NATIONAL NEWS

Nilinaw ng National Grid Corporation of the Philippines na hindi sila ang makakasagot kaugnay sa kakulangan ng supply ng kuryente sa bansa kasunod ng pagsasabi ng kamara na magsasagawa ito ng imbestigasyon hinggil sa mataas na presyo ng kuryente sa Pilipinas.

Sa panayam ng DWIZ, iginiit ni NGCP Spokesperson Atty. Cynthia Alabanza, wala namang naganap na malawakang power outage kaya hindi kailangan ang imbestigasyon.

Dagdag pa ni Atty. Alabanza, wala silang kinalaman sa kakulangan ng electric supply dahil hindi sila ang nagbebenta ng kuryente.

Iginiit din ng ahensiya na, tumatalima sila sa batas hinggil sa pagpapataw ng singil sa kuryente. –  Sa panulat ni John Riz Calata

Nakukulangan si Senador Ronald Dela Rosa sa naging performance ng administrasyong Marcos para sa taong 2024.

Partikular na tinukoy ng Senador ang kampanya ng pamahalaan kontra iligal na droga dahil ngayon ay bumabalik na aniya ang mga drug user at ‘tila hinahamon pa ang gobyerno.

Samantala, sinabi naman ng Senador na maayos ang pagpapatakbo ng administrasyon pagdating sa sektor ng ekonomiya.

Sa kabilang banda, kuntento naman ang Senador sa naging performance ng Senado bagama’t hindi naisulong ang ilan niyang panukala tulad ng Mandatory ROTC at pagpapalit ng lider ng Senado. –  Sa panulat ni Laica Cuevas

Naninidigan si Senador Ronald Dela Rosa na hindi siya dadalo sa nakatakdang pagpirma ni Pangulong Ferdinand Marcos Jr. sa panukalang 2025 national budget ngayong araw, Disyembre a-30.

Ayon kay Senador Dela Rosa, kahit pa imbitahan siya ay hindi siya dadalo dahil may mga probisyon sa panukala na hindi niya sinasang-ayunan.

Sa kabila nito, umaasa ang Senador na mangingibabaw ang kapanan ng mga Pilipino bago pirmahan ng Pangulo ang pambansang budget para sa susunod na taon.

Isa ang Senador sa mga kumwestyon sa aniya’y pagbibigay prayoridad sa ayuda programs tulad ng AKAP o Ayuda para sa Kapos ang Kita Program  at AICS o Assistance to Individuals in Crisis Situations, habang nauwi naman sa zero subsidy ang Philippine Health Insurance Corporation. –  Sa panulat ni Laica Cuevas

Iginiit ni UP Economics professor JC Punongbayan na pananabotahe ang pagkamkam ng pamahalaan ng 50 billion pesos sa Land Bank of the Philippines at 25 billion pesos sa Development Bank of the Philippines para ilipat sa Maharlika Investment Fund.

Ayon kay Professor Punongbayan, malaki ang epekto nito dahil nawala ang pondo na dapat sana ay pampautang sa mga magsasaka at mangingisda, para pambili ng binhi at agri machineries.

Binigyang-diin pa ng Propesor na isa itong halimbawa ng administrasyon para kumuha ng pera sa gobyerno at iba pang Government Owned and Control Corporation (GOCC). –  Sa panulat ni Laica Cuevas

Asahan na ang magandang pagpasok ng bagong taon para sa mga motorista.

Ito’y dahil sa naka-umang na rollback sa presyo ng mga produktong petrolyo sa bisperas ng bagong taon.

Ayon sa Department of Energy-Oil Industry Management Bureau, .30 hanggang .65 sentimos ang posibleng tapyas presyo sa kada litro ng gasolina;

.30 hanggang .55 sentimos sa diesel habang otsenta hanggang nobenta sentimos sa kerosene o gaas.

Itinurong dahilan ng DOE ang oversupply ng langis ng mga oil producing countries.

Nanganganib pang tumaas ang presyo ng mga bilihin, lalo ng pagkain sa susunod na taon dahil sa kulangan ng supply sa kabila ng mataas na demand.

Ito ang ibinabala ng Ekonomistang si Professor Astro Del Castillo bilang tugon sa ulat na posibleng bahagyang umangat muli sa 2.6% ang inflation rate ngayong buwan.

Ayon kay Del Castillo, dapat tiyakin ng gobyerno na mapababa ang presyo ng kuryente na magtutulak naman upang bumaba ang presyo ng mga bilihin, lalo ng pagkain.

