NATIONAL NEWS

Ipinanawagan ni Pangulong Ferdinand Marcos Jr., ang “conscientious” o paggamit ng konsensya sa paggastos ng P6.326-trillion pesos 2025 national budget.

Sa kanyang veto message na ipinadala kina Senate President Chiz Escudero at House Speaker Martin Romualdez, sinabi ni PBBM na ito ang magiging daan sa pagpapanatili ng high-growth trajectory ng bansa at patuloy na pagkontrol sa inflation rate.

Kaakibat ito ng pagpapabilis ng targeted social services at structural reforms na nakatuon sa pagkakamit ng medium-term goals tulad ng pagpapababa ng poverty incidence o kahirapan, unemployment rate, at pag-angat ng bansa sa upper middle-income status.

Iginiit ng Pangulo na bagama’t marami nang nakamit ang pamahalaan, mahaba pa rin ang pagdaraanan upang makamit ang inklusibo, sustainable, at future-proof na ekonomiya.

Kaugnay nito, isinulong naman ni pangulong marcos, ang paggamit sa 2025 budget nang walang balakid, at nakatutok sa misyong pasiglahin ang ekonomiya at baguhin ang lipunan tungo sa isang bagong Pilipinas na tutugon o tutupad sa mga pangangailangan at mithiin ng bawat Pilipino.

Iginiit ng pamahalaan na kahit may mga natanggal na proyekto o pondo sa ilalim ng 2025 national budget ay hindi nangangahulugang walang plano ang administrasyon ukol dito.

 Ayon kay Budget Usec. Goddess Hope Libiran, ang dahilan sa likod ng pag-veto ni Pangulong Ferdinand Marcos Jr. sa ilang probisyon ng 2025 budget, partikular na sa flood control at water management projects na bahagi ng irigasyon at food security ay dahil hindi pa “Implementation-ready” o kaya’y malabo ang layunin at detalye.

Aniya, karamihan sa mga proyektong vineto ay hindi naman kasama sa proposed President’s budget o National Expenditure Program kung saan dito nakapaloob ang mga inirekomendang proyekto ng mga implementing agencies tulad ng DPWH at MMDA na sinuri at aprubado para sa susunod na taon.

Iginiit ng opisyal na masusing binusisi ng pangulo at ng DBM kung alin sa mga naipasok na proyekto ang hindi pa maipapatupad sa 2025.

Maliban dito, nilinaw din ni Usec. Libiran, na ang NEP ay batay sa mga proyektong direkta nang inirekomenda ng mga implementing agencies at napatunayan nang handa para maipatupad.

Isang bagyo ang posibleng mabuo sa loob ng philippine Area of Responsibility sa unang buwan ng 2025.

Ayon sa PAGASA, posible itong mag-landfall malapit sa Eastern Visayas o Caraga Region.

Gayunman, sinabi rin ng state weather bureau na maaari itong lumihis sa bansa.

Patuloy namang nakakaapekto sa bansa ang intertropical convergence zone at shear line.

Inilabas na ng PAGASA ang listahan ng mga magiging pangalan ng bagyong papasok sa pilipinas ngayong taon.

Tatawagin ang mga ito na Auring, Bising, Crising, Dante, Emong, Fabian, Gorio, Huaning, Isang, Jacinto, Kiko, Lannie, Nando, Opong at Paolo.

Pasok din sa listahan ng mga pangalan ng bagyo ang Quedan, Ramil, Salome, Tino, Uwan, Verbena, Wilma, Yasmin at Zoraida.

Sakali namang sumobra sa 25 ang bilang ng bagyo ngayong taon, naglabas din ang PAGASA ng auxiliary names, na kinabibilangan ng Alamid, Bruno, Conching, Dolor, Ernie, Florante, Gerardo, Hernan, Isko at Jerome.

 Inilunsad na ng pamahalaan ang mas pinalawak na crackdown ng mga iligal na aktibidad na may kaugnayan sa Philippine Offshore Gaming Operators (POGO).

Ayon kay Solicitor General Menardo Guevarra, kabilang dito ang kanselasyon sa mga pekeng birth certificate ng mga foreign nationals at pagkuha sa mga iligal na real estates at iba pang mga ari-arian.

Binigyang-diin ni Solicitor General Guevarra na mga hakbanging ito ay kritikal upang maitaguyod ang immigration laws at property ownership.

Nabatid na ang mga POGO ay minsang nakapagpalakas sa ekonomiya ng bansa bagama’t ipinagbawal na dahil sa mga iligal na aktibidad nito tulad ng human trafficking, money laundering, at tax evasion. –  Sa panulat ni John Riz Calata

Nakatakdang muling magpatawag ang Senate Blue Ribbon Subcommittee ng pagdinig kaugnay sa war on drugs campaign ng nakaraang administrasyon.

Ayon kay  Senate Minority Leader Koko Pimentel, hindi sila nakapagtakda ng hearing noong nakaraang taon dahil wala aniyang kapangyarihan ang subcommittee na magpa-cite-in contempt ng resource person.

Gayunman, inamyendahan na aniya ang rules ng Senado kaya dadalhin na rin ng subcommittee ang prerogative ng mother committee na magpa-cite in contempt.

Tiniyak naman ng Senador na bubusisiin nila ng husto ang isyu lalo na sa sinasabing cash reward sa hanay ng PNP para sa mga mapapatay na drug suspects. –  Sa panulat ni Jeraline Doinog

 Kinumpirma ng Malacañang na magsisilbing kinatawan ni Pangulong Ferdinand Marcos Jr., si  Philippine Ambassador to the U.S. Jose Manuel Romualdez sa inagurasyon ni U.S. President-elect Donald Trump sa darating na Enero a-20.

Ayon kay Presidential Communications Office Sec. Cesar Chavez, nagmula ang imbitasyon sa joint committee on inaugural ceremonies, kung saan inanyayahan ang mga chief diplomat at kanilang mga asawa upang kumatawan sa mga lider ng kani-kanilang estado at pamahalaan.

Samantala, wala pang kumpirmasyon kung bibisita si Pbbm sa Estados Unidos upang makipagpulong kay President Trump sa unang bahagi ng taon.

Una nang iginiit ng pamahalaan ang kahalagahan ng diplomasya sa pagsusulong ng interes ng Pilipinas sa pandaigdigang komunidad. –  Sa ulat ni Gilbert Perdez (Patrol 13)

 Bagong taon, bagong taas singil sa ilang mga bayarin.

Una nang iniulat na simula kahapon, unang araw ng 2025, epektibo ang taas singil ng Maynilad at Manila Water.

Batay sa abiso mula sa Maynilad, P7.32 centavos per cubic meter ang average na dagdag singil; habang 5.95 centavos per cubic meter sa Manila Water.

Samantala, iaanunsyo ng MWSS sa buwan ng Marso kung magkakaroon ng pagbabago sa singil ng mga water concessionaire. –  Sa panulat ni Jeraline Doinog

Pangkalahatang naging mapayapa ang pagsalubong sa taong 2025.

Ayon kay Philippine National Police  Spokesperson Brig. Gen. Jean Fajardo, walang naitalang untoward incident sa pagdiriwang ng bagong taon, bagama’t may mga napaulat na firecracker-related injuries.

Umabot sa 593,094 ang mga nakumpiskang iligal na paputok ng PNP, na nagkakahalaga ng mahigit 3.9 million pesos.

73 naman ang naaresto dahil sa pag-iingat, paggamit at pagbebenta ng mga ipinagbabawal na paputok mula sa CALABARZON, Bicol,  National Capital Region, Central Luzon, Eastern Visayas at Zamboanga Peninsula.