RONDA PROBINSYA

Umabot na sa mahigit 4,600 na ang naitalang kaso ng Dengue sa Central Visayas.

Ayon sa Department of Health (DOH), naitala ito mula Enero a-1 hanggang Mayo 28 ngayong taon.

Mataas ng 421% sa naitalang Dengue cases sa kaparehong panahon noong isang taon.

Kabilang sa nasabing datos ang 38 nasawi na karamiha’y nagmula sa mga lungsod ng Cebu, Mandaue, Lapu-Lapu, Talisay at Bayan ng Minglanilla.

Maliban sa Central Visayas, nakita rin ng DOH na lumagpas na sa dengue average cases ang naitalang kaso ng sakit sa Cagayan, Isabela at Nueva Vizcaya.

Sa ngayon, nagpalabas na ng pondo ang DOH sa kanilang Regional offices upang makontrol ang dengue cases.

Nasakote na ng Philippine National Police ang sampung miyembro ng Tau Gamma Phi Fraternity na sangkot sa hazing sa ikinamatay ng isang Grade 12 student sa Kalayaan, Laguna noong Marso.

Ayon kay Laguna Police Chief, Major Reden Bie Valdez, naaresto ang mga suspek sa pamamagitan ng manhunt operation alinsunod sa warrant of arrest na inilabas ng Regional Trial Court Branch 28 sa Sta. Cruz, Laguna.

Kasong paglabag sa republic act 11053 o Anti-Hazing Act of 2018 ang kakaharapin ng mga suspek.

Marso nang masawi si Reymarc Rabutazo, 18-anyos matapos ang initiation rites ng Tau Gamma.

Patay na nang matagpuan sa Bacacay, Albay ang isang babaeng magtatapos sanang Cum Laude.

Kinilala ni Bacacay Police Chief, Maj. Irvin Bellen, ang biktimang si Rhea Boneo, 22-anyos na posibleng ginahasa dahil punit-punit ang suot nito nang makita sa masukal na lugar.

Bukod sa saksak na tinamo ng biktima, ginilitan din ito nang madiskubresa Purok Tres.

Dakong alas-5 ng hapon noong linggo nang umalis ang biktima para kunin ang padalang pera ng kaniyang kapatid.

Gayunman, hindi na ito umuwi kaya nagpasaklolo na sa mga pulis ang kanyang pamilya.

Sa ngayon, may persons of interest na ang pulisya pero pinaghahanap pa rin ang mga ito.

Magtatapos sanang Accountancy at running for Cum Laude ang biktima na isa ring scholar at working student sa Divine World College sa Legazpi City.

Inalis na ng lokal na pamahalaan ang curfew hour matapos ibaba ang Alert level status sa Cagayan de Oro laban sa COVID-19.

Sa inilabas na Executive Order (EO) no. 104 na nilagdaan ng alkalde ng lungsod na si Oscar Moreno, kung saan agarang epektibo ang pagtanggal ng curfew hours.

Nakapaloob din sa EO na kailangang pasiglahin ang ekonomiya ng Local Government Unit (LGU), na labis na nagsakripisyo dahil sa mahigpit na patakaran para mapigilan ang muling pagsirit ng COVID-19.

Nagpaalala naman si Moreno na panatilihin ang kapayapaan at kaayusan sa ilalim ng bago at mas pinaluwag na patakaran.

Umabot na sa 216 na mga residente ang lumikas matapos maapektuhan ng pagputok ng Bulkang Bulusan na matatagpuan sa lalawigan ng Sorsogon.

Ayon kay Sorsogon Governor Francis “Chiz” Escudero, karamihan sa mga lumikas ay mga residente ng Barangay Puting Sapa sa Munisipalidad ng Juban.

Sinabi ni Escudero na karamihan sa mga inilikas ay mga bata kung saan, sa evacuation area na nagsagawa ng face-to-face classes pero agad itong sinuspinde ng National Disaster Risk Reduction and Management Council (NDRRMC).

Kabilang sa mga paaralang ipinatigil sa klase ay ang Puting Sapa Elementary School, Sangkayon Elementary School at Añog Elementary School sa Juban.

Dagdag pa ni Escudero na maraming residente ang nais manatili sa lugar habang ang iba namang lumikas ay gusto nang makabalik upang makapagsimula na sa pagkukumpuni ng kanilang nasirang tirahan.

muli namang nanawagan sa mga residente ang mga otoridad na delikado ang ashfall na nagmula sa bulkan kaya mainam na manatili nalang muna sa loob ng bahay at huwag na munang lumabas kung hindi kinakailangan.

Dalawamput siyam na volcanic earthquakes ang naitala sa Bulkang Bulusan sa Sorsogon sa nakalipas na 24-oras.

Ayon sa PHIVOLCS, naitala ang phreatic eruption bandang 10:37 ng umaga nitong linggo na tumagal ng 17 minuto.

Naobserbahan din ang plume mula sa bulkan na umabot sa 150 meters.

Binalaan naman ng PHIVOLCS ang publiko na iwasang pumasok sa 4-kilometer danger zone, maging sa 2-kilometer extended danger zone sa southeast part ng bulkan.

Sa ngayon ay nakataas ang Alert level 1 sa Bulkang Bulusan.

Arestado ang apat na suspek kabilang na ang tatlong pulis matapos magbenta ng pekeng gold bar sa Cagayan de Oro.

Inaresto si Rey Naranjo, 58-anyos at tatlong hindi pa pinapangalanang pulis habang patuloy pang hinahanap ang iba pa nilang kasabwat na sinasabing miyembro umano ng Ganghaan Landless Association (GALA) na nagbebenta umano ng mga gold bar, partikular na sa Lungsod, Misamis Oriental at Bukidnon.

Nakuha sa kanila ang dalawang gold bar na paniniwalaang mga peke at ibinibenta sa halagang P1.8-M, tatlong mobile phone, marked money at PNP identification o ID card na nakapangalan kay Naranjo.

Inihahanda na ng mga tauhan ng City Mobile Force Company (CMFC) ang mga kaso laban sa mga suspek na nakakulong sa Cagayan de Oro Police Office.

Ipinagmalaki ng Department of Environment and Natural Resources (DENR)-Region 6 Western Visayas ang naging rehabilitasyon ng sikat ng Boracay Island sa ilalim ng pamumuno ni Pangulong Rodrigo Duterte.

Ayon kay DENR Region 6 Director Livino Duran, isang malaking tagumpay at mahalagang environmental achievement ang pagpapaganda sa Isla ng Boracay dahil sa Administrasyong Duterte.

Sinabi ni Duran na sa gitna ng pagdiriwang ng Environment Month, 90% nang kumpleto ang rehabilitation program sa pinaka kilalang beach destination sa bansa.

Umaasa ang DENR Region-6 na magiging prayoridad pa rin ng susunod na administrasyon ang rehabilitasyon sa nasabing isla upang mapanatili ang balanse ng kapaligiran at turismo ng bansa.