NATIONAL NEWS

Nasa maayos na kalagayan ang kalusugan ni Pangulong Ferdinand Marcos Jr.

Tiniyak ito ni Palace Press Officer at PCO Usec. Atty. Claire Castro sa gitna ng mga espekulasyon hinggil sa kalagayan ng kalusugan ng pangulo na lumabas sa social media.

Sa press briefing sa Malacañang, sinabi ni Usec. Castro na patunay ng maayos na kalusugan ng pangulo ang araw-araw na pagdalo nito sa iba’t ibang aktibidad sa labas ng palasyo at mga pulong sa Malacañang, na hindi aniya magagampanan ng pangulo kung hindi ito malakas, masigla, at maayos ang pangangatawan.

Mensahe naman ni Usec. Castro sa mga fake news peddler na huwag gawan ng kuwento ang presidente sapagkat hindi ito nakabubuti sa bansa.

Marapat pa nga sana aniya na ipagdasal na lamang ng mga Pilipino ang mabuting kalusugan ng pangulo para maipagpatuloy nito ang epektibong pamumuno sa bansa, kaysa aniya umaastang doktor ang mga ito sa social media. —sa panulat ni John Riz Calata ulat mula kay Gilbert Perdez (Patrol 13)

Iginiit ni Pangulong Ferdinand Marcos Jr. na ang pagbabalik-loob sa pamahalaan ay hindi kahinaan kundi isang hakbang patungo sa makatarungan at maayos na pamumuhay.

Ginawa ni Pangulong Marcos ang pahayag matapos atasan ang National Amnesty Commission na mag-isyu ng safe conduct passes para sa mga dating rebelde.

Ayon sa Presidente, ang pamahalaan aniya ay handang makinig, umalalay, at tumanggap sa sinumang tapat sa pagbabago.

Sa ilalim aniya ng Bagong Pilipinas, hinihikayat ni Pangulong Marcos ang mga mamamayan na “piliin ang tama” at magtulungan sa pagkamit ng maunlad at mapayapang kinabukasan.—sa panulat ni John Riz Calata ulat mula kay Gilbert Perdez (Patrol 13)

Ikinalungkot ng Malakanyang ang pahayag ni Honeylet Avanceña, partner ni dating Pangulong Rodrigo Duterte, hinggil sa serye ng karahasan sa bansa, partikular ang kasong pagpatay sa negosyanteng si Anson Que.

Ginawa ni Palace Press Officer Usec. Claire Castro ang pahayag kasunod ng sarcastic na pahayag ni Avanceña kung saan binati nito ang administrasyon sa mga nagaganap na krimen sa bansa, kabilang ang aniya’y kidnapping at pagpatay.

Ayon kay Usec. Castro, lubhang ikinalulungkot ng administrasyon na tila nagiging personal at pulitikal na isyu ang mga seryosong usapin na kinasasangkutan ng buhay ng mga Pilipino.

Pinayuhan ng Palace Official si Avanceña na huwag gawing isyu ang mga seryosong kaganapan sa bansa.

Giit pa ni Usec. Castro, sa halip na manghamak, mas makabubuting magkaisa ang bawat Pilipino upang sama-samang i-angat ang bansa. —sa panulat ni John Riz Calata ulat mula kay Gilbert Perdez (Patrol 13)

Aminado ang Philippine National Police na tumaas ang kaso ng kidnapping ngayong taon.

Ayon kay PNP Spokesperson Police Brig. Gen. Jean Fajardo, umabot na sa 13 ang kaso ng kidnapping sa loob lamang ng unang apat na buwan ng taon kung saan walo sa mga ito ay Chinese nationals.

Sinabi ni Brig. Gen. Fajardo na mas malaki ang bilang na ito dahil apat na buwan pa lang ang nakakalipas ngayong 2025 at mayroong pang walong buwan ang natitira.

Batay sa datos ng PNP, noong 2023, pumalo sa dalawampu’t anim ang kaso ng kidnapping; habang noong 2024 naman ay sumirit ito sa tatlumpu’t dalawang kaso.

Isa sa mga nakikitang dahilan ng pambansang pulisya sa pagtaas ng kaso ng kidnapping ngayong taon ay ang pagsasara ng mga pogo kung saan posibleng lumipat  ang ilang tiwaling Chinese national sa kidnapping para mabawi ang kanilang perang nalugi mula sa pag-invest sa POGO.—sa panulat ni John Riz Calata

Naniniwala si House Assistant Majority Leader at Lanao Del Sur Rep. Zia Alonto Adiong na makasisira sa asylum application ni dating Presidential Spokesman Harry Roque ang pagkakadawit nito sa polvoron video o ang gawa-gawang video para palabasin na gumagamit ng ipinagbabawal na gamot si Pangulong Ferdinand Marcos Jr.

Taliwas ito sa paniniwala ni Atty. Roque na ang pagdawit sakaniya sa naturang video ay makatutulong upang patunayang may political persecution sakaniya.

Matatandaang sa pagdinig ng House Tri-Committee, ibinulgar ng vlogger na si Pebbles Cunanan na tinalakay ng dating Presidential Spokesman ang plano nito na ilabas ang video sa isang pribadong hapunan sa Hong Kong.

Isiniwalat din ni Cunanan ang pahayag ni Atty. Roque na nagsabing magaling aniya siyang magpabagsak ng gobyerno.

