NATIONAL NEWS

Sangkaterbang aberya ang na-monitor ng Commission on Elections at poll watchdogs sa naganap na halalan.

Ayon sa comelec, umabot sa mahigit 300 automated counting machines ang pumalya sa buong bansa kung saan pinalitan ang dalawandaan sa mga ito.

Kabilang na rito ang mga ACM sa ilang presinto sa Zamboanga Del Sur, Ilocos Sur, Cagayan, Iloilo, Negros Oriental, Bohol, Aklan, at Lanao Del Norte.

Sa isang polling precinct naman sa laguna, nag-jam ang ilang voter verifiable paper audit trail o voter’s receipt.

Nakatanggap naman ang legal network for truthful elections o lente ng mga ulat kung saan dalawang balota ang naibibigay sa isang botante.

Ayon sa poll watchdog, posibleng ito ay dahil sa manipis na papel na ginamit para sa mga balota kaya nagkakadikit-dikit ang mga ito.

Samantala, isang sasakyan naman na may tarpaulin ng isang kandidato ang namataan sa Calabarzon, Bulacan at Pangasinan, kung saan namimigay rin ang ilang indibidwal ng flyer sa mga botante.

Nagsimula na kaninang ala sais ng umaga ang special voting schedule para sa mga PDL o Persons Deprived of Liberty na inaasahang magtapos ng alas una ng tanghali.

Naitala ang Talisay City Bureau of Jail Management (BJMP) na may pinakamaraming bilang ng mga PDL sa Cebu na mayroong mahigit 3,000 registered voters.

793 sa mga ito ang inaasahang boboto na kinabibilangan ng 695 na mga kalalakihan at 98 na mga kababaihan.

Inaasahan naman na nasa 1,126 ang bilang ng mga PDL na boboto sa 17 special polling precints sa MIMAROPA.

Samantala, ayon kay BJMP male dormitory Spokesperson Inspector Nelver Lagutin, naka red alert ang Talisay City BJMP simula pa kaninang alas kwatro ng umaga. Hindi rin pinapayagang umalis ang mga ito habang bumoboto ang mga PDLs at maaari lang bumoto pagkatapos ng mga PDLs.

#dwiznews #aliwchannel23 #halalan2025

Umakyat sa 60.5% o 41,412,361 ang bilang ng mga gen z at millennial na nag-register para bumoto sa halalan ngayong taon, higit na mas mataas kumpara sa naitalang bilang ng mga ito noong 2022 elections na 56% o halos 37 million.

Naitala ang mahigit 23 million voters sa mga millennial na nasa edad 29-44 na ngayong taon, habang mahigit 18.3 million naman ang mga botante mula sa mga gen z o mga nasa edad 18-28.

Tiniyak ng Meralco na higit pa sa sapat ang supply ng kuryente para sa 2025 Midterm elections.

Ayon kay Spokesperson Joe Zaldarriaga, wala silang nakikitang malaking aberya sa suplay ng kuryente ngayong halalan, lalo’t mababa ang demand dahil holiday.

Nakahanda rin ang kanilang mga quick response team at contingency measures para tugunan agad ang anumang localized na brownout, bagama’t wala silang inaasahang aberya sa ngayon.

Mga pulis ang magiging poll watchers ng mga uniformed personnel sa ilang bayan sa Lanao del Sur at Maguindanao del Sur.

Ito’y matapos umatras ang bilang mga electoral board ang mga guro dahil sa nagpapatuloy na tensyon na nasabing mga lugar.

Kaugnay nito, mahigit walong daang pulis naman mula sa Luzon ang mamamahala sa polling center sa Buluan, Maguindanao del Sur, isa sa dalawang lugar sa bansa na nasa ilalim ng kontrol ng Commission on Elections.

Ayon kay Maguindanao del Sur Election Supervisor Allan Kandon, 100 percent ng PNP ang magsisilbing Special Electoral Boards.

Nabatid na maging ang Datu Odin Sinsuat sa Maguindanao del Norte ay isinailalim na sa COMELEC control dahil sa mga naiulat na insidente ng karahasan sa mga munisipalidad.

Dismayado ang ilang mga pasahero na nakipagsapalarang maka-uwi sa kani-kanilang mga probinsya para maka-boto.

Ayon sa ilang indibidwal sa Parañaque Integrated Terminal Exchange, mananatili na lamang sila rito Maynila at hindi na susubukan pang maka-uwi dahil halos buong araw na silang nag-aantay makasakay ng bus.

