NATIONAL NEWS

Patuloy pa rin ang pagtaas ng performance rating ni vice President Sara Duterte, sa kabila ng mga kontrobersya na kinahaharap ng kanyang pamilya at tanggapan.

Sa pinakahuling research poll na isinagawa ng WR Numero, nakakuha ng 50% ng approval rating ni VP Sara ngayong marso, mula sa 41% noong Pebrero.

Habang 29% ng mga respondent ang hindi nakatitiyak kung naging mahusay ba ang pamumuno ng bise presidente; 21% naman ang kanyang nakuhang disapproval rating.

Samantala, bumaba sa 29% ang performance rating ni Pangulong Ferdinand Marcos Jr. ngayong buwan, mula sa 30% noong Pebrero; tumaas naman ang kanyang disapproval rating sa 42%, mula sa 29%.

Isinagawa ang survey sa higit 1,800 respondents sa buong bansa noong March 31 hanggang April 7.—sa panulat ni John Riz Calata

Tiniyak ng Commission on Elections na mahigpit nilang babantayan ang gaganaping online voting systems ng mga OFW laban sa mga hacker.

Sinabi ni Comelec Chairman George Garcia na ang lahat ng mga source code review ay dumaan sa masusing proseso at international certification.

Aniya, lahat ng paraan upang mapahigpit ang seguridad ng botohon ay inilaan na ng ahensya upang masigurong hindi magkakaroon ng aberya sa online votings.

Pagbubunyag pa ng opisyal na mayroong nang 70,000 na insidente kung saan tinangkang i-hack ang kanilang system ngunit bigo ang mga ito.

Siniguro rin ng kagawaran na nakabantay bente kwatro oras ang sinanay nilang mga tauhan upang masigurong mahigpit ang seguridad ng halalan.

Ito ang kauna-unahang pagkakataon na magsasagawa ng internet voting sa kasaysayan ng Pilipinas. - sa panulat ni Jasper Barleta

Siniguro ng Commission on Elections na kanilang mareresolba ang lahat ng nakabinbin pang kaso laban sa mga kandidato bago magsimula ang botohan sa Mayo a-dose.

Ito ay kasunod ng mga show cause orders na inalatag ng kagawaran sa mga kandidatong sangkot sa mga pambabastos at bullying sa kasagsagan ng kampanya.

Ayon kay Comelec Chairman George Erwin Garcia, sa ngayon ay nasa 84% na ang kabuuang disposal rate ng Comelec o ang mga kasong hawak ng kagawaran na nahatulan na ng desisyon.

Aniya, doble kayod na ang ginagawa ng kanilang ahensya upang matapos ang lahat ng kaso sa tamang oras.

Patuloy naman ang panawagan ng Comelec sa mga kandidato na umiwas sa paglalabas ng mga pahayag na malalaswa, bastos o mapanira sa kani-kanilang mga campaign rallies. - sa panulat ni Jasper Barleta

Tatawagin nang Department of Economy, Planning, and Development o DEPDev ang National Economic and Development Authority.

Ito’y matapos na lagdaan ni Pangulong Ferdinand Marcos Jr., ang Republic Act No. 12145 o ang Economy, Planning, and Development Act noong Huwebes.

Layon nito na palakasin ang mandato, institutional independence at kapasidad ng ahensya bilang primary policy, planning, coordinating, at monitoring arm ng executive branch sa ekonomiya ng bansa.

Sinabi naman ni NEDA Secretary Arsenio Balisacan na sa pamamagitan ng paglikha sa DEPDev, matitiyak ang strategic continuity sa national development.  - sa panulat ni Hya Ludivico

Ipinag-utos ni Justice Secretary Jesus Crispin Remulla ang paglikha ng inter-agency task force para tutukan ang mga kaso ng kidnapping sa bansa.

Kasunod ito ng insidente ng pag-kidnap at pagpaslang sa Filipino-Chinese businessman na si Anson Que.

Ang nasabing task force ay bubuuin ng DOJ, Department of the Interior and Local Government, Philippine National Police, National Bureau of Investigation, at Bureau of Immigration.

Magkakaroon din ng hotlines, kung saan maaaring tumawag ang publiko para mag-tip, mag-report ng krimen at iba pang maaaring kailangangin ng mga komunidad.

Maliban dito, sinabi pa ng kalihim na hihilingin din sa korte suprema ang pagbuo ng special courts na hahawak sa mga kaso ng kidnapping. - sa panulat ni Hya Ludivico

Matagal nang inaasahan ng Palasyo ang impormasyon na si dating Presidential Spokesman Harry Roque ang sinasabing nasa likod ng pagpapakalat ng “Polvoron video” ni Pangulong Ferdinand Marcos Jr.