Gayunman, pabor si Rep. Adiong sa pagbibigay ng due process sa dating tagapagsalita ng palasyo upang maipaliwanag nito sa publiko ang katotohanan at pabulaanan ang mga salaysay ni Cunanan.—sa panulat ni John Riz Calata ulat mula kay Geli Mendez (Patrol 30)

Hindi sapat para kay House Assistant Majority Leader at Lanao Del Sur Rep. Zia Alonto Adiong ang kaso ng pagdukot at pagpatay sa isang Chinese Businessman para sabihing tumataas ang antas ng kriminalidad sa bansa.

Ipinunto ni Rep. Adiong na batay sa datos ng Philippine National Police, malinaw na bumaba na ang krimen sa Pilipinas.

Aniya, ang impormasyon ng pulisya ay opisyal at bahagi ng bansa.

Una naring nabanggit ni House Speaker Martin Romualdez na bumaba na ang kriminalidad at fake news sa Pilipinas.—sa panulat ni John Riz Calata

Anim sa sampung Pilipino ang naniniwalang dapat harapin ni dating Pangulong Rodrigo Duterte ang mga kasong isinampa laban sa kanya sa ICC.

Ito ay batay sa survey na isinagawa ng WR Numero research, kung saan 62% ang nagsabing mahalagang sumalang sa paglilitis ang dating pangulo; 20% naman ang tutol; at 19% naman ang hindi tiyak.

52% naman ng mga Pilipino ang sumang-ayon na dapat managot si Duterte sa kasong crimes against humanity dahil sa pagpapatupad ng drug war campaign sa ilalim ng kanyang administrasyon; 24% naman ang tutol; at 25% ang hindi sigurado.

Samantala, 61% ng mga respondent ang naniniwala na maisisiwalat ang katotohanan kaugnay sa mga sinasabing pagpatay noon ng duterte administration kapag natapos na ang paglilitis; 21%, ang hindi naniniwala; at 18% ang undecided.

75% naman ng mga Pilipino ang naniniwala na walang sinuman ang mas mataas sa batas; 16%, ang unsure; at 8%, ang hindi naniniwala.

61% din ng mga Pilipino ang, nanindigan na dapat ding humarap sa icc ng iba pang kapwa akusado ni Duterte, 21% naman ang nagsabing hindi na ito mahalaga; at 18% ang undecided.

Gayunman, hati pa rin ang tiwala ng mga Pilipino sa ICC, dahil 53% ng mga Pilipino ang naniniwalang patas at walang pinapanigan ang nasabing korte, habang 47% naman ang duda.

Isinagawa ang survey sa halos 1,900 respondents sa buong bansa noong March 31 hanggang April 7.—sa panulat ni John Riz Calata

Natukoy na at nasa kamay na ng Philippine National Police ang mga “person of interest” sa pamamaril kay Albuera, Leyte Mayoral Candidate Kerwin Espinosa.

Ayon kay Philippine National Police Spokesperson Brigadier Gen. Jean Fajardo, kabilang sa mga itinuturing na POI ang pitong pulis mula sa Ormoc City.

Sinabi ni Brig. Gen. Fajardo na naabutan ang mga nasabing pulis sa isang compound malapit sa pinangyarihan ng insidente, ang kaparehong lugar kung saan sinasabing nagmula ang putok ng baril.

Dagdag pa ng PNP Official na isang SUV ang mabilis na tumakas patungo sa compound matapos ang pamamaril at nang sundan ito ng mga otoridad ay tumambad sa kanila ang pitong armadong pulis.

Maaari aniyang sniper ang ginamit ng suspek sa pag-atake kay Espinosa.

Samantala, ayon kay PRO-8 Public Information Office Chief Police Major Analiza Armeza, nasa mabuting kondisyon na sina Espinosa, Vice Mayoral bet nito na si Mariel Espinosa Marinay, at isang menor de edad na nadamay rin sa pamamaril.—sa panulat ni John Riz Calata

Inilabas na ng Commission on Elections ang oras ng botohan sa Mayo 12.

Ayon kay COMELEC Chairman George Erwin Garcia, maaari nang bumoto sa 2025 national at local elections ang mga senior citizen, buntis, at persons with disabilities mula alas-singko ng umaga hanggang alas-siete ng gabi.

Magsisimula naman nang alas-siete ng umaga at magtatapos ng alas-siete ng gabi ang regular voting hours.

Magsisimula naman ang overseas voting period sa April 13, alas-otso ng umaga sa host country hanggang May 12, alas-siete ng umaga, oras sa Pilipinas.

Ipinabatid ng poll body na dapat ay enrolled na sa overseas voting ang mga Pilipino sa abroad bago ito bumoto.

Ito ang kauna-unahang internet voting sa kasaysayan ng Pilipinas. —sa panulat ni John Riz Calata

Dismayado ang common-law wife ni dating Pangulong Rodrigo Duterte na si Honeylet Avanceña sa isinasagawa ng  imbestigasyon ng senado kaugnay sa pag-aresto sa dating pangulo.

Ayon kay Avanceña, ‘pa-ek-ek’ o palabas lamang ang nasabing pagdinig ng Senado.

Dagdag pa ng common-law wife ng dating pangulo, hindi siya naniniwala kay Senador Imee Marcos, na nanguna sa pagsasagawa ng pagdinig.

Tanong ni Avanceña, ‘hindi ba nakikita ng mambabatas kung ano ang nangyari?

Samantala, sinabi rin ng partner ng pangulo na napapatanong ang dating presidente kung bakit ito nakakulong, sa kabila ng ginawa nito para sa Pilipinas.—sa panulat ni John Riz Calata