Maaari rin anyang makaapekto sa presyo ng mga bilihin ang opisyal na pag-upo ni Donald Trump bilang bagong pangulo muli ng Amerika dahil sa plano nitong baguhin ang mga taripa o trade transactions sa iba’t ibang bansa.

Samantala, itinuro naman ng Social Weather Stations ang pagsirit ng inflation na pangunahing rason ng pagbaba ng christmas optimism ng ilang Filipino matapos lumabas sa survey na nabawasan ang bilang ng mga Pinoy na nagsabing masaya ang kanilang pasko ngayong taon.

Ipinunto ni SWS Director for Communications and Information Technology Leo Laroza na hindi lang ang pagiging masaya sa pasko ang naging batayan kundi maging ang pagtingin ng bawat pamilya sa kanilang sarili kung mahirap  man sila o hindi. –  Sa panualt ni John Riz Calata

Mayorya ng mga Pilipino ang sasalubong sa bagong taon nang mayroong pag-asa kaysa takot.

Ito ay batay sa isinagawang survey ng Social Weather Stations kung saan 90& ng mga Pilipino ay may pag-asa sa 2025.

Mas mababa ito kumpara noong 2023 na 96%, at pinakamababa mula noong 2009.

Isinagawa ang nasabing survey noong December 12 hanggang 18 sa pamamagitan ng face-to-face interviews sa 2,160 respondents. – Sa panulat ni John Riz Calata

Tiniyak ng Department of Foreign Affairs na ginagawa na nila ang lahat upang mapawalang-sala ang 13 Pilipinang buntis na nakakulong sa Cambodia dahil sa sinasabing pagiging surrogate mothers.

Ayon sa DFA, patuloy ang pakikipag-ugnayan ng philippine embassy sa Phnom Penh sa Cambodian authorities kaugnay sa nasabing usapin.

Dagdag pa ng ahensiya, kaagapay din nila ang iba’t ibang sangay ng pamahalaan upang mapauwi ang 13 Pinay.

Nabatid na kabilang ang mga Pilipina sa 24 na kababaihan na kinasuhan ng attempted cross-border human trafficking sa cambodia dahil sa pagiging surrogate mothers. –  Sa panulat ni John Riz Calata

Nangangamba si dating Bayan Muna Party-List Rep. Teddy Casiño sa plano ni Vice President Sara Duterte na kunin ang ama nitong si dating pangulong Rodrigo Duterte bilang abogado para sa kanyang kinakaharap impeachment complaint.

Ayon kay Casiño, baka maging mala-circus ang pagdinig kaugnay sa pagpapatalsik kay VP Sara dahil sa presensya ni dating pangulong Duterte.

Ipinunto ng dating mambabatas ang ipinakitang asal ng dating pangulo  sa pagdinig ng senado hinggil sa sinasabing extrajudicial killings noong kaniyang administrasyon.

Sinabi ni Casiño, sa halip na seryosong mapag-usapan ang reklamo sa bise presidente ay mauwi ito sa politika, pagbabanta, pananakot at iba pang side issues.

Gayunman, nilinaw ng dating kinatawan ng bayan muna, na hindi iligal ang nasabing aksyon ng bise presidente dahil entitled ito na kumuha ng sinumang abugado.

Si Casiño ay bahagi ng ikalawang impeachment complaint na inihain laban kay VP Sara. –  Sa panulat ni John Riz Calata

Mayroong ginawang ilang pagbabago ang Department of Education sa kanilang alituntunin hinggil sa pagsuspinde ng klase at trabaho sakaling magkaroon ng sakuna.

Batay ito sa DEPED order 22, kung saan binase ito ng ahensya sa tropical cyclone wind signals na i-isyu ng PAGASA.

Sakaling nakataas ang apektadong lugar sa signal number 1, mga klase na lamang sa kindergarten ang suspendido kung saan sa dating panuntunan ay sakop na nito ang mga klase hanggang grade 12.

Para naman sa mga maapektuhang lugar na itataas sa signal number 2 ay suspendido ang face-to-face classes mula kindergarten hanggang grade 10 ngunit ito’y ililipat sa modular distance learning.

Samantala, sakaling sumailalim ang ilang lugar sa signal number 3 o mas mataas pa ay awtomatikong suspendido na ang mga klase sa lahat ng antas.

Nakadepende naman ang suspensyon ng klase sa i-deklarang mga rainfall warning signal ng PAGASA sakaling magkaroon ng heavy rainfall at pagbaha.

Kaugnay nito, ang Local Chief Executive ng lugar ang nakatalagang magdi-desisyon sakaling nasa ilalim ng yellow warning ang lugar habang awtomatikong suspendido naman ang klase mula kinder hanggang grade 12 kapag umabot na sa orange o red warning.