Ayon kay Palace Press Officer Claire Castro, noon pa man ay si Atty. Roque na ang sinasabing nag-utos sa mga kaalyado nito na ipakalat ang nasabing  video.

Dagdag pa ni Undersecretary Castro, hindi na lingid sa kaalaman ni Pangulong Marcos Jr. ang tungkol sa isyu, lalo’t sumailalim na sa masusing imbestigasyon at evaluation ang naturang video, kung saan napatunayang ginamitan ito ng face swap, batay sa fact-checking ng deepfake analysis.

Sa ngayon, ipinauubaya na muna ng Pangulo sa mga law enforcement agencies ang pag-aksyon sa rebelasyong inilabas ng isang vlogger, na nagsabing ang dating Presidential Spokesman ang mastermind sa pagpapakalat ng “Polvoron video”.

Sinabi ng Palace Official na sakaling makitaan ng pananagutan si Atty. Roque ay asahang sasampahan ito ng karampatang kaso. —sa panulat ni John Riz Calata mula kay Gilbert Perdez (Patrol 13)

Ligal ang naganap na pag-aresto kay dating pangulong rodrigo duterte ngunit iligal ang pag-surrender sa kanya ng Pilipinas sa International Criminal Court (ICC).

Ito ay ayon kay dating Supreme Court Justice Adolfo Azcuna, sa pagharap kanyang pagharap sa panibagong pagdinig ng Senate Committee on Foreign Relations hinggil sa pag-aresto sa dating pangulo.

Paliwanag ni Justice Azcuna, ligal ang warrant of arrest ng icc na inisyu at isinilbi ng  Interpol kay Duterte, bagamat noong 2019 ay naging  epektibo na ang  pagkalas ng Pilipinas sa Rome Statute.

Naniniwala din ang dating Supreme Court Justice na “extrajudicial rendition” ang pagsuko ng pamahalaan kay Duterte sa ICC. – —sa panulat ni John Riz Calata

Hinamon ng Malacañang ang mga nananawagan na sumailalim si Pangulong Ferdinand Marcos Jr. sa hair follicle test dahil sa alegasyong gumagamit ang pangulo ng iligal na droga.

Sinabi ni Palace Officer Claire Castro na dapat munang patunayan ng mga nag-aakusa ang kanilang mga paratang.

Kinuwestyon din ni Undersecretary Castro ang batayan ng mga akusasyon laban sa presidente.

Ayon sa Palace Official, sa kahit saang kaso, ang nambibintang  ang dapat maglabas ng ebidensya.

Binigyang-diin ni Undersecretary Castro na kung wala namang maipakitang konkretong ebidensya laban sa pangulo ay wala ring karapatan ang mga ito na mag-demand ng hair follicle test mula sa pangulo.—sa panulat ni John Riz Calata

Ipinatupad ni US President Donald Trump ang 90-araw na pagpapahinto sa taas-taripa sa karamihan ng mga bansa bukod sa China.

Sinabi ni President Trump na tanging mga bansang hindi tumutol sa naunang ipinataw na taripa ng Amerika ang makakakuha ng 10% US tariff hanggang sa Hulyo, kabilang na rito ang Pilipinas, na dating may 17% tariff rate.

Bukod sa Pilipinas, nakatanggap din ng mas pinababang taripa ang Vietnam, Thailand, Indonesia, Malaysia, Cambodia, at iba pa.

Habang ang China naman, mula sa dating 34% na tariff rate ay itinaas ito sa 125%.

Kasabay nito, binigyang-diin ni Pres. Trump ang mga katagang “When you punch at the United States of America, President Trump is going to punch back harder”.—sa panulat ni John Riz Calata

Trabaho, healthcare at food security ang nangungunang plataporma na hinahanap ng mga botanteng Pilipino sa mga kandidatong tumatakbo sa 2025 midterm elections.

Ito ay batay sa pinakahuling survey na inilabas ng social weather stations, kung saan 92% ng mga respondents ang nagsabing iboboto nila ang mga kandidatong may adbokasiyang may kaugnayan sa pagkakaroon ng trabaho; na sinundan naman ng healthcare at food security, na may 91%; at 90% naman para sa pantay na access sa edukasyon.

89% naman ng mga respondent ang sumusuporta sa mga kandidatong nagtataguyod ng mga karapatan ng mga manggagawa at kapakanan ng mga OFW; at 86% naman ang may gusto sa mga kandidatong target mabawasan ang gutom at kahirapan.

Isinagawa ng SWS ang nasabing survey noong March 15 hanggang 20 na kinabilangan ng 1,800 respondents.—sa panulat ni John Riz Calata