RONDA PROBINSYA

Inihayag ng Department of Health (DOH) na lagpas na sa alert epidemic threshold ang mga naitatalang kaso ng dengue sa ilang probinsya sa Cagayan Valley.

Sinabi ni Health Undersecretary Maria Rosario Vergeire, na sa ngayon ay mas mataas na ang mga kaso kumpara sa naitala nuong nakaraang taon.

Karamihan sa mga dengue cases na naitala ay mula sa mga lalawigan ng Cagayan, Isabela at Nueva Vizcaya.

Samantala, naglaan naman ang kagawaran ng pondo bilang tugon sa mga lokal na pamahalaan sa rehiyon at naglagay na rin sila ng fast lane sa mga ospital para sa mga dengue patients.

Habang patuloy na binabantayan ng DOH Ang Central Luzon, Central Visayas at Zamboanga Peninsula dahil sa pagtaas ng mga kaso ng dengue sa nabanggit na mga rehiyon.

Umabot na sa P20, 285, 928 ang kabuuang halaga ng pinsala sa sektor ng agrikultura bunsod ng pagputok ng Bulkang Bulusan sa Sorsogon.

Ayon kay National Disaster Risk Reduction and Management Council (NDRRMC) executive director Ricardo Jalad, may kabuuang 3,698.76 ektarya ng mga high-value crops ang nasira sa nabanggit na lugar kung saan, pinaka-apektado ang mga magsasaka bunsod ng ashfall sa lugar.

Sinabi ni Jalad na naglagay na ang kanilang ahensya ng evacuation site para sa mga alagang hayop upang maprotektahan mula sa mga panganib ng ashfall at mabigyan ng tulong ang mga apektadong lokal na magsasaka.

Wala namang nakitang pinsala sa mga sistema ng transportasyon, komunikasyon, at kuryente pero problema ng mga residente sa lugar kung saan, kukuha ng malinis na inuming tubig.

Sa ngayon, patuloy na binabantayan ng NDRRMC ang sitwasyon sakaling muling magkaroon ng pagsabog ang Bulkang Bulusan sa mga susunod na araw.

Inihayag ng National Disaster Risk Reduction and Management Council (NDRRMC) na umabot na sa halos 14K indibidwal ang apektado ng pagputok ng Bulkang Bulusan.

Ayon kay NDRRMC spokesperson Mark Timbal, ang 13,920 indibidwal ay katumbas ng 2,784 pamilyang apektado ng phreatic eruption at ashfall sa Sorsogon.

Kabilang sa mga apektadong residente ay mula sa mga Munisipalidad ng Juban, Irosin, at Casiguran na lubhang naapektuhan ng pagputok ng bulkan.

Samantala, nagpaalala naman sa mga residente ang NDRRMC na maging maingat sa pagpasok sa two-kilometer radius extended danger zone.

Sa ngayon, patuloy paring ipinagbabawal ng NDRRMC ang pag-access sa four-kilometer radius permanent danger zone sa paligid ng bulkan.

Wala paring natatanggap na tulong mula sa Lokal na Pamahalaan ang Irosin, Sorsogon matapos ang phreatic eruption sa Bulkang Bulusan.

Ayon sa Irosin Municipal Risk Reduction and Management Office, nasa limang barangay ang naapektuhan ng ashfall dahil sa pag-alburoto ng Bulkang Bulusan.

Sinabi ng Irosin MRRMO na malinis na tubig ang pinaka-kailangan ng mga nabanggit na barangay maging ng N95 mask.

Hindi pa rin kasi inaalis ng PHIVOLCS ang posibilidad na muling pumutok ang Bulkang Bulusan.

Papalo na sa halos P100 ang presyo sa kada litro ng diesel sa Puerto Princesa City, Palawan.

Nabatid na maglalaro sa P99.61 centavos ang presyo sa kada litro ng diesel sa nasabing lugar.

Umabot naman sa kalsada ang pila ng mga nagpapakarga ng langis sa lipa, batangas kung saan, maglalaro naman sa P75 hanggang P80 ang presyo sa kada litro ng diesel.

Sa naging panayam ng DWIZ, sinabi ni Department of Energy (DOE) Undersecretary Gerardo Erguiza Jr. na imposibleng umabot sa P100 ang presyo ng bawat litro ng langis sa bansa.

Sinabi ni Erguiza na walang mabigat na dahilan para umakyat sa mas mataas pang presyo ang produktong petrolyo.

Dahil dito, nagsasagawa na sila ng structure review sa presyohan ng langis at isyu na maaring magkaroon ng buffer sa oil supply.