NATIONAL NEWS

Welcome sa Commission on Human Rights ang rekomendasyon ng House Quad Committee na kasuhan ng crimes against humanity sina dating pangulong Rodrigo Duterte; Senador Ronald Dela Rosa; Christopher “Bong” Go, at ilang iba pa kaugnay sa kontrobersyal na drug war campaign ng nakaraang administrasyon.

Kaugnay nito, iginiit ng CHR na walang sino man ang nakatataas sa batas, may posisyon man o wala.

Binigyan-diin pa ng komisyon na panahon na para kilalanin ng bansa na ang totoong hutisya ay nangangailangan ng makatarungan at makataong solusyon.

Nabatid na kabilang din sa mga inirekomendang kasuhan ng quadcomm sina dating PNP chiefs Oscar Albayalde at Debold Sinas; dating PCSO general manager Royina Garma, dating NAPOLCOM commissioner Edilberto Leonardo, at dating palace aide Ermina “Muking” Espino.  – Sa panulat ni Kat Gonzales

Suportado ng mayorya ng mga Pilipino na gawing polymer ang Philippine banknotes.

Batay sa Consumer Expectation Survey ng Bangko Sentral ng Pilipinas, 61.3% ng respondents ang nagsabing pabor sila sa salaping gawa sa polymer, na mas mataas ng 10.9% noong 2023.

Matatandaang inilabas ng BSP kamakailan ang bagong disenyo ng P50, P100, at P500 banknotes na bahagi ng first Philippine polymer banknote series, kung saan tampok ang larawan ng mga hayop at halamang matatagpuan lamang sa Pilipinas.

Magiging available ang limitadong bilang ng mga bagong polymer banknote denominations sa Greater Manila area ngayong buwan at tuluyang papasok sa sirkulasyon sa unang bahagi ng 2025.

Dagdag pa ng BSP, tuloy pa rin ang pag-ikot ng mga perang may mukha ng mga bayani ng bansa.

Gumastos ang Bangko Sentral ng Pilipinas ng 5.95 billion pesos para sa mga bagong polymer banknotes.

Ayon sa Commision on Audit, inaprubahan ng monetary board ang limang kontrata sa supply nuong ikatlo at huling bahagi ng 2023 para sa produksyon ng mga bagong pera.

Sa ilalim ng ‘New Generation Currency Series’, ang P1,000; P500; P150 ang mayroong mga bagong denominasyon.

Sa halip, tampok sa mga bagong bills ang mga katutubong hayop at halaman, tulad ng Philippine Eagle; Visayan Spotted Deer; sampaguita flower at endemic orchid.

Inaasahang magiging available sa buong bansa ang bagong denominasyon sa Enero ng susunod na taon.  – Sa panulat ni Kat Gonzales

Bagama’t hindi pa pirmado ni Pang. Bongbong Marcos ang panukalang pambansang budget para sa 2025, siniguro ni Senator Imee Marcos na hindi makokompromiso ang paggasta ng gobyerno kapag nagpalit na ang taon.

Ayon sa Presidential Sister, hindi naman malaking trabaho ang paglagda ng Pangulo sa national budget dahil kaunti lang naman aniya ang mga kontrobersyal na item.

Kabilang na ang halos P12-bilyongtapyas-budget ng Department of Education, pag-zero sa subsidiya ng Philippine Health Insurance Corporation at ang pagbabalik sa P26-bilyong budget ng kontrobersyal na Ayuda sa Kapos ang Kita Program.

Sinabi pa ni Senador Marcos na kayang-kaya naman na gawing pulido ang proposed P6.352-trilyong national budget kung gugustuhin ng palasyong ibalik ito sa Bicameral Conference Committee.

Hinimok ng mambabatas si Presidente Marcos na alisin sa badyet ang mga isiningit ng mga kapwa niya mambabatas, gaya ng sinasabi umanong 1-trillion peso fundraising para sa impeachment ni Vice President Sara Duterte.

Ito’y upang mabigyan aniya ng garantiya ang sambayanang Pilipino na hindi para sa interes ng iilan lamang ang pambansang budget na kasadong tintahan ni Pangulong Marcos sa Disyembre a-30.

