NATIONAL NEWS

Magkakasa ng hiwalay na imbestigasyon ang Commission on Human Rights hinggil sa paggamit ng puwersa ng pulisya at sinasabing harassment sa mga media personnel sa anti-corruption protests.

Ayon sa CHR, bagama’t tungkulin ng estado na magpanatili ng kaayusan, ang mga hakbangin ay dapat laging nakaayon sa human rights standards at batay sa prinsipyo ng necessity, proportionality at accountability.

Nagtalaga ang CHR ng monitoring teams sa mga protest sites at sa Manila Police District headquarters, kung saan dinala ang daan-daang inaresto, kabilang ang mga menor de edad.

Ayon sa Komisyon ng Karapatang Pantao, may ilang naaresto na hindi naman lumahok sa kilos-protesta at inihalintulad ang nangyari sa “karahasan ng diktadura.”

Depensa naman ng pulisya, na may mga sinasabing “instigators” sa likod ng gulo at pinag-aaralan nilang sampahan ng kasong inciting to sedition ang mga nanggulo sa kilos-protesta.

Naghain ng ethics complaint si Cavite 4th District Rep. Kiko Barzaga laban kay Deputy Speaker Ronaldo Puno.

Ito ang kinumpirma ni Cong. Barzaga sa ambush interview sa Kamara na tatlong ethics complaint ang kaniyang inihain laban kay Puno.

Kabilang na rito ang paggamit ni Puno sa usapin ng “mental health” na isang sensitibong topic at hindi basta-basta ginagamit ng mga hindi propesyonal at walang kakayahan para ikonsidera ang mga seryosong nakararanas nito.

Ang pagtatangkang patahimikin ang mga kritiko o to suppress political dissent laban kay dating House Speaker Martin Romualdez.

At ang pagsasapubliko ni Puno ng mga screenshot photo laban sa kaniya noong nakaraang press conference.

Iginiit ni Barzaga, na kaniyang patatalsikin sa puwesto si Puno dahil sa mga paratang nito laban sa kaniya.

Matatandaang una nang naghain ng reklamo sa Ethics Committee ang mga miyembro ng National Unity Party o NUP na pinangunahan ni Puno laban kay Barzaga dahil sa mali at hindi akmang pagkilos nito partikular ang paglilabas ng socmed cards sa kaniyang official Facebook account.

Iginiit ni Barzaga, na handa siyang harapin ang isinampang kaso sa kaniya ni Puno at kaniya nang kinonsulta ang kaniyang legal team hinggil sa usapin.

Ito’y dahil malapit si Speaker Dy kay dating Speaker at Leyte Rep. Martin Romualdez maging kay Pangulong Ferdinand Marcos Jr.

Ayon kay Barzaga, malaki ang posibilidad na pinoprotektahan nito ang kapwa mambabatas na si Ako Bicol Partylist Rep. Elizaldy Co na nasasangkot ngayon sa alegasyon ng insertions sa 2025 national budget at maanomalyang flood control projects.

Iginiit ni Barzaga na tulad ng ginawa niya kay dating House Speaker Martin Romualdez, ipagpapatuloy niya ang pamumwersa sa liderato ng Kamara hangga’t hindi nagbibitiw sa puwesto si Speaker Dy.

Binigyang-diin ni House Speaker Faustino “Bojie” Dy III na dapat nang ipaubaya ng Kamara sa Independent Commission for Infrastructure ang imbestigasyon sa palpak at maanomalyang flood control projects.

Ayon kay Speaker Dy, mas mainam na maipasa na ng House Infrastructure Committee o Infracomm ang pagsisiyasat sa ICI.

Ayon sa lider ng Kamara, ito’y dahil hindi na aniya pinaniniwalaan ng taumbayan ang mga nangyayari sa pagdinig ng Infracomm na binubuo ng Committee on Public Accounts, Public Works and Highways, at Good Government and Public Accountability.

Matatandaang nakaka-dalawang pagdinig na ang Infracomm sa isyu ng flood control kung saan marami nang naisiwalat at natuklasan kabilang ang pagkakasangkot ng pangalan nina Senators Jinggoy Estrada at Joel Villanueva kay dating District Engr. Henry Alcantara.

Sinabi ni Speaker Dy na pag-uusapan pa ng mga lider ng Kamara kung ano ang magiging direksiyon kasabay ng paggiit na handa silang ibigay sa ICI ang mga kinakailangang dokumento o ebidensya na nakalap mula sa mga hearings ng Infracomm.

—Sa panulat ni Jasper Barleta

Kinondena ni Pangulong Ferdinand Marcos Jr. ang paggamit sa mga kabataan sa naganap na kaguluhan kasabay ng malawakang kilos-protesta na ikinasa kontra korupsyon at katiwalian.

Ayon kay Palace Press Officer Claire Castro, hindi lehitimong raliyista na may lehitimong adhikain ang mga tinawag nitong Team Itim kundi mga grupong sinadyang manggulo at manira ng gobyerno sa pamamagitan ng panununog, paninira at iba pang iligal na gawain.

Binigyang-diin ni Castro, hindi makakalagpas sa kamay ng batas ang mga nasa likod ng kaguluhan, at hustisya ang uusig sa kanila.