Kahit mag-antay pa anya sila, ay wala pa ring kasiguraduhan kung makakasakay sila ng bus.

Nabatid na maging sa ilang terminal sa cubao ay dinagsa ng libu-libong mga pasahero na umuwi sa kani-kanilang mga probinsya para makaboto ngayong araw.—sa panulat ni Kat Gonzales

Hinimok ng Commission on Elections ang Philippine National Police na agad na arestuhin ang mga mahuhuling sangkot sa vote buying at vote selling, kahit walang warrant of arrest.

Ito, ayon kay COMELEC Chairman George Erwin Garcia kasabay ng pagsisigurong protektado sa ilalim ng batas ang opisyal ng pnp na magsasagawa ng ganitong uri ng pag-aresto.

Aniya, ang mahuhuli sa akto na nagbebenta o bumibili ng boto ay maaaring makulong ng hanggang anim na taon at madiskwalipika nang habambuhay sa paghawak sa anumang posisyon sa gobyerno.

Binigyang diin din ng poll body na ang warrantless arrest ay pinahihintulutan ng 1987 constitution at ng desisyon ng Korte Suprema, lalo na kung ang krimen ay nagaganap sa harap mismo ng isang otoridad.

Kasabay nito, hinimok din ng COMELEC ang publiko na kumuha ng video bilang ebidensya sakaling makahuli ng gumagawa ng ganitong krimen.

Inilunsad ng Department of Information and Communications Technology at Commission on Elections ang kauna-unahang 24/7 threat monitoring center sa bansa.

Tugon ito sa direktiba ni Pangulong Ferdinand Marcos Jr. Na tiyakin ang malinis at tapat na midterm elections sa Mayo 12.

Ayon kay Palace Press Officer usec. Claire Castro, ang monitoring center ay isang real-time digital command post na tututok sa pagtukoy, pagpigil, at pagresolba sa mga banta ng online misinformation at disinformation kaugnay ng halalan.

Pinangungunahan ito ng Cybercrime Investigation and Coordinating Center ng DICT at ng task force katotohanan, katapatan at katarungan sa halalan o Task Force KKK ng COMELEC.

Operational na aniya ito dalawang araw matapos ang direktiba, patunay sa mabilis at coordinated na aksyon ng pamahalaan para mapanatili ang integridad ng halalan.—ulat mula kay Gilbert Perdez (Patrol 13)

 Malugod na inanunsyo ng Department of Budget and Management na aprubado na ang dagdag na dalawang libong pisong honoraria ng mga guro at iba pang poll workers na magsisilbi sa darating national and local elections 2025.

Ito ay alinsunod na rin sa direktiba ni Pangulong Ferdinand Marcos Jr.

Ayon kay DBM Sec. Amenah Pangandaman, layunin ng dagdag na kompensasyon na kilalanin ang sakripisyo, pagod, at puyat ng mga guro at poll workers sa pagbabantay ng boto sa araw ng halalan.

Samantala, hinikayat naman ng DBM ang Commission on Elections na tiyaking maipapamahagi nang maayos at maagap ang mas mataas na honoraria sa mga poll workers.

Aabot sa 7.48 bilyong piso ang halaga ng ilalaang pondo para sa kabuuang compensation ng poll workers sa ilalim ng S.Y. 2025 General Appropriations Act.

Tinatayang aabot sa halos walong daang libong poll workers ang magsisilbi sa lunes, araw ng halalan.

Aresto ang anim na indibidwal dahil sa sinasabing pagtatangkang manipulahin ang vote-counting machines upang masigurong mananalo ang isang mayoral candidate sa Iba, Zambales.

Naaresto ang mga suspek sa isinagawang entrapment operation sa isang hotel sa Quezon City.

Nag-ugat ang kaso nang iulat ni Iba mayoral candidate, Atty. Genaro montefalcon ang alok ng grupo na manipulahin ang resulta ng eleksyon para siya ay manalo kapalit ang 30 million pesos.

Kabilang sa mga suspek sina Teody Abalos at Cherrylyn Adriano na nagsabing may koneksyon sila sa Commission on Elections.

Bukod sa dalawang suspek, natimbog din sina Roland Ucab, Joseph Ong, Ralp Edward Salas, at Francis James Mapua.

Mahaharap ang mga arestadong inbidwal sa patung-patong na kaso, kabilang na ang estafa, usurpation of authority, at violating the automated election system law.