Namemeligro pang tumagal ang biyahe ng mga motorista patungong Bicol, Eastern Visayas at Mindanao pabalik ngayong holiday season.

Ito’y makaraang mapinsala ang iba pang kalsada sa ilang bahagi ng camarines sur bunsod ng walang tigil na pag-ulan.

Maliban sa Andaya Highway sa Bayan ng Lupi, na inayos kamakailan, nakitaan din ng mga sira, gaya ng mga bitak ang Maharlika Highway sa Libmanan.

Kinumpirma ng Libmanan Municipal Disaster Risk Reduction and Management Office namataan ang lumaking bitak sa Barangay Bikal.

May bitak at bako rin ang southbound lane ng maharlika highway na bahagi ng road widening project ng DPWH kaya’t asahan pa ang mabigat na daloy ng trapiko na sasalubong sa mga dumaraan sa Camsur sa mga unang araw ng taong 2025.

Bagaman wala pang pahayag ang DPWH Regional Office-5 kung kailan masisimulan ang repair, tiniyak ng Camarines Sur Provincial Police Office na handang umalalay ang pulisya para mapanatili ang maayos na daloy ng mga sasakyan.

Posibleng harangin sa Supreme Court ang 2025 general appropriations bill.

Ito ang sinabi ni Senator Juan Miguel Zubiri, kung pipirmahan ni Pangulong Ferdinand Marcos Jr., ang panukalang pondo nang hindi inaalis ang ilang mga probisyon.

Ayon sa Senador, dapat maibalik ang tinanggal na budget sa computerization program ng Department of Education at ang P74 billion subsidy sa Philippine Health Insurance Corporation Inc. o PhilHealth.

Matatandaang nakatakdang pirmahan ni Pangulong Marcos ang gaa sa Disyembre a-30 na naglalaman ng P6.352 trillion budget matapos ipagpaliban dahil sa ibinawas na mga pondo at ang bilyong pisong congressional insertion o pork barrel fund ng Department of Public Works and Highways o DPWH.

Una nang kinumpirma ni Executive Secretary Lucas Bersamin, na ilang probisyon ng national budget ang ive-veto ng Pangulo pero hindi binanggit kung anu-ano ang mga ito.

Isang araw matapos ang pagdiriwang ng pasko, unti-unti na muling bumibigat ang daloy ng trapiko sa ilang bahagi ng North Luzon Expressway.

Ayon kay NLEX Assistant Vice President for Traffic Operation Robin Ignacio, bahagyang dumami muli ang mga sasakyan lalo ang mga pabalik ng Metro Manila, simula kahapon.

Inaasahan na anya nilang tataas muli ang volume ng mga sasakyan pagtapos ng pasko at bago ang pagsalubong sa bagong taon o pagtapos ng Enero a – uno.

Dahil dito, pinayuhan ni Ignacio ang mga motorista na planuhing maigi ang kanilang biyahe.

Kumpiyansa si Malay, Aklan Mayor Frolibar Bautista, na tataas ang bilang ng mga turista sa isla ng boracay bago matapos ang taong 2024.

Sa panayam ng DWIZ, inamin ng Alkalde na kumpara sa nakaraang taon, mababa ang naitalang bumisita sa Boracay na umabot lamang ng 2,032,000.

Aniya, kakaunti na lang ang mga namamasyal sa naturang lugar kumpara sa mga nakalipas na panahon na grupo-grupo pa ang mga nagpupunta.

Dagdag pa ni Mayor Bautista, na maraming negosyo sa kilalang lugar ang naapektuhan partikular na ang mga Chinese market.

Nilinaw ng Department of Social Welfare and Development na malinis ang mga pagkaing inihahanda sa Walang Gutom Kitchen.

Sa panayam ng DWIZ, iginiit ni DSWD Spokesperson Assistant Secretary Irene Dumlao na ‘fit for consumption’ ang mga pagkain na ipinamimigay sa Walang Gutom Kitchen dahil ang mga ito ay hindi naibenta, nagalaw  o naihain.

Tiniyak din ni Asec. Dumlao, na nakakatulong ang nasabing programa upang mabawasan ang food wastage dahil sa pagdo-donate ng food surplus ng mga restaurant; fast food chains at mga hotel. –  Sa panulat ni Alyssa Quevedo