.

Ayon kay Arvee Lodronio, pinuno ng Juban MDRRMO, bagaman wala pang forced evacuation ay nagpasya na silang palikasin ang mga residente.

Ito ay para makaiwas sa epektong dulot sa kalusugan ng amoy ng asupre at abo mula sa bulkan.

Bagaman hindi pa matiyak kung hanggang kailan mananatili sa evacuation center, nagpahayag ng kahandaan ang lokal na pamahalaan na magpaabot ng tulong.

Sa ngayon, tubig ang pangunahing hinahanap sa lalawigan dahil ang bukal na pinagkukunan ng tubig ay naapektuhan din ng pagsabog.

Samantala, inirekomenda na rin ng Juban MDRRMO ang suspension ng klase sa mga apektadong barangay.

Nagpositibo sa mataas na lebel ng Arsenic ang tubig sa walong bayan at isang lungsod sa paligid ng Taal Lake, Batangas.

Ayon kay Dr. Rhodora Reyes, chief ng Batangas Medical Center Toxicology Center at Head ng provincial IATF on Arsenic, positibo sa naturang kemikal ang tubig sa Laurel, Balete, San Nicolas, Mataas na Kahoy, Alitagtag, Sta. Teresita, Lemery, Taal at Tanauan City.

Isang uri ng kemikal ang Arsenic na nagdudulot ng cancer sa balat at baga na kumakalat sa pamamagitan ng hangin at iniinom na tubig.

Paalala naman ng provincial health office sa mga residente na iwasan muna ang pag-inom ng tubig galing sa lawa at limitahan ang oras ng paglangoy dito.

Makikinabang sa socialized housing project ng gobyerno sa Pinabacdao, Samar ang tinatayang 30 mga dating rebelde.

Ayon kay Provincial Social Welfare and Development officer Alma Austero, wala nang balak na bumalik pa sa kanilang mga barangay ang mga sumukong miyembro ng New People’s Army (NPA).

Maliban sa libreng pabahay at sakahan, sumalang din sa skills at livelihood training ang mga dating rebelde upang maging produktibo ang mga ito sa kanilang pagbabalik sa malayang komunidad.

Susubukang sungkitin ng Asingan, Pangasinan ang Guinness World record para sa pinakamahabang ‘sticky rice cake delicacy’ sa gaganaping Kankanen Festival sa susunod na taon.

Ayon kay Asingan Mayor Carlos Lopez Jr., matagal na nilang planong gumawa ng world record ngunit naantala ito dahil sa pandemya.

Sinabi ni Lopez na target nilang ilatag ang ‘inkiwar’ na isang native Ilokano cake dessert o meryenda na gawa sa malagkit na bigas at niyog na may isang kilometro ang haba.

Sugatan ang tatlo katao sa Mlang, Kidapawan City matapos manalasa ang isang tornado kahapon.

Ayon kay Bernardo Tayong, officer ng Mlang’s Municipal Disaster Risk Reduction and Management, partikular na sinalanta ng buhawi ang daan-daang kabahayan sa Bayan ng Bialong, Buayan, Tawan-Tawan at Poblacion.

Sinamahan pa ng malakas na ulan, hangin, pagkulog at pagkidlat ang buhawi.

Unang nakita ang pangyayari sa Barangay Tawan-Tawan na kumilos sa mga katabing bayan.