Pinuna rin ng Palasyo ang paggamit ng foul language ng ilang dumalo sa protesta.

Paalala ni Castro, may responsibilidad ang lahat na maging mabuting ehemplo lalo na sa kabataan, at dapat idaan sa tamang paraan ang laban kontra korupsyon.

—Sa panulat ni Jasper Barleta

Handa si Pangulong Ferdinand Marcos Jr. na sumailalim sa imbestigasyon kaugnay sa ulat ng Philippine Center for Investigative Journalism na nagsasabing nakatanggap umano siya ng 21-million-pesos mula sa Rudhil Construction and Enterprises para sa kanyang kampanya noong 2022.

Ayon kay Palace Press Officer Claire Castro, hindi nagtatago ang pangulo at bukas siyang sumailalim sa anumang proseso ng pagsisiyasat kung saklawin ng imbestigasyon ang kanyang pangalan.

Giit ni Atty. Castro, matapang ang pangulo at kumpiyansa siya na malilinis ang kanyang pangalan sa pamamagitan ng pormal na proseso ng imbestigasyon.

Malinaw din aniya ang posisyon ng pangulo na walang sinuman, kahit siya pa, ang dapat mailayo sa batas o sa anumang pagdinig hinggil sa katiwalian.

Sa gitna ng kontrobersiya, kinikilala ng Malacañang na sensitibo ang alegasyon dahil kinasasangkutan ito ng mga kontratistang may proyekto sa pamahalaan.

—Sa panulat ni Jasper Barleta

Naniniwala si Senate Deputy Majority Leader JV Ejercito na si dating Bulacan District Engineer Henry Alcantara ang maituturing na “missing link” para matukoy ang mga mas matataas na opisyal o big fish na mastermind sa flood control anomalies.

Ayon kay Sen. Ejercito, mahalaga na makumbinsi si Alcantara na mag-“tell all” na sa imbestigasyon ng Senado.

Maaari aniyang matataas na opisyal sa DPWH o proponent ng anomalous flood control projects ang nasa likod ng anomalya.

Giit ng senador, hindi mapapahupa ang galit ng publiko kung hanggang kina Henry Alcantara at Brice Hernandez lang ang mapananagot sa usad ng imbestigasyon.

Ipagpapatuloy ngayong araw ang panibagong pagdinig ng Senate Blue Ribbon Committee kung saan inaasahan na ilalabas ang mga kahon ng dokumento na isinumite ni Hernandez na sinasabing maaaring maging ebidensya sa mga isinasangkot niya na mambabatas sa flood control anomalies.

—Sa panulat ni Jasper Barleta

Aabot sa 54 ang bumotong pabor; 6 ang tumutol; habang 4 naman ang nag-abstain para i-akyat ang deliberasyon sa plenaryo ng Kamara kaugnay sa panukalang pambansang pondo na nagkakahalaga ng mahigit P6.7 trillion.

Una nang inaprubahan ng executive committee ang mga amyendang inilatag ng Budget Amendments Review Sub-Committee, kabilang na ang P255 billion na pondong tinapyas mula sa flood control projects ng DPWH at na-reallocate o inilipat ito sa ibang departamento.

Tiniyak naman ni House Appropriations Committee Chairperson Mikaela Suansing na tanging “institutional amendments” at walang “congressional insertions” ang mga inaprubahang amyenda sa Kamara.

Pormal nang idineklara bilang bagong House Secretary General si dating Manila Economic and Cultural Office o MECO chairperson and resident representative Cheloy Garafil.

Ito’y matapos palitan si dating House Secretary General Reginald Velasco kasunod na rin ng pagbitiw sa puwesto ni Leyte Rep. Martin Romualdez bilang House Speaker.

Si House Speaker Faustino “Bojie” Dy III ang nanguna sa oath taking ni Garafil na sinuportahan ng mga mambabatas sa Kamara, partikular si House Majority Leader Sandro Marcos at Deputy Speaker Janette Garin.

Bukod kay Velasco, pinalitan din si dating House Sergeant-at-Arms Napoleon Taas sa katauhan naman ni retired Brig. Gen. Ferdinand Melchor Dela Cruz.

Umaasa ang liderato ng Kamara na makikipagtulungan sina Garafil at Dela Cruz sa ilalim ng pamumuno ni Speaker Dy.

Maghahain ng reklamo ngayong araw sa House Committee on Ethics and Privileges si Navotas City Rep. Toby Tiangco laban kay Ako Bicol Partylist Rep. Elizaldy Co.

Ito’y bunsod ng kawalan ng records ng small committee na pinamumunuan ni Co noong siya pa ang chairperson ng House Appropriations Committee at ang hindi niya pag-uwi sa Pilipinas para sagutin ang mga alegasyong ibinabato laban sa kaniya partikular ang insertions sa 2025 national budget at ang pagkakasangkot niya sa anomalya ng flood control projects.

Ayon kay Tiangco, kaniyang isasama ang mga supplemental evidence kasunod ng naging rebelasyon ni dating Bulacan District Engr. Henry Alcantara na may nakukuhang kickback si Co sa mga proyekto ng DPWH.

Pinauubaya na ni Cong. Tiangco sa Ethics Committee ang angkop na parusa o sanction laban kay Co.