NATIONAL NEWS

Mananatiling naka-full alert ang Philippine National Police hanggang sa pormal na maideklara ang lahat ng mga nanalo sa 2025 national and local elections.

Ito, ang naging pagtitiyak ni PNP Chief General Rommel Francisco Marbil kasunod ng mga naitatalang insidente ng karahasan sa bansa kaugnay ng eleksyon.

Sa pinakahuling datos, nakapagtala ang PNP ng 52 insidente ng karahasan sa buong bansa, kung saan pamamaril ang may pinakamarami na umabot sa labindalawang kaso.

Bagaman masasabing ‘generally peaceful’ ang mismong araw ng halalan sa kabila ng mga naitalang insidente, mananatiling naka-full alert status ang pnp upang tiyakin na mapipigilan pa rin ang mga magdudulot ng aberya at karahasan.

Inulan ng libo-libong reklamo ang election watchdog na kontra daya matapos ang halalan kahapon.

Ito, ang kinumpirma mismo ni Kontra Daya Conveyor Danilo Arao sa panayam ng DWIZ.

Iba’t ibang uri anya ang reklamong natanggap ng watchdog sa mga botante sa pagtatapos ng halalan kahapon.

Samantala, tinukoy rin ng Kontra Daya Conveyor ang ilang anomalyang kinaharap ng mga botante, na hindi lamang tungkol sa technical difficulties, pati na rin sa kaliwa’t kanang illegal campaign activities.—sa panulat ni Jasper Barleta

Nilinaw ng Commission on Elections na wala pang kautusan upang ipagpaliban ang proklamasyon ni dating Pangulong Rodrigo Duterte bilang halal na Alkalde ng Davao City, sa kabila ng kanyang pagkakaaresto at kasalukuyang pagkakakulong sa The Hague, Netherlands.

Ayon kay COMELEC Chairman George Garcia, mananatiling kandidato si Duterte at maaari pa ring maiproklama bilang alkalde hangga’t walang pinal na hatol ng pagkakakulong laban sa kanya.

Sinabi ng Poll Body Chief na ang pagkakaaresto ay hindi otomatikong nagdidiskwalipika sa isang kandidato, maliban na lamang kung may pinal na hatol ng pagkakasala.

Kung mananalo si duterte habang nasa kustodiya ng ICC, maaari pa rin siyang maiproklama bilang alkalde.

Gayunpaman, ang Department of the Interior and Local Government ang magpapasya kung maaari niyang gampanan ang kanyang tungkulin habang nakakulong.—sa panulat ni Jasper Barleta

Nilinaw ni Commission on Elections Chairman George Erwin Garcia na walang naging pagkaantala sa transmission ng mga boto ng halalan, taliwas sa mga kumakalat na alegasyon.

Ayon kay COMELEC Chairman Garcia, ang transmission ng boto ay nagsimula bandang alas-siyete ng gabi matapos ang pagsasara ng mga voting precincts, alinsunod sa tamang proseso.

Ipinaliwanag niyang ang mabilis na paglalabas ng partial at unofficial results ay dahil sa mas pinaigting na teknolohiya at preparasyon ng komisyon.

Dagdag pa niya, mas naging maayos at mabilis ang proseso kumpara sa mga nakaraang eleksyon, bunga ng koordinasyon sa mga election officers at partner agencies.

Ang pahayag ni Garcia ay tugon sa mga haka-haka at espekulasyon na lumalabas sa social media hinggil sa sinasabing pagkaantala ng resulta ng halalan.

Binigyang-diin ng poll body na patuloy silang magiging transparent sa proseso at bukas sa anumang imbestigasyon kung kinakailangan.

Ipinatupad na ng Meralco ang bawas-singil sa kuryente para sa mga konsyumer nito ngayong buwan.

Batay sa anunsyo ng nasabing electric company, aabot sa P0.75 sentimo ang tapyas sa kada kilowatt-hour para sa billing nito.

Tinatayang katumbas ito ng 150 pesos na bawas-singil sa kada buwang konsumo na 200 kilowatt-hour sa monthly electric bill ng konsyumer.

Ang naturang bawas-singil ay bunsod ng mas mababang generation charge mula sa mga power supplier.—sa panulat ni Jasper Barleta

Patunay ang resulta ng pinakabagong tugon ng masa survey na isinagawa ng OCTA Research sa pagbabagong hatid sa buhay ng mga Pilipino ng mga repormang ginagawa ng administrasyon ni Pangulong Ferdinand Marcos Jr.

Ito ang pahayag ni House Speaker Martin Romualdez bilang reakston sa  resulta ng pinakabagong tnm survey ng octa research.

Batay sa TNM survey nitong Abril 2025, bumaba sa 42% ang mga pamilyang Pilipino na itinuturing ang kanilang sarili bilang mahirap — bumaba mula sa 50% na naitala limang buwan na ang nakalilipas.

Malaki rin ang ibinaba ng food poverty, mula 49% tungo sa 35%, na katumbas ng humigit-kumulang 3.7 milyong pamilyang hindi na nakakaramdam ng kakulangan sa pagkain.

Bagama’t nananatiling halos pareho ang hunger rate sa 13% kumpara sa nakaraang quarter, binigyang-diin ni Speaker Romualdez na halos 792,000 pamilyang Pilipino ang naiulat na hindi na nakaranas ng involuntary hunger.

Nanawagan naman ang lider ng kamaral sa mga ahensya ng gobyerno, mga lokal na pamahalaan at mga mambabatas na ipagpatuloy ang magandang momentum na ito upang mas gumanda pa ang pamumuhay ng bawat Pilipino.

Nasira ang automated counting machine sa Marawi City matapos ito buhusan nang tubig ng isang poll watcher.

Batay sa ulat, tumakas ang nasabing poll watcher ng dumating ang mga otoridad sa nasabing lugar.

Kinumpirma naman ng technician mula sa commission on elections na nasira ang nasabing ACM.

Ang nabanggit na ACM ay nakatakda sana para sa apat na pinagsama-samang polling precinct para sa mga evacuees ng marawi siege sa Barangay West at Barangay Sagonsongan.

Pansamantala namang nahinto ng ilang minuto ang pagboto ng ilang botante bago ang pagdating ng pamalit na ACM sa lugar.

 Pito sa bawat sampung Pilipino ang naniniwala na dapat pagtuunan agad ng pansin ng mga mahahalal na opisyal at ang mga kasalukuyang nakaupo sa pwesto ang patuloy na pagsirit ng mga pangunahing bilihin.

Batay sa isinagawang survey ng Pulse Asia, top concern ng 69% ng mga Pilipino ang pagtaas ng presyo ng bilihin.

Samantalang 36% naman ang naniniwalang dapat bigyang prayoridad ang pagtaas sa sahod ng mga manggagawang Pilipino.

Sinundan naman ito ng paglaban sa graft and corruption at sa nangyayaring kriminalidad sa bansa na may tig 28% habang ang pagpapababa naman ng kahirapan sa bansa ay may 27%.

Isinagawa ang survey noong March 23-29 sa 2400 adult Filipinos.

Kinilala ni Vice President Sara Duterte ang resulta ng partial at unofficial list ng mga posibleng manalong kandidato sa pagkasenador.

Gayunman aminado ang Bise Presidente na ikinadismaya nito ang naging resulta dahil hindi ito ang kanilang inaasahan.

Sa inilabas na pahayag ni VP Duterte, lima lamang mula sa labindalawang senatorial candidate na kanyang personal na inendorso ang may tsansang manalo batay na rin sa partial at unofficial tally ng Commission on Elections.

Kabilang sa mga nasabing kandidato na sinuportahan ni VP Sara ay sina reelectionist candidate Bong Go; Ronald ‘Bato’ Dela Rosa at Imee Marcos; Sagip Partylist Representative Rodante Marcoleta; at Las Piñas Representative Camille Villar.

Nagpasalamat naman si VP Duterte sa lahat ng sumuporta sa kanilang laban.

Binigyan-diin ng European Union Election Observers mission na hindi nila nagawang maobserbahan mabuti ang proseso ng pagboto sa katatapos lamang na 2025 election.

Ayon sa mga poll observer ng EU, ito’y dahil sa desisyon ng commission on election na tanggihan ang kanilang kahilingan na pumasok sa mga polling precinct sa oras ng botohan.

Batay anila sa kanilang nilagdaang kasunduan maaari silang pumasok sa mga voting precints anumang oras.

Ipinunto ng EU poll observation mission na ang pagpasok sa mga polling precinct sa araw ng halalan ay bahagi ng kanilang methodology sa nakalipas na 25 taon.

Matatandaang, iginiit ng COMELEC na labag sa batas kung pahihintulutan ang nasabing mga foreign observer sa loob ng mga voting precincts sa kasagsagan ng